CɅNTESɅNTEL 20

Ujtesan ti wen a tʼan

Eclesiastés 12:13, 14

YOM BɅ MIʼ CɅJÑEL: Tiʼ yujtibal jiñi a tʼan, coltan jiñi woli bʌ i ñʌchʼtañetob chaʼan miʼ chʼʌmob ti ñuc yicʼot miʼ melob tsaʼ bʌ i cʌñʌyob.

Jiñi i yujtibal a tʼan yom miʼ taj i bʌ yicʼot jiñi temaj. Chaʼ alʌ jiñi temaj yicʼot jiñi ñuc tac bʌ i cʼʌjñibal o cʼʌñʌ yambʌ tʼan tac chaʼan maʼ cʼajtesʌbeñob.
Ñijcʌben i pusicʼal jiñi woli bʌ i ñʌchʼtañetob. Pʌsbeñob chuqui yom miʼ melob yicʼot chucoch weñʌch cheʼ miʼ melob. Chaʼlen tʼan ti isujm yicʼot pʌsʌ chaʼan mucʼʌch a ñop woli bʌ a wʌl.
Ujtesan ti tsʼitaʼ jach bʌ tʼan yicʼot ti mach bʌ wocolic. Mach a wotsan yan tac bʌ ñuc bʌ i cʼʌjñibal. Ti mach bʌ cabʌlic tʼan, coltañob chaʼan miʼ jacʼob woli bʌ i cʌñob.

Cheʼ bʌ woli a wujtesan a tʼan mach yomic ora maʼ mel yicʼot mach a juʼsan majlel jiñi a tʼan. Ti jiñi cojix bʌ a tʼan tac yom maʼ pʌs chaʼan woliyix a wujtesan a discurso.