Cʌntesʌntel 6
¡Jini Paraíso lʌcʼʌlix!
Jini bʌbʌqʼuen tac bʌ mi laj qʼuel wʌle i la ti Lum, jiñʌch yom i yʌl chaʼan lʌcʼʌlix jini Paraíso. Jini Biblia tsiʼ yʌlʌ ti wajali chaʼan mi caj laj qʼuel wen tsʌts tac bʌ wocol, cheʼ lʌcʼʌlix jini Paraíso. Wʌle chumulonixla ti jini qʼuin tac. Jiñʌch iliyi lamital bʌ tsiʼ wʌn alʌ jini Biblia miʼ caj ti ujtel:
Colem tac bʌ guerra. «Come jini añoʼ bʌ ti jumpejt lum mi caj i techob guerra tiʼ contra añoʼ bʌ ti yambʌ lum. Jini añoʼ bʌ tiʼ wenta juntiquil yumʌl mi caj i techob guerra tiʼ contra jini añoʼ bʌ tiʼ wenta yambʌ yumʌl.» (Mateo 24:7.) Ili tsaʼix bʌ wʌn ajli tsaʼix tsʼʌctiyi. Cʼʌlʌl cheʼ ti 1914 tsaʼ ujti chaʼ yajl guerra tiʼ joytilel pañimil yicʼot yan tac bʌ guerra chʼoʼchʼoc tac bʌ. Wen yonlel chʌmeñob yaʼi.
Cʼamʌjel tac pam pujquem bʌ. Miʼ cajel «cʼamʌjel muʼ bʌ i pam pujquel» (Lucas 21:11). ¿Tsaʼix ba tsʼʌctiyi iliyi? Tsaʼixcu. Jini cáncer, cʼamʌjel tac ti lac pusicʼal, jini tuberculosis, paludismo, jini sida yicʼot yan tac bʌ cʼamʌjel tac, tsaʼix i tsʌnsa yonlel winicob xʼixicob.
Mi caj i sʌjlel bʌlñʌcʼʌl. Tiʼ pejtelel pañimil an mach bʌ anic miʼ jastiyel chuqui miʼ cʼuxob. Yonlel miʼ chʌmelob ti wiʼñal ti jujumpʼejl jab. Iliyi jiñʌch yambʌ señal mi pʌs chaʼan lʌcʼʌlix jini Paraíso. Jini Biblia miʼ yʌl: «Tal cabʌl wiʼñal» (Marcos 13:8).
Yujquel lum. «Tal [...] yujquel lum ti cabʌl lum.» (Mateo 24:7.) Iliyi tsaʼix tsʼʌctiyi jaʼel ti ili qʼuin. An i yonlel chʌmeñoʼ bʌ winicob xʼixicob chaʼan ti caj jini yujquel lum tac cʼʌlʌl cheʼ ti 1914.
Jontol bʌ winicob xʼixicob. Jini winicob xʼixicob mi caj i cʼuxbiñob taqʼuin yicʼot mi caj i bajñel cʼuxbiñob i bʌ. Miʼ caj i cʼuxbiñob chuqui tac yom i pusicʼalob i maʼanic mi caj i cʼuxbiñob Dios. Jini alobob «mi caj i ñusʌbeñob i tʼan i tat i ña» (2 Timoteo 3:1-5). ¿Mach ba anic maʼ cʌn chaʼan an cabʌl cheʼo bʌ wʌle bajcheʼ jini? Maʼanic miʼ chʼʌmob ti ñuc Dios yicʼot miʼ ticʼlañob jini muʼ bʌ i ñop i lʌcʼtesañob i bʌ ti tojlel.
Jontolil. Yicʼot jaʼel cabʌl «miʼ caj ti pʼojlel jontolil» (Mateo 24:12). Tajolʌch cheʼʌch maʼ qʼuele jaʼel chaʼan tsaʼix wen pʼojli jini jontolil ti ili cojix tac bʌ qʼuin. Baqui jach mi la cubin, winicob xʼixicob mucʼob ti bʌqʼuen chaʼan mi xujchʼintelob, miʼ lotintelob o miʼ ticʼlantelob.
Ti pejtelel ili miʼ pʌs chaʼan jini i Yumʌntel Dios lʌcʼʌlix. Jini Biblia mi yʌl: «Cheʼ mi laʼ qʼuel woli ti ujtel ili tac, ñaʼtanla lʌcʼʌlix i yumʌntel Dios» (Lucas 21:31). Pero ¿chuqui jini i Yumʌntel Dios? Jiñʌch yumʌl i chaʼan bʌ Dios am bʌ ti panchan muʼ bʌ caj i sujtesan ili Lum ti jumpʼejl paraíso. Miʼ caj i chʼʌmben i buchlib ili yumʌlob añoʼ bʌ wʌʼ ti pañimil (Daniel 2:44).