CɅNTESɅNTEL 05
Muʼ bʌ i yʌl jiñi Biblia tilemʌch ti Dios
Jehová tsiʼ yʌqʼueyonla wen utsʼatax bʌ lac majtan, jiñi Biblia, muʼ bʌ i chʼʌm tilel 66 libro. Pero tajol maʼ cʼajtiben a bʌ: «¿Baqui tsaʼ tili jiñi Biblia? ¿Majqui tiʼ tsʼijbu?». Chaʼan mi lac jacʼ ili cʼajtiya tac, laʼ laj qʼuel chuqui tsaʼ ujti chaʼan anto lac chaʼan jiñi Biblia cʼʌlʌl ili ora.
1. Mi wiñicob tiʼ tsʼijbuyob jiñi Biblia, ¿chucoch miʼ yʌjlel chaʼan tilem ti Dios?
Jiñi Biblia tiʼ tsʼijbuyob 40 wiñicob mach bʌ lajalobic i yeʼtel (troñel) yicʼot bajcheʼ yilal chumulob. Tsaʼ tejchi ti tsʼijbuntel cheʼ ti jabil 1513 cheʼ bʌ maxto tilemic Cristo i tsaʼ ujti ti tsʼijbuntel cheʼ ti jabil 98 cheʼ bʌ tilemix Cristo. Anquese tsaʼ jalʼa 1,600 jab chaʼan miʼ tsʼijbuntel, maʼañic miʼ jatsʼ i bʌ ti tʼan chuqui miʼ yʌl. ¿Chucoch? Come tilemʌch ti Dios (pejcan 1 Tesalonicenses 2:13). Ili wiñicob maʼañic tiʼ tsʼijbuyob chuqui tsiʼ bajñel ñaʼtayob, «tsiʼ chaʼleyob tʼan tiʼ wenta Dios come ñijcʌbilob ti jiñi chʼujul bʌ espíritu» (2 Pedro 1:21).a Dios tsiʼ cʼʌñʌ jiñi chʼujul bʌ i yespíritu chaʼan miʼ coltan ili wiñicob chaʼan miʼ tsʼijbuñob jiñi i ñaʼtʌbal Dios (2 Timoteo 3:16).
2. ¿Majqui añob i chaʼan jiñi Biblia?
Muʼ bʌ i yʌl jiñi Biblia miʼ mejlel i coltan jiñi lac piʼʌlob «tiʼ pejtelel ñuqui tejclum, pʼolbalʌl tac, tʼan tac yicʼot alʌ tejclum tac» (pejcan Apocalipsis 14:6). Dios an i yʌcʼʌ chaʼan miʼ mejlel ti cabʌl tʼan, i jiñʌch jiñi libro ñumen pujquem bʌ ti ili ora. Lʌcʼʌl tiʼ pejtelel jiñi lac piʼʌlob miʼ mejlel i cʌñob chuqui miʼ yʌl jiñi Biblia, mach yʌlʌyic baqui chumulob o chuqui ti tʼan yujilob.
3. ¿Chuqui tsiʼ mele Jehová chaʼan maʼañic miʼ jisʌntel jiñi Biblia?
Jiñi tsaʼ bʌ cʼʌjñi chaʼan miʼ tsʼijbuntel jiñi Biblia orajach miʼ yʌsiyel, bajcheʼ i pʌchʌlel jiñi añimal tac o jiñi papiro. Pero an wiñicob tsaʼ bʌ i cʼuxbiyob jiñi Biblia i tsiʼ melbeyob (pʌtbeyob) cabʌl i copiajlel. Anquese cabʌl wiñicob tsiʼ ñopoyob i jisan, an maʼañic bʌ tsiʼ bʌcʼñayob chʌmel (sajtel) chaʼan miʼ coltañob. Jehová maʼañic majqui mi añic chuqui miʼ mejlel i mʌctan chaʼan miʼ pejcañonla. Jiñi Biblia miʼ yʌl: «I tʼan lac Dios miʼ yajñel tiʼ pejtelel ora» (Isaías 40:8).
LAʼ LAC ÑUMEN ÑAʼTAN
Laʼ lac ñumen qʼuel bajcheʼ Dios tsiʼ colta jiñi wiñicob tsaʼ bʌ i tsʼijbuyob jiñi Biblia, i chuqui an i mele chaʼan maʼañic miʼ jisʌntel yicʼot chaʼan añixto lac chaʼan jiñi Biblia.
4. Jiñi Biblia miʼ yʌl majqui tsiʼ yʌcʼʌ ti tsʼijbuntel
Qʼuelela jiñi VIDEO. Cheʼ jiñi pejcanla 2 Timoteo 3:16 i tem alʌla iliyi:
Mi jiñi Biblia tiʼ tsʼijbuyob wiñicob, ¿chucoch miʼ subentel bajcheʼ i Tʼan Dios?
Bajcheʼ a wʌlʌ, ¿muʼ ba mejlel lac ñop chaʼan Dios tiʼ sube chuqui miʼ ñaʼtan jiñi wiñicob?
Jiñi secretario miʼ tsʼijbun jumpʼejl carta, pero jiñʌch i yum woli bʌ i suben chuqui yom miʼ tsʼijbun. Lajal jaʼel, jiñi Biblia tiʼ tsʼijbuyob wiñicob, pero jiñi muʼ bʌ i yʌl i tʼañʌch Dios.
