¿Chucoch tsiʼ yila wocol yicʼot tsaʼ chʌmi Jesús?

¿Muʼ baʼ mulan chumtʌl tiʼ pejtelel ora? Tajol cabʌl mi caj i yʌlob chaʼan anquese mach yomobic chʌmel, pero maʼañic chuqui miʼ mejlel i melob. Miʼ yʌlob chaʼan tsaʼ mejliyonla chaʼañʌch mi lac chʌmel, i yaʼ jaxʌl mi la cujtel.

Pero ¿ixcu muqʼuic laj qʼuextan ili cʼajtiya? Mi laj cʼajtin, ¿a wom ba chʌmel waʼli? Mi utsʼat añonla, maʼañic majqui mi caj i yʌl chaʼan yomʌch. Anquese añonla ti wocol, mi lac chaʼlen wersa chaʼan chʌn cuxulonla. Jiñi Biblia miʼ yʌl chaʼan Dios tsiʼ meleyonla chaʼan mi lac chumtʌl tiʼ pejtelel ora.

Pero ti isujm, mucʼʌch lac chʌmel. Cheʼ jiñi, ¿chuqui tsaʼ ujti? ¿Am ba chuqui tsiʼ mele Dios chaʼan miʼ tojʼesan? I jacʼbal muʼ bʌ i yʌcʼ jiñi Biblia miʼ pʼʌtʼesañonla i yaʼ ochem chaʼan chucoch tsiʼ yila wocol yicʼot tsaʼ chʌmi Jesús.

¿CHUQUI TSAʼ UJTI?

Jiñi ñaxam bʌ uxpʼejl capítulo i chaʼan Génesis miʼ yʌl chaʼan Dios tiʼ sube Adán yicʼot Eva chaʼan miʼ mejlelob ti chumtʌl tiʼ pejtelel ora yicʼot chuqui yom bʌ miʼ melob chaʼan miʼ tajob. Miʼ taj ti tʼan jaʼel chaʼan maʼañic tsiʼ jacʼʌyob i tsiʼ sʌtʌyob tsaʼ bʌ subentiyob ti Dios. Come mach wocolic bajcheʼ miʼ tsictesʌntel, jin chaʼan miʼ cʼotel i ñaʼtañob chaʼan jumpʼejl jach cuento. Pero jiñi libro i chaʼan Génesis tsʼʌcʌlʌch chuqui miʼ yʌl cheʼ bajcheʼ yom miʼ tsʼijbuntel, lajal bajcheʼ jiñi Evangelio tac.a

¿Chuqui bʌ wocol tsiʼ chʼʌmʌ tilel jiñi i ñusatʼan Adán? Jiñi Biblia miʼ yʌl: «Tsaʼ ochi mulil ti pañimil chaʼan tiʼ mul juntiquil winic i cʼabaʼ Adán. Jini mulil tsiʼ yʌcʼʌ ti chʌmel pejtel winicob xʼixicob. Jini chaʼan mi lac chʌmel ti lac pejtelel, come tsaʼ lac chaʼle mulil ti lac pejtelel» (Romanos 5:12). Adán tsiʼ chaʼle mulil cheʼ maʼañic tsiʼ jacʼbe i tʼan Dios. Cheʼ jiñi, tsiʼ sʌtʌ chaʼan chumtʌl tiʼ pejtelel ora, ti wiʼil tsaʼ ñoxʼa i tsaʼ chʌmi. Come i pʼolbalonla, laj xmulilonla yicʼot cheʼʌch mi la cujtel jaʼel bajcheʼ jiñi. Jin chaʼan, mi laj cʼamʼan, mi lac ñoxʼan yicʼot mi lac chʌmel. Iliyi lajalʌch bajcheʼ cʼotem ti ñaʼtʌntel ili ora, chaʼan an chuqui mi lac locʼbeñob lac tat lac ñaʼ cheʼ mi la quilan pañimil. Laʼ laj qʼuel chuqui tsiʼ mele Dios chaʼan miʼ tojʼesan jiñi wocol.

