Cʌntesʌntel 3
¿Majqui jini Jesucristo?
¿Chucoch miʼ subentel jini Jesús bajcheʼ «ñaxan» bʌ i yalobil Dios? (1)
¿Chucoch miʼ subentel «jini Tʼan»? (1)
¿Chucoch tsaʼ tili Jesús ila ti Pañimil bajcheʼ winic? (2-4)
¿Chucoch tsiʼ mele milagro tac? (5)
¿Chuqui mach jalix mi caj i mel Jesús ti tal to bʌ qʼuin? (6)
1. Cheʼ jalto tal ila ti Pañimil, Jesús chumul ti panchan cheʼʌch bajcheʼ juntiquil espíritu. Jiñʌch «ñaxan» bʌ i melbal Dios; jin chaʼan miʼ pejcʌntel ti «ñaxan bʌ i Yalobil» Dios (Colosenses 1:15). Jesús jiñʌch cojach bʌ Yalobil Dios tiʼ bajñelil bʌ tsiʼ mele. Jehová tsiʼ cʼʌñʌ Jesús cheʼ bajcheʼ «juntiquil xcoltaya» cheʼ bʌ maxto tilem ti pañimil, chaʼan miʼ mel pejtelel chuqui an ti panchan yicʼot ti Pañimil (Proverbios 8:22-31; Hebreos 1:2). Dios tsiʼ cʼʌñʌ jaʼel cheʼ bajcheʼ i yaj ñusaya tʼan ñumen wen bʌ. Yaʼ baʼ ora tsaʼ subenti Jesús «jini Tʼan» (Juan 1:14; Apocalipsis 19:13).
2. Dios tsiʼ choco tilel i Yalobil ila ti Pañimil, cheʼ bʌ tsiʼ cʼaxtesʌbe i cuxtʌlel tiʼ matriz María. Jini chaʼan Jesús mach juntiquilic winic i tat; jin chaʼan maʼanic tsiʼ yila pañimil yicʼot mulil. Dios tsiʼ choco tilel Jesús ila ti Pañimil uxchajp i cʼʌjñibal: 1) chaʼan miʼ cʌntesañonla tiʼ sujmlel Dios (Juan 18:37), 2) chaʼan miʼ pʌs i xucʼtʌlel toj bʌ tiʼ pejtelel, cheʼ bajcheʼ jini tsiʼ yʌqʼueyonla wen bʌ i melbal chaʼan mi lac lajin (1 Pedro 2:21) i 3) chaʼan mi yʌcʼ i cuxtʌlel bajcheʼ majtañʌl chaʼan miʼ coltañonla loqʼuel ti mulil yicʼot ti chʌmel. ¿Chucoch wersa mi yʌcʼ i cuxtʌlel bajcheʼ majtañʌl? (Mateo 20:28.)
3. Cheʼ bʌ tsiʼ ñusʌbe i mandar Dios, jini ñaxan bʌ winic, Adán, tsaʼ yajli ti «mulil» cheʼ bajcheʼ mi yʌl jini Biblia. Jini chaʼan Dios tsiʼ sube chaʼan mi caj i chʌmel (Génesis 3:17-19). Come maʼanix tsiʼ chʌn jacʼbe i mandar Dios, tsaʼ sujti ti xmulil. Cʼunteʼ cʼunteʼ tsaʼ ñoxʼa majlel ti wiʼil tsaʼ chʌmi. Adán tsiʼ cʼaxtesʌbe mulil pejtelel i yalobilob. Jini chaʼan joñonla jaʼel mi lac ñoxʼan, mi laj cʼamʼan yicʼot mi lac chʌmel. ¿Bajcheʼ miʼ mejlel ti colelob jini winicob xʼixicob? (Romanos 3:23; 5:12.)
4. Jesús jiñʌch juntiquil winic mach bʌ anic i mul lajal bajcheʼ Adán. Pero qʼuexel tsaʼ qʼuejli bajcheʼ Adán, come tsʼʌcʌl tsiʼ jacʼbe i tʼan Dios, yicʼot cheʼ baʼ ora tsiʼ ñusa tsʌts tac bʌ yilʌbentel i pusicʼal. Jini chaʼan tsaʼ mejli yʌcʼ i cuxtʌlel mach bʌ yicʼotic mulil, chaʼan miʼ tojben i mul Adán. Jini Biblia miʼ suben cheʼ bajcheʼ jini tsaʼ ujti «toj mulil». Cheʼ bajcheʼ jini, i yalobilob Adán tsaʼ mʌjñiyob loqʼuel tiʼ pʼʌtʌlel chʌmel. Pejtelel jini muʼ bʌ i ñopob Jesús mi mejlel i tajob i ñusʌntel i mul yicʼot i cuxtʌlel mach bʌ anic miʼ jilel (1 Timoteo 2: 5, 6; Juan 3:16; Romanos 5:18, 19).
5. Cheʼ bʌ tsajñi Jesús ila ti Pañimil, tsiʼ lajmesa xcʼamʌjelob, tsiʼ weʼ sa winicob xʼixicob añoʼ bʌ i wiʼñal yicʼot tsiʼ ñʌchʼchoco icʼ jaʼal. Yicʼot tsaʼ to i teche chʼojyel chʌmeñoʼ bʌ. ¿Chucoch tsiʼ mele milagro tac? 1) Come tsiʼ pʼunta jini winicob xʼixicob woli bʌ i ñusañob wocol i yomʌch i coltañob. 2) Jini milagro tac tsaʼ bʌ i mele tsiʼ yʌcʼʌ ti cʌjñel chaʼan jiñʌch i Yalobil Dios. 3) Tsiʼ wʌn pʌsʌ chuqui mi caj i mel tiʼ tojlel jini añoʼ bʌ ti pañimil xjacʼtʼañoʼ bʌ, cheʼ baʼ ora miʼ chaʼlen yumʌntel bajcheʼ Rey ila ti Pañimil (Mateo 14:14; Marcos 2:10-12; Juan 5:28, 29).
6. Jesús tsaʼ chʌmi, Dios tsiʼ chaʼ teche chʼojyel cheʼix bajcheʼ juntiquil espíritu, i tsaʼ chaʼ sujti majlel ti panchan (1 Pedro 3:18). Cheʼ jini Dios tsiʼ waʼchoco ti Rey. Jesús lʌcʼʌlix mi caj i jisan ti pejtelel jini jontolil yicʼot jini wocol am bʌ ila ti Pañimil (Salmo 37:9-11; Proverbios 2:21, 22).
[Dibujo yaʼ ti iyopol 7]
Cheʼ bajcheʼ yambʌ yeʼtel, Jesús tsiʼ chaʼle cʌntesa tsiʼ mele milagro tac yicʼot tsaʼ to yʌcʼʌ i cuxtʌlel chaʼañonla