CɅNTESɅNTEL 4
¿Majqui jini Jesucristo?
1. ¿Baqui tsaʼ ñaxan chumle Jesús?
¿Baqui tac bʌ i melbal Jesús miʼ pʌsbeñonla chaʼan wen uts i pusicʼal? (MATEO 11:29; MARCOS 10:13-16)
Jesús mach lajalic bajcheʼ joñonla, come tsaʼ ñaxan chumle ti panchan cheʼ bajcheʼ ángel cheʼ bʌ maxto yila pañimil (Juan 8:23). Jiñʌch ñaxam bʌ tsaʼ mejli ti Dios yicʼot jiñʌch tsaʼ bʌ i chaʼle coltaya tiʼ melol pejtelel chuqui tac an. Cojach jini tsaʼ bʌ i ñaxan mele Jioba, jin chaʼan miʼ subentel ti «cojach bʌ» i yalobil Dios (Juan 1:14). Jesús tsiʼ chaʼle eʼtel bajcheʼ i yaj ñusa tʼan Dios, jin chaʼan tsaʼ cʼoti ti cʌjñel bajcheʼ «jini Tʼan». Pejcan Proverbios 8:22, 23, 30 yicʼot Hebreos 1:2.
2. ¿Chucoch tsajni Jesús wʌʼ ti Pañimil?
Dios tsiʼ choco tilel i yalobil ila ti Pañimil, tsiʼ cʼaxtesʌbe i cuxtʌlel tiʼ matriz juntiquil xchʼoc maxto bʌ piʼlebil i chaʼan winic i cʼabaʼ María, tilem bʌ ti Judá. Jin chaʼan, i tat Jesús mach juntiquilic winic (Lucas 1:30-35). Jesús tsaʼ tili ti pañimil (1) chaʼan miʼ cʌntesañonla tiʼ sujmlel tiʼ chaʼan bʌ Dios, (2) chaʼan miʼ pʌsbeñonla bajcheʼ mi lac melben chuqui yom Dios, anquese añonla ti wocol, yicʼot (3) chaʼan miʼ yʌcʼ i cuxtʌlel bajcheʼ majtañʌl chaʼan miʼ «coltañonla loqʼuel» ti mulil. Pejcan Mateo 20:28.
3. ¿Chucoch an majqui yom miʼ toj lac mul?
Cheʼ an majqui miʼ toj lac mul, yom yʌl chaʼan an majqui mi caj i toj chaʼan maʼanic mi lac chʌmel (Éxodo 21:29, 30). Cheʼ bʌ Dios tsiʼ mele jini winicob xʼixicob, mach chaʼanic miʼ chʌmelob yicʼot miʼ ñoxʼañob. ¿Bajcheʼ mi lac ñaʼtan jini? Dios tsiʼ wʌn sube Adán, mi tsaʼ i mele «mulil» o maʼanic miʼ jacʼben i tʼan, miʼ chʌmel. Jin chaʼan, machic tsiʼ chaʼle mulil Adán, maʼanic tsaʼ chʌmi bʌ tʼan (Génesis 2:16, 17; 5:5). Cheʼ bajcheʼ miʼ yʌl ti Biblia, jini «mulil» tsaʼ ochi ti pañimil tiʼ caj Adán. Jin chaʼan, Adán tsiʼ ñusʌbe jini mulil tiʼ pejtelel i pʼolbal, jin chaʼan mi lac chʌmel. Yicʼot jaʼel, yom mi laj coltʌntel tiʼ caj jini mul tsaʼ bʌ i ñusʌbeyonla Adán. Pejcan Romanos 5:12; 6:23.
¿Majqui mi caj i toj chaʼan mi lac locʼsʌntel ti chʌmel? Cheʼ mi lac chʌmel, mi lac toj lac mul. Come ti lac pejtelel xmulilonla, mach mejlic lac tojben i mul yambʌ winicob xʼixicob. Pejcan Salmo 49:7-9.
4. ¿Chucoch tsaʼ chʌmi Jesús?
Jesús mach xmulilic, jin chaʼan mach lajalic bajcheʼ joñonla. Jesús tsaʼ chʌmi mach chaʼanic tiʼ caj i mul, come mach xmulilic yicʼot maʼanic baqui ora tsiʼ chaʼle mulil. Jesús tsaʼ chʌmi tiʼ caj lac mul. Dios tsiʼ pʌsʌ cabʌl i cʼuxbiya cheʼ tsiʼ choco tilel i yalobil chaʼan miʼ chʌmel ti laj caj. Jesús tsiʼ pʌsʌ cabʌl i cʼuxbiya jaʼel, cheʼ bʌ tsiʼ jacʼbe i tʼan i tat chaʼan miʼ chʌmel tiʼ caj lac mul. Pejcan Juan 3:16 yicʼot Romanos 5:18, 19.
Qʼuele jiñi video ¿Chucoch tsaʼ chʌmi Jesús?
5. ¿Chuqui woliʼ mel Jesús ili ora?
Cheʼ tsajni Jesús ila ti Pañimil, tsiʼ lajmesa xcʼamʌjel, tsiʼ tejchesa xchʌmelob, yicʼot tsiʼ colta añoʼ bʌ ti wocol. Bajcheʼ jini, tsiʼ pʌsʌ chaʼan cheʼʌch mi caj i mel ti talto bʌ qʼuin tiʼ tojlel winicob xʼixicob muʼ bʌ i jacʼbeñob i tʼan (Mateo 15:30, 31; Juan 5:28). Cheʼ bʌ Jesús tsaʼ chʌmi, Dios tsiʼ techeʼ chʼojyel bajcheʼ ángel (1 Pedro 3:18). Jesús tsaʼ buchle ti pijt tiʼ ñoj Jioba, jin to cheʼ tsaʼ aqʼuenti i pʼʌtʌlel chaʼan miʼ chaʼlen yumʌntel bajcheʼ Rey ti Pañimil (Hebreos 10:12, 13). Ili ora Jesús woliyix ti yumʌntel ti panchan, jin chaʼan jini xcʌntʼañob i chaʼan, woliʼ subob jini wen tʼan tiʼ pejtelel Pañimil. Pejcan Daniel 7:13, 14 yicʼot Mateo 24:14.
Mach jalix, Jesús miʼ caj i cʼʌn i pʼʌtʌlel bajcheʼ Rey chaʼan miʼ jisan jini wocol yicʼot muʼ bʌ i yʌqʼuen i yilan wocol yañoʼ bʌ. Tiʼ pejtelel muʼ bʌ i ñop Jesús yicʼot muʼ bʌ i jacʼben i tʼan, mi caj i chumtʌl ti pejtelel ora ti jumpʼejl Paraíso wʌʼ ti Pañimil. Pejcan Salmo 37:10, 11, 22.