Samuel tsiʼ chʌn mele chuqui yom bʌ Jehová

Samuel yaʼ tsaʼ chumle yicʼot tiʼ chaʼle eʼtel (troñel) ti Tabernáculo cheʼ bʌ alʌ chʼiton to. Jiñi Tabernáculo jiñʌch baqui miʼ chʼujutesʌntel Jehová. ¿A wom baʼ ñaʼtan chucoch tsaʼ chumle Samuel yaʼi? Chaʼan maʼ tajben i jacʼbal, laʼ lac ñaxan qʼuel majqui i mamá. I cʼabaʼ jiñʌch Ana.

Ana tiʼ pejtelel ora tsiʼ mulaj yʌcʼ yalobil pero maʼañic miʼ mejlel. Jin chaʼan, tiʼ cʼajtibe Jehová ti oración: «A wocolic, Jehová, coltañon». I tsiʼ yʌqʼue i tʼan: «Mi mucʼʌch c taj calobil, mi caj c choc majlel ti chumtʌl yicʼot ti eʼtel yaʼ ti Tabernáculo». Jehová tsaʼʌch i jacʼbe i yoración, cheʼ jiñi Ana tsaʼ mejli yʌcʼ ti pañimil yalobil. I tsiʼ yotsʌbe i cʼabaʼ Samuel. Cheʼ bʌ añix uxpʼejl o chʌmpʼejl i jabilel, Ana tiʼ tsʼʌctesa i tʼan i tiʼ pʌyʌ majlel ti Tabernáculo chaʼan miʼ melben i yeʼtel Dios.

Jiñi ñuc bʌ motomaj yaʼ ti Tabernáculo jiñʌch Elí. Jiñi chaʼtiquil ñucobix bʌ yalobil, yaʼʌch mucʼob ti troñel jaʼel. Ti jiñi Tabernáculo miʼ chʼujutesʌntel Jehová, jin chaʼan yom wen i melbalob jiñi yaʼ bʌ añob yaʼi. Pero Samuel tiʼ qʼuele chaʼan jiñi i yalobilob Elí mach weñobic i melbal. ¿Tsaʼ ba i mele mach bʌ utsʼatic Samuel cheʼ bajcheʼ jiñi chaʼtiquilob?... Maʼañic, Samuel tsiʼ chʌn mele chuqui yom bʌ Jehová cheʼ bajcheʼ tsaʼ cʌntesʌnti tiʼ papá yicʼot tiʼ mamá.

¿Chuqui i wentʌlel tsiʼ mele jiñi Elí maʼ wʌl?... Isujmʌch, cʼʌñʌl tsaʼic i tojʼesayob. I wentʌlel Elí maʼañix tsiʼ yʌcʼʌyob ti troñel i yalobilob yaʼ ti Tabernáculo. Pero maʼañic chuqui tsiʼ mele. Jin chaʼan, Jehová tsaʼ michʼa yicʼot ti yuxticlelob i ti yʌqʼueyob i tojob i mul.

Jumpʼej bʌ acʼʌlel, Samuel tsaʼ pejcʌnti cheʼ bʌ woli (choncol) ti wʌyel. «¡Samuel!», cheʼ yʌlol. Ti ajñel tsaʼ majli baʼan Elí, pero Elí tiʼ sube: «Maʼañic tsac pʌyʌyet». Cheʼʌch tsiʼ yubi yambʌ chaʼyajl bajcheʼ jiñi. Pero tiʼ yuxyajlel, Elí tiʼ sube Samuel: «Mi tsiʼ chaʼ pejcayetob, jacʼʌ: ‹Subeñon Jehová. Wolic ñʌchʼtañet›». Cheʼ bʌ Samuel tsiʼ yʌlʌ bajcheʼ jiñi, Jehová tsiʼ sube: «Suben Elí chaʼan mi caj cʌqʼueñob i toj i mul i yalobilob chaʼan tiʼ pejtelel chuqui tsiʼ meleyob». ¿Cʼun ba ti yubi Samuel chaʼan miʼ suben Elí jiñi tʼan?... Mach cʼuñic. Samuel tsaʼʌch i bʌcʼña i suben Elí jiñi tʼan. Pero tsiʼ jacʼbe i tʼan Jehová i tsaʼʌch i sube. Jiñi tsaʼ bʌ yʌlʌ Jehová tsaʼʌch tsʼʌctiyi: Elí yicʼot jiñi yalobilob, tsaʼ chʌmiyob ti wiʼil.

Cabʌl chuqui miʼ mejlel laj cʌn tiʼ tojlel Samuel. Anquese tiʼ qʼuele jiñi yambʌlob ti mel jontolil pero Samuel tsiʼ chʌn mele chuqui yom bʌ Jehová. ¿Muʼ ba caj a mel bajcheʼ Samuel? ¿Muʼ ba caj a chʌn jacʼben i tʼan Jehová? Mi mucʼʌch a mel, wen tijicña mi caj yubin Jehová, cheʼ jaʼel a papá yicʼot a mamá.