Cʌntesʌntel 11
Mach lac jacʼ jini ñopbalʌl mach bʌ i sujmlelic
Satanás yicʼot i xibajob mach yomobic chaʼan mi lac melben i yeʼtel Dios. Miʼ ñop i ñajtʼesañob winicob xʼixicob tiʼ tojlel Dios cheʼ bajcheʼ cʼamel mi mejlel i mel. ¿Bajcheʼ? Junchajp bajcheʼ miʼ taj jiñʌch ti ñopbalʌl mach bʌ i sujmlelic (2 Corintios 11:13-15). Jumpʼejl ñopbalʌl mach isujmic, mi mach cheʼic miʼ chaʼlen cʌntesa bajcheʼ mi yʌl ti Biblia. Jini ñopbalʌl mach bʌ i sujmlelic, lajalʌch bajcheʼ jini taqʼuin mach bʌ isujmic: i sujmlelʌch mi lac lon qʼuel pero maʼanic i cʼʌjñibal. Cheʼ jaʼel, mi mejlel i chʼʌmbeñonla tilel cabʌl wocol.
Jini mach bʌ i sujmlelic ñopbalʌl mach mejlic i tijicñesʌben i pusicʼal Jehová, jini Dios i sumjlel bʌ. Cheʼ bʌ tsajñi Jesús i la ti Lum, tsaʼ yʌlʌ i tsʌnsañob jini tsaʼ bʌ lon alʌyob mucʼob tiʼ cʌntesa chaʼan Dios. Iliyob tsiʼ lon ñaʼtayob chaʼan bajcheʼ mucʼob ti chʼujutesaya utsʼatʌch. Tsiʼ yʌlʌyob: «Juntiquil jach c Tat lojon, jiñʌch Dios». Pero ¿lajal ba tsiʼ qʼuele Jesús? Maʼanic. Jesús tsiʼ subeyob: «Jatetla i chaʼañetla Diablo. Jiñʌch laʼ tat» (Juan 8:41, 44). Ti ili qʼuin wʌle, yonlel winicob xʼixicob miʼ lon ñaʼtañob wolʌch i chʼujutesañob Dios, pero ti sujm woliʼ melbeñob i yeʼtel Satanás yicʼot i xibajob (1 Corintios 10:20).
Lajal bajcheʼ mach bʌ wenix juntejc teʼ mi yʌcʼ mach bʌ wenic i wut, jini ñopbalʌl mach bʌ isujmic miʼ pʼol winicob xʼixicob muʼ bʌ i melob chuqui mach wenic. Ili pañimil butʼulix ti wocol chaʼan mach bʌ utsʼatic woliʼ melob winicob xʼixicob. An tsʼiʼlel, jatsʼ, xujchʼ ticʼlʌntel, tsʌnsa. Yonlelob muʼ bʌ i melob bajcheʼ iliyi añob i ñopbal, pero ili ñopbalʌl maʼanic miʼ ñijcabeñob i pusicʼal chaʼan miʼ melob chuqui wen. Mach mejlicob ti sujtel ti yamigo Dios mi maʼanic miʼ cʌyob i mel chuqui mach wen (Mateo 7:17, 18).
Jini ñopbalʌl mach bʌ i sujmlelic miʼ cʌntesan winicob xʼixicob i mel oración tiʼ tojlel dios teʼ tac. Dios miʼ subeñonla chaʼan mach yomic, lac pejcan ti oración dios teʼ tac. Jini i sujmlelʌch. ¿Muʼ ba lac mulan cheʼ an majqui maʼanic miʼ pejcañonla pero mucʼʌch i chaʼlen tʼan yicʼot lac fotografía? ¿Muʼ ba i mejlel ti la camigo cheʼ jini? Maʼanic, mach mejlic. Jehová yom chaʼan miʼ pejcʌntel, mach jinic i yejtal mach bʌ cuxulic (Éxodo 20:4, 5).
Jini ñopbalʌl mach bʌ isujmic, miʼ chaʼlen cʌntesa chaʼan miʼ mejlel lac tsʌnsan yambʌ winicob xʼixicob cheʼ ti yorajlel guerra. Jesús tsiʼ yʌlʌ chaʼan jini yamigojob Dios mi caj i cʼuxbiñob i bʌ. Maʼanic mi lac tsʌnsan jini winicob xʼixicob muʼ bʌ laj cʼuxbiñob (Juan 13:35). Mi jinicto wen cheʼ mi lac tsʌnsan jini jontoloʼ bʌ. Cheʼ bʌ ora jini contrajob Jesús tsaʼ majli i chucob, maʼanic tsiʼ cʌyʌ chaʼan miʼ tilel i coltañob jini xcʌntʼañob i chaʼan (Mateo 26:51, 52).
Jini ñopbalʌl mach bʌ isujmic miʼ chaʼlen cʌntesa chaʼan jini winicob xʼixicob jontoloʼ bʌ mi caj i yubiñob wocol yaʼ ti toj mulil. Pero, jini Biblia mi yʌl chaʼan jini mulil miʼ pʌyonla majlel ti chʌmel (Romanos 6:23). Jehová jiñʌch juntiquil Dios xcʼuxbiya. ¿Muʼ ba caj i ticʼlan winicob xʼixicob ti pejtelel ora jini Dios xcʼuxbiya bʌ? Maʼanic. Yaʼ ti Paraíso junchajp jax ñopbalʌl miʼ cajel, jini ñopbalʌl utsʼat bʌ miʼ qʼuel Jehová (Apocalipsis 15:4). Pejtelel jini yan tac bʌ ñopbalʌl luʼ loqʼuem bʌ tiʼ lot Satanás, yaʼ bʌ ora jini tsaʼix luʼ jili.