¿CHUQUI TSIʼ MELE DIOS?

Jehová tsiʼ ñaʼta chuqui mi caj i mel chaʼan miʼ chaʼ tajtʌl tsaʼ bʌ i sʌtʌ Adán i jiñi i pʼolbalob miʼ mejlelob ti chumtʌl tiʼ pejtelel ora. ¿Bajcheʼ tsiʼ mele?

Jiñi Biblia miʼ yʌl chaʼan «jini muʼ bʌ i chaʼleñob mulil wersa miʼ chʌmelob, jiñʌch i tojol» (Romanos 6:23). I wocolel jiñi mulil jiñʌch chʌmel. Adán tsaʼ chʌmi. Come xmulilonla jaʼel, jin chaʼan mi lac chʌmel. Pero Dios tsiʼ pʌsbeyonla i yutslel i pusicʼal come mach lac mulic tsaʼ bʌ ujti yaʼ ti Edén, jin chaʼan tsiʼ choco tilel i yalobil, Jesucristo, chaʼan miʼ toj lac mul. ¿Chucoch?

Cheʼ bʌ Adán tsiʼ chaʼle ñusatʼan, juntiquil mach bʌ xmulilic, ti lac pejtelel tsaʼ cʌle la quicʼot jiñi mulil yicʼot chʌmel, jin chaʼan, wersa yom yambʌ wiñic mach bʌ xmulilic xucʼul bʌ miʼ yajñel jinto miʼ chʌmel chaʼan miʼ toj lac mul. Jiñi Biblia miʼ tsictesan: «Come cabʌlob tsaʼ qʼuejliyob ti mulil chaʼan tsiʼ ñusa mandar Adán. Cheʼ jaʼel cabʌlob miʼ qʼuejlelob ti toj chaʼan tsiʼ jacʼʌ mandar Cristo» (Romanos 5:19). Jesús jiñʌch tsaʼ bʌ i jacʼʌ jiñi mandar come tsiʼ cʌyʌ i yajñib yaʼ ti panchan, juntiquilʌch toj bʌ wiñicb yicʼot tsaʼ chʌmi ti laj caj. Cheʼʌch miʼ mejlel i qʼuelonla ti toj Dios yicʼot mi lac chaʼ mejlel ti chumtʌl tiʼ pejtelel ora.

¿CHUCOCH TSIʼ YILA WOCOL YICʼOT TSAʼ CHɅMI JESÚS?

Pero ¿chucoch wersa miʼ chʌmel Jesús chaʼan miʼ tajtʌl iliyi? ¿Maʼañic ba tsaʼ mejli i yʌcʼ jumpʼejl mandar Dios baqui miʼ yʌl chaʼan miʼ mejlelob ti chumtʌl tiʼ pejtelel ora i pʼolbal Adán? Anquese mucʼʌch, pero tsaʼic i mele tsiʼ ñusa ti pʼis jiñi mandar tsaʼ bʌ i yʌcʼʌ chaʼan i tojol mulil jiñʌch chʌmel. Mach jumpʼejl jach mandar maʼañic bʌ i cʼʌjñibal o muʼ bʌ mejlel laj qʼuextan bajcheʼ jach la com. Jiñi mandar ñucʌch i cʼʌjñibal chaʼan miʼ mejlel chuqui toj (Salmo 37:28).

Cheʼ tsaʼic i ñusa ti pʼis ti jiñi bʌ ora, tajol an muʼto bʌ i cʼajtibeñob i bʌ mi muqʼuix to i chaʼ mel bajcheʼ jiñi. Jumpʼejl ejemplo, ¿utsʼat ba mi caj i mel cheʼ bʌ mi caj i yʌl majqui jach muʼ bʌ caj i chumtʌlob tiʼ pejtelel ora? ¿Muʼ ba caj i tsʼʌctesan tiʼ pejtelel albil bʌ i chaʼan? Dios tsiʼ chʼʌmʌ ti ñuc i mandar chaʼan miʼ mejlel lac taj laj cuxtʌlel, ili miʼ yʌqʼueñonla lac ñop chaʼan tiʼ pejtelel ora mi caj i mel chuqui toj.

