Juan miʼ chaʼlen ñajal

Cheʼ bʌ yaʼan ti cárcel jiñi apóstol Juan yaʼ ti isla am bʌ ti Patmos, Jesús tsiʼ pʌsbe ti 16 ñajal chuqui mi caj i yujtel ti talto bʌ qʼuin. Juan tsiʼ qʼuele bajcheʼ mi caj sʌqʼuesʌntel i cʼabaʼ Jehová, bajcheʼ mi caj i tilel i Yumʌntel yicʼot bajcheʼ mi caj i mejlel chuqui yom wʌʼ ti pañimil, cheʼ bajcheʼ yaʼ ti panchan.

Juan tsiʼ qʼuele Jehová yaʼ ti ñuc bʌ i buchlib ti panchan. Tiʼ joytʌlel i buchlib an 24 ancianojob. Lʌpʌl i chaʼañob sʌsʌc bʌ pisil yicʼot corona melbil (pʌtbil) bʌ ti oro. Yaʼ tiʼ buchlib Dios, tsaʼ loqʼui cheʼ bʌ i cʼʌcʼal chajc i tiʼ subu i bʌ cheʼ bʌ i juʼucñiyel chajc. Tsiʼ lij chocoyob i bʌ tiʼ tojlel Jehová jiñi 24 ancianojob yicʼot miʼ chʼujutesañob. Ti yambʌ i ñajal, tsiʼ qʼuele yonlel wiñicob xʼixicob, tilemoʼ bʌ tiʼ pejtelel tejclum tac yicʼot yujiloʼ bʌ yambʌ tʼan i tsiʼ chʼujutesañob Jehová. Jiñi Tiñʌmeʼ jiñʌch Jesús, tsiʼ cʌnta jiñi yonlel wiñicob xʼixicob yicʼot tsiʼ pʌsbeñob majlel i bijlel jiñi jaʼ chaʼan bʌ i cuxtʌlelob. Ti yambʌ i ñajal, Jesús tsaʼ caji ti yumʌntel cheʼ bajcheʼ rey yaʼ ti panchan yicʼot jiñi 24 ancianojob. Ti yambʌ i ñajal, tsiʼ qʼuele chaʼan Jesús woli (yʌquel) ti guerra yicʼot Ajin, ili jiñʌch Satanás yicʼot i xibajob. Jesús tsiʼ locʼsa ti panchan i tsiʼ choco jubel.

Ti wiʼil, Juan tsiʼ qʼuele jiñi Tiñʌmeʼ yicʼot jiñi 144 mil waʼaloʼ bʌ yaʼ ti wits Sión. Tsiʼ qʼuele jaʼel juntiquil ángel woli bʌ ti wejlel ñumel tiʼ pejtelel pañimil yicʼot woli bʌ i yʌl: «Jacʼbenla i tʼan Dios yicʼot aqʼuenla i ñuclel».

Ti yambʌ i ñajal, tsiʼ qʼuele jiñi guerra Armagedón. Ti jiñi guerra, Jesús yicʼot i soldadojob tsiʼ jisʌbeyob i pañimil Satanás. Ti cojix bʌ i ñajal, tsiʼ qʼuele yaʼ ti panchan yicʼot wʌʼ ti lum chaʼan juntemelix añob yicʼot chaʼan ñʌchʼʌlix chumulob jiñi wiñicob xʼixicob (quixtañujob). Tsiʼ qʼuele jaʼel bajcheʼ woli i jisʌntel Satanás yicʼot i wiñicob. Ti panchan yicʼot wʌʼ ti lum, tsiʼ qʼueleyob ti chʼujul i cʼabaʼ Jehová yicʼot tsiʼ chʼujutesayob.