5. Jiñi Biblia maʼañic tsaʼ mejli ti jisʌntel
Come tilemʌch ti Dios jiñi Biblia, maʼañic tsiʼ yʌcʼʌ ti jisʌntel. Cabʌl yumʌlob tsiʼ ñopoyob i jisan. Cheʼ jaʼel, an ñucoʼ bʌ i yeʼtel ti ñopbalʌl tac maʼañic bʌ tsiʼ mulayob chaʼan jiñi lac piʼʌlob miʼ pejcañob jiñi Biblia. Pero an wiñicob maʼañic bʌ tsiʼ bʌcʼñayob chʌmel chaʼan miʼ coltañob. Laʼ laj cʌn tiʼ tojlel juntiquil wiñic tsaʼ bʌ i colta jiñi Biblia. Qʼuelela jiñi VIDEO i tem alʌla iliyi:
Cheʼ bʌ a wujilix chaʼan tsaʼ chaʼlenti wersa chaʼan miʼ coltʌntel jiñi Biblia, ¿a womix baʼ ñumen pejcan? ¿Chucoch?
Pejcanla Salmo 119:97 i tem alʌla iliyi:
¿Chucoch cabʌl lac piʼʌlob an i yʌcʼʌyob i bʌ ti chʌmel chaʼan miʼ chaʼlentel ti traducir yicʼot miʼ pujquel jiñi Biblia?
6. Jumpʼejl libro chaʼan pejtelel lac piʼʌlob
Jiñi Biblia jiñʌch jumpʼejl libro am bʌ ñumen chaʼlenti ti traducir yicʼot ñumen pucbil bʌ. Pejcanla Hechos 10:34, 35 i tem alʌla iliyi:
¿Chucoch yom Dios chaʼan jiñi Biblia miʼ chaʼlentel ti traducir ti cabʌl tʼan yicʼot chaʼan miʼ pujquel?
¿Chuqui jiñi muʼ bʌ a ñumen mulan chaʼan jiñi Biblia?
Lʌcʼʌ ti lac
pejtelel
miʼ mejlel lac pejcan jiñi Biblia ti lac tʼan
Melbilix ñumen ti
3 mil
tʼan tac
An tsʼʌcʌlix bʌ yicʼot maxto bʌ tsʼʌcʌlic
5 mil millón
Añix chaʼlenti ti imprimir cabʌl Biblia,
jiñʌch jiñi libro am bʌ wen chaʼlenti ti imprimir
AN MUʼ BɅ I YɅLOB: «Jiñi Biblia jumpʼejl jachix libro ñoxix bʌ tsaʼ bʌ i tsʼijbuyob wiñicob».
Ixcu jatet, ¿chuqui maʼ ñaʼtan?
¿Chuqui tac miʼ pʌs chaʼan i tʼañʌch Dios jiñi Biblia?
TSAʼ BɅ LAJ CɅÑɅ
Jiñi Biblia i tʼañʌch Dios, i an i chʼʌmʌ tiʼ wenta chaʼan ti lac pejtelel miʼ mejlel lac taj.
¿Chuqui tsaʼ cʌñʌ?
¿Chuqui yom i yʌl cheʼ bʌ Dios tsiʼ ñijca wiñicob chaʼan miʼ tsʼijbuñob jiñi Biblia?
¿Chuqui tsaʼ mulaj chaʼan bajcheʼ tsaʼ coltʌnti jiñi Biblia, chaʼan bajcheʼ cʼamel pucbil yicʼot an chaʼlenti ti traducir?
¿Bajcheʼ yubil maʼ wubin a bʌ chaʼan pejtelel chuqui melbil i chaʼan Dios chaʼan miʼ pejcañet?
CɅÑɅ YAN TAC BɅ
Qʼuele chuqui tac tsaʼ ujti ti wajali chaʼan anto lac chaʼan jiñi Biblia cʼʌlʌl ili ora.
«¿Chucoch añixto lac chaʼan jiñi Biblia ili ora?» (¡Jamʌx a wut!, noviembre i chaʼan 2007)
Qʼuele bajcheʼ ñusʌbil i chaʼan uxpʼejl wocol jiñi Biblia.
«Jiñi Biblia: Ñusʌbil bʌ i chaʼan cʼʌlʌl ti wajali» (Lac Tsictesʌbentel, julio i chaʼan 2016)
Qʼuele chuqui tsiʼ meleyob chaʼtiqui uxtiquil wiñicob chaʼan miʼ mejlel i chaʼleñob ti traducir jiñi Biblia.
Jiñi Biblia melbilix cabʌl i copiajlel i tsaʼix wen chaʼlenti ti traducir. ¿Bajcheʼ la cujil chaʼan jiñi i Tʼan Dios maʼañic tsaʼ qʼuextʌyi?
«¿Qʼuextʌbilix ba chuqui miʼ yʌl jiñi Biblia?» (Tema am bʌ ti jw.org)
a Jiñi chʼujul bʌ espíritu jiñʌch jiñi i pʼʌtʌlel Dios, cheʼ bajcheʼ miʼ yʌl jiñi cʌntesʌntel 07.