Cʌntesʌntel 4
Bajcheʼ mi mejlel laj cʌn Dios
Miʼ mejlel laj cʌn Jehová cheʼ mi lac pejcan jini Biblia. Ti wajali, Dios tsiʼ yajca lamital winicob chaʼan miʼ tsʼijbubeñob i ñaʼtʌbal. Jini tsʼijbujel cʌmbil bajcheʼ jini Biblia. Wʌle mi mejlel laj cʌn Dios cheʼ mi lac pejcan jini Biblia. Yaʼan i tʼan Jehová, o i subtʼan, jini chaʼan cʌmbil jaʼel bajcheʼ i Tʼan Dios. Miʼ mejlel lac ñop chuqui miʼ yʌl jini Biblia, come Jehová maʼanic baʼ ora yujil lot. «Dios mach mejlic i chaʼlen lot.» (Hebreos 6:18.) Jini chaʼan, tiʼ Tʼan Dios yaʼan i sujmlel (Juan 17:17).
Jini Biblia jiñʌch jumpʼejl lac majtan ñumen ñuc bʌ i cʼʌjñibal tsaʼ bʌ i yʌqʼueyonla Dios. Cheʼʌch bajcheʼ jumpʼejl carta muʼ bʌ i tsʼijbuben i yalobilob juntiquil tatʌl wen xcʼuxbiya bʌ. Miʼ subeñonla chuqui albil i chaʼan Dios cheʼ mi caj i sujtesan ili Lum ti jumpʼejl ajñibʌl wen i tʼojol jax bʌ, baʼ mi lac chumtʌl, tiʼ yʌlol jumpʼejl paraíso. Miʼ subeñonla chuqui tsiʼ mele Dios ti wajali, yicʼot chuqui woliʼ mel wʌle, i chuqui mi caj i mel ti talto bʌ qʼuin chaʼan tiʼ tojlel i yalobilob xucʼuloʼ bʌ. Yicʼot jaʼel miʼ coltañonla chaʼan mi lac tojʼesan lac wocol, yicʼot chaʼan mi lac taj lac tijicñʌyel (2 Timoteo 3:16, 17).
Jini i testigojob Jehová i yamigojobʌch Dios; mi caj i coltañetob a chʼʌmben isujm chuqui mi yʌl jini Biblia. Cojach yom maʼ subeñob chaʼan a wom a chajpan jini Biblia. Maʼanic mi caj i cʼajtibeñetob i tojol chaʼan miʼ cʌntesañetob (Mateo 10:8). Yicʼot jaʼel, maʼ mejlel ti majlel yaʼ ti tempa bʌ, baʼan xñoptʼañob. Iliyi miʼ yujtel yaʼ ti otot tac i cʼabaʼ i Yotlel Tempa bʌ baʼ miʼ chʼujutesʌntel Dios. Mi mucʼʌch a wajñel yaʼ ti tempa bʌ, jini a ñaʼtʌbal ti Dios orajach miʼ caj ti colel.
Miʼ mejlel laj cʌn Dios cheʼ mi lac ñaʼtʌben chuqui tac tsiʼ mele. Lajal bajcheʼ miʼ yʌl, jini Biblia: «tsiʼ mele Dios jini panchan yicʼot Pañimil» (Génesis 1:1). Cheʼ bʌ Jehová tsiʼ mele jini «panchan tac», tsiʼ mele jaʼel jini Qʼuin. Jixcu cheʼ jini, ¿chuqui miʼ cʌntesañonla chaʼan Dios iliyi? Chaʼan Jehová wen cabʌlʌch i pʼʌtʌlel. Cojach tiʼ bajñelil tsaʼ mejli i mel wen pʼʌtʌl bʌ bajcheʼ jini Qʼuin. Yicʼot jaʼel miʼ pʌsbeñonla chaʼan Jehová añʌch i ñaʼtʌbal, come yom an lac ñaʼtʌbal chaʼan mi lac mel jini Qʼuin, muʼ bʌ i yʌqʼueñonla i ticwʌlel yicʼot i cʼʌcʼal, i maʼanic baʼ ora miʼ yajpel.
Jini i melbal tac Jehová miʼ pʌs chaʼan mucʼʌch i cʼuxbiñonla. Ñaʼtan a wilan tiʼ chajp tiʼ chajp i wut teʼ am bʌ ila ti Lum. Jehová cheʼic jax yom junchajp jach i wut teʼ tsiʼ yʌqʼueyonla, o mi junchajpic. Pero mach cheʼiqui, tsiʼ yʌqʼueyonla i wut teʼ ti chajp bʌ i colemlel tac i sumuclel yicʼot i tsʼijbal tiʼ chajp ti chajp tac. Iliyi miʼ pʌsbeñonla chaʼan Jehová mucʼʌch i cʼuxbiñonla, yicʼot chaʼan mach chʌquic, mi yʌqʼueñonla chuqui la com (Salmo 104:24).