CɅNTESɅNTEL 14

Alʌ jiñi ñuc tac bʌ i cʼʌjñibal

Hebreos 8:1

YOM BɅ MIʼ CɅJÑEL: Coltan jiñi yaʼ bʌ tempʌbilob chaʼan miʼ tsajcañob majlel jiñi a discurso i yom wen tsiquil bajcheʼ jiñi ñuc tac bʌ i cʼʌjñibal miʼ taj i bʌ yicʼot jiñi temaj, i yicʼot jiñi a wom bʌ a taj.

¿BAJCHEʼ MI LAC MEL?

Ñaʼtan chuqui a wom a taj. Ñaʼtan mi yaʼ ti a discurso an jach chuqui a wom a tsictesan, an chuqui a wom a wʌqʼueñob i ñop o a wom a ñijcʌbeñob i pusicʼal, i jiñʌch yom maʼ ñaʼtan cheʼ bʌ maʼ chajpan a bʌ. Wen qʼuele chaʼan jiñi jujunchajp ñuc bʌ i cʼʌjñibal miʼ coltan jiñi a wom bʌ a taj.

Cʼajtiben a bʌ: «¿Chuqui ti cʼajtiya tac miʼ mejlel i melbeñoñob chaʼan jiñi temaj? ¿Baqui bʌ mi caj i ñaxan cʼajtiñob?». Cheʼ jiñi, yom belecña bajcheʼ maʼ chajpan a bʌ chaʼan miʼ mejlel i tsajcañob majlel, i chʼʌmbeñob isujm yicʼot miʼ jacʼob.
Wen alʌ i temajlel a discurso. Cʼʌñʌ tʼan tac ñuc bʌ i cʼʌjñibal o yan tac bʌ lajal bʌ i sujmlel yaʼ ti a discurso chaʼan maʼ cʼajtesan jiñi temaj woli bʌ a tsictesan.
Yom tsiquil maʼ tsictesan jiñi ñuc tac bʌ i cʼʌjñibal yicʼot ti mach bʌ wocolic bʌ tʼan. Yajcan jiñi ñuc tac bʌ i cʼʌjñibal muʼ bʌ i taj i bʌ yicʼot jiñi temaj yicʼot muʼ bʌ i mejlel a tsictesan cheʼ bajcheʼ cʼamel aqʼuebilet i yorajlel. Yajcan jiñi ñuc tac bʌ i cʼʌjñibal yicʼot wen tsictesan ti jujunchajp. Jumucʼ cʌyʌ tʼan cheʼ bʌ mi caj a tsictesan junchajp, mach ti orajic jach yom maʼ cʼaxel ti yambʌ.

Cheʼ woli a tech jiñi cʌntesa, miʼ mejlel a wʌl jiñi ñuc tac bʌ i cʼʌjñibal chaʼan maʼ coltañob i tsajcan o miʼ mejlel a chaʼ al cheʼ bʌ ujtelix muqʼuet chaʼan miʼ cʼajtesañob.