Chaʼ ñaʼtan jiñi ñuc tac bʌ i cʼʌjñibal

¿Wocol ba maʼ wubin chaʼan maʼ cʼajtesan jiñi ujtel jaxto bʌ a pejcan? Ti lac pejtelel an i tajol cheʼʌch mi la cujtel. ¿Chuqui miʼ mejlel i coltañet? Jiñʌch cheʼ maʼ chaʼ ñaʼtan jiñi ñuc tac bʌ i cʼʌjñibal.

Cheʼ bʌ an chuqui woli a pejcan, cʌyʌ jumucʼ i ñaʼtan chuqui jiñi woli bʌ a cʌn. Jiñʌch tsaʼ bʌ i yʌlʌ jiñi apóstol Pablo chaʼan yom miʼ melob jiñi hermanojob cheʼ woliʼ pejcañob i carta, tiʼ subeyob: «Jiñi ñumen ñuc bʌ i cʼʌjñibal ti jiñi woli bʌ la cʌl jin iliyi» (Heb. 8:1). Yicʼot ili tʼan tac, Pablo tsiʼ colta jiñi hermanojob chaʼan miʼ chʼʌmbeñob i sujm jiñi woli bʌ i yʌl.

Cheʼ bʌ maʼ chaʼlen estudio i wolix a wujtel, tajol miʼ mejlel a cʼʌn 10 minuto chaʼan maʼ chaʼ ñaʼtan jiñi ñuc tac bʌ i cʼʌjñibal. Mi mach wen cʼajalic a chaʼan, miʼ mejlel a chaʼ pejcan jiñi subtítulo tac o i tejchibal jujumpʼejl párrafo. Cheʼ an chuqui tsijiʼ bʌ maʼ cʌn, ñopo a tsictesan ti a bajñel tʼan. Mi mucʼʌch a chaʼ ñaʼtan jiñi ñuc tac bʌ i cʼʌjñibal, mi caj i mejlel a cʼajtesan jiñi woli bʌ a cʌn. I cheʼ jaʼel, mi caj i coltañet chaʼan maʼ ñaʼtan bajcheʼ miʼ mejlel a cʼʌn ti a cuxtʌlel.