TEMAJ AM BɅ TIʼ TEJCHIBAL | ¿CHUCOCH TSIʼ YILA WOCOL YICʼOT TSAʼ CHɅMI JESÚS?
¿Tiʼ sujm ba tsaʼ ujti?
Jesús chʼoyol bʌ ti Nazaret, tsaʼ tsʌnsʌnti cheʼ ti jabil 33. Tsaʼ jopʼbenti i mul chaʼan tsiʼ contraji yumʌlob, tsiʼ wen jatsʼʌyob yicʼot tsiʼ chʼijiyob (bajayob) ti juntsʼijt teʼ, baqui tsiʼ wen ila wocol cʼʌlʌl tsaʼ chʌmi. Pero Dios tsiʼ chaʼ cuxtesa, tsaʼ ñumi 40 qʼuin, i tsaʼ chaʼ majli ti panchan.
Ili tsaʼ bʌ ujti miʼ tsictesʌntel ti jiñi chʌmpʼejl Evangelio yaʼ ti Nuevo Testamento, o Tsʼijbujel Griego. Pero ¿tiʼ sujm ba tsaʼ ujti jiñi? Ili wen ñuc bʌ cʼajtiya yom i jacʼbal, come cheʼ jumpʼejlic jach cuento, jiñi lac ñopoñel (chʼujbiya) ti Dios maʼañic i cʼʌjñibal yicʼot jumpʼejl jach ñajal yubil jiñi lac pijtaya chaʼan chumtʌl tiʼ pejtelel ora ti jumpʼejl paraíso (1 Corintios 15:14). Pero miʼ sujmʌch jiñi, choncol lac pijtan jumpʼejl wem bʌ ajñibʌl. Jin chaʼan, ¿isujm ba jiñi muʼ bʌ lac taj yaʼ ti Evangelio tac o toʼol tʼan jach?
MUʼ BɅ I YɅL JIÑI HISTORIA
Wen xucʼul tsaʼ qʼuejli cheʼ bʌ tsaʼ tsʼijbunti jiñi Evangelio tac, mach cheʼic bajcheʼ jiñi leyenda tac. Jumpʼejl ejemplo, miʼ yʌl i cʼabaʼ quixtañujob yicʼot tejclum tac muʼto bʌ i julaʼtʌntel ili ora, i jiñi yujiloʼ bʌ chaʼan historia miʼ yʌlob chaʼan cheʼʌchi (Lucas 3:1, 2, 23).
An xtsʼijbayajob tsaʼ bʌ chumleyob cheʼ woliʼ ñumel jiñi jabil 1 cʼʌlʌl ti 200, tsaʼ bʌ i yʌlʌyob chaʼan Jesús.a Cheʼʌch tsaʼ tsʌnsʌnti cheʼ bajcheʼ miʼ melob jiñi romanojob ti jiñi bʌ ora, cheʼ bajcheʼ miʼ tsictesʌntel yaʼ ti Evangelio tac. Cheʼ jaʼel, añʌch chucoch cheʼ tsaʼ tsʼijbunti tsaʼ bʌ ujti tac yicʼot i sujmlelʌch, yicʼot muʼto i yʌjlel mach bʌ weñic tsiʼ mele jiñi xcʌntʼañob (Mateo 26:56; Lucas 22:24-26; Juan 18:10, 11). Ili miʼ pʌsbeñonla chaʼan i sujmʌch tsaʼ bʌ i tsʼijbuyob jiñi Evangelio yicʼot tojʌch tsaʼ bʌ i yʌlʌyob chaʼan Jesús.
¿TSAʼ BA CHAʼ TEJCHI JESÚS?
Anquese yonlel miʼ ñopob chaʼan Jesús isujmʌch, pero an maʼañic bʌ miʼ ñopob chaʼan tsaʼʌch chaʼ tejchi. Jinto jiñi i apóstolob maʼañic tsiʼ ñopoyob ti ñaxan (Lucas 24:11). Pero jiñi apóstolob yicʼot yambʌ xñoptʼañob xucʼu xucʼul tsaʼ caji i ñopob cheʼ bʌ tsiʼ qʼueleyob Jesús, anquese mach luʼ ti jiñic jach bʌ ora. Ti jumpʼejl bʌ qʼuin, ñumen ti 500 jiñi tsaʼ bʌ i qʼueleyob (1 Corintios 15:6).
Jiñi xcʌntʼañob, anquese miʼ mejlelob ti chujquel yicʼot i sʌtob i cuxtʌlel, tsiʼ subeyob yicʼotob i chʼejlel tiʼ pejtelel jiñi quixtañu, yicʼot to jiñi yomoʼ bʌ tsʌnsa, chaʼan Jesús tsaʼix chaʼ chʼojyi (Hechos 4:1-3, 10, 19, 20; 5:27-32). ¿Tsaʼ ba i meleyob jiñi mi maʼañic tsiʼ wen ñopoyob chaʼan tsaʼʌch chaʼ tejchi Jesús? Maʼañic. Come cabʌl tsaʼ bʌ i ñopoyob chaʼan Jesús tsaʼʌch chaʼ tejchi, ili an i colta chaʼan miʼ bej pʼojlel majlel jiñi xñoptʼañob ili ora.
Muʼ bʌ i yʌjlel yaʼ ti Evangelio tac chaʼan cheʼ bʌ tsaʼ chʌmi Jesús yicʼot tsaʼ chaʼ tejchi tsʼʌcʌl tsaʼ tsʼijbunti yicʼot miʼ mejlel lac ñop. Cheʼ maʼ pejcan iliyi, mi caj a ñop chaʼan tsaʼʌch ujti jiñi muʼ bʌ i yʌjlel. Pero muʼ bʌ caj i ñumen coltañet jiñʌch cheʼ maʼ chʼʌmben isujm chucoch tsaʼ ujti. Jiñi yambʌ temaj mi caj i tsictesan.
a Tácito, tsaʼ bʌ i yila pañimil (chʼocʼa) cheʼ choncol i ñumel jiñi jabil 55, tiʼ tsʼijbu: «Cristo, cheʼ bʌ i cʼabaʼ tsiʼ subeyob jiñi xñoptʼañob, tsaʼ tsʌnsʌnti tiʼ yumʌntel Tiberio cheʼ bʌ jin gobernador Poncio Pilato». Yañoʼ bʌ tsaʼ bʌ i tsʼijbuyob chaʼan Jesús jiñʌch muʼ bʌ i tsʼijbuñob chaʼan historia i cʼabaʼ Suetonio chʼoyol bʌ ti Roma yicʼot jiñi judío Josefo (cheʼ ti ñaxam bʌ siglo), yicʼot jiñi cʌmbil bʌ bajcheʼ Plinio el Joven, gobernador bʌ ti Bitinia (tiʼ tejchibal jiñi jabil 101-200).