Dios tsiʼ yʌcʼʌ ti chʌmel i Yalobil chaʼan mi lac chaʼ mejlel ti chumtʌl tiʼ pejtelel ora ti paraíso. Jesucristo tsiʼ yʌlʌ: «Come cheʼi tsiʼ wen cʼuxbi jini añoʼ bʌ ti pañimil Dios. Tsiʼ yʌcʼʌ cojach bʌ i Yalobil. Majqui jach miʼ ñop i Yalobil, maʼanic miʼ sajtel. Miʼ taj i cuxtʌlel mach bʌ anic miʼ jilel» (Juan 3:16). Cheʼ bʌ tsaʼ chʌmi Jesús, mach cojach miʼ pʌsbeñonla chaʼan tojʌch Dios, miʼ pʌsbeñonla chaʼan miʼ wen cʼuxbiñonla.

Pero maxto jacʼbilic ili cʼajtiya: ¿Chucoch tsiʼ wen ila wocol yicʼot tsaʼ chʌmi Jesús? Cheʼ tsiʼ cuchu ili tsʌts bʌ ticʼlʌntel chaʼan miʼ pʌs miʼ jacʼ tʼan, tsiʼ pʌsʌ chaʼan jumpʼejlʌch lot cheʼ bʌ tsiʼ yʌlʌ Satanás chaʼan maʼañic majqui xucʼul mi caj i yajñel cheʼ bʌ miʼ ñusan tsʌts bʌ wocol (Job 2:4, 5). Cheʼ bʌ jiñi Diablo tsiʼ yʌcʼʌ chaʼan miʼ chaʼlen ñusatʼan jiñi ñaxam bʌ wiñic mach bʌ xmulilic, isujmʌch yubil tsaʼ bʌ i yʌlʌ. Pero Jesús, juntiquil mach bʌ xmulilic jeʼel, tsiʼ chʌn jacʼʌ tʼan anquese tsiʼ ñusa tsʌts tac bʌ wocol (1 Corintios 15:45). Cheʼʌch tsiʼ pʌsʌ chaʼan cheʼic yom Adán jaʼel, tsiʼ jacʼbe i tʼan Dios. Cheʼ jeʼel, tsiʼ pʌsbeyonla cʌytʌl chaʼan cheʼʌch yom mi lac mel (1 Pedro 2:21). Dios tsiʼ yʌqʼue i majtan i Yalobil chaʼan tsiʼ jacʼbe i tʼan yicʼot tsiʼ yʌqʼue i cuxtʌlel ti panchan baqui maʼañix mi caj i chʌmel.

¿BAJCHEʼ MIʼ COLTAÑET ILIYI?

Jesús tsaʼʌch chʌmi yicʼot tsiʼ jambeyonla jiñi bij chaʼan laj cuxtʌlel mach bʌ añic miʼ jilel. Jin chaʼan mic chaʼ melbeñet lon ili cʼajtiya: ¿A wom ba chumtʌl tiʼ pejtelel ora? Jesús tsiʼ subeyonla chuqui yom mi lac mel: «Jiñʌch i cuxtʌlel mach bʌ anic miʼ jilel, cheʼ miʼ cʌñetob jini mero Dios, jini cojach bʌ, yicʼot Jesucristo, tsaʼ bʌ a choco tilel» (Juan 17:3).

Muʼ bʌ c mel lojon ili revista mic subeñet lojon chaʼan maʼ cʌn jiñi isujm bʌ Dios, Jehová, yicʼot i Yalobil, Jesucristo. Jiñi i testigojob Jehová añoʼ bʌ yaʼ baqui chumulet mi caj i coltañetob. Cheʼ jaʼel, mi caj a ñumen taj cʌntesʌntel yaʼ ti página chaʼan Internet, www.jw.org/ctu.