Ti lac pejtelel la com i tijicñesʌntel lac pusicʼal

¿Cʼajal baʼ chaʼan cheʼ bʌ tsaʼ yajliyet cheʼ alʌlet to? Tajol tsaʼ lojwi a cʼʌb o a pix. ¿Bajcheʼ tsiʼ coltayet a mamá? Tajol tsiʼ wen poco yicʼot tiʼ tsʼʌca a lojweñal. Wen jach bajcheʼ tsiʼ pejcayet yicʼot tsiʼ meqʼueyet chaʼan maʼ cʌy uqʼuel. Cheʼ bʌ alʌlet to, majqui jach miʼ mejlel i tijicñesan a pusicʼal.

Cheʼ bʌ tsaʼix lac taja laj colel, ñumen tsʌts jiñi wocol muʼ bʌ lac taj. Ñumen wocol chaʼan mi lac taj i tijicñesʌntel lac pusicʼal. Pero jiñi wocol mach ti orajic miʼ mejlel ti lajmesʌntel bajcheʼ lac lojweñal. Laʼ laj qʼuel ejemplo tac.

• ¿Woli (choncol) baʼ wubin wocol chaʼan tsaʼ sʌtʌ a weʼtel? Julián miʼ yʌl chaʼan maʼañix bajcheʼ yom tsiʼ yubi cheʼ bʌ tsaʼ tsʼocbenti i yeʼtel. Tsiʼ cʼajtibe i bʌ: «¿Bajcheʼ mi caj cʌntan c familia? Añix tsaʼ ora j cajel ti eʼtel yaʼ ti empresa, ¿chucoch maʼañix j cʼʌjñibal tsiʼ ñaʼtayob?».

• ¿Woli (yʌquel) baʼ ñusan wocol tiʼ caj tsaʼ chaʼle a bʌ ti divorciar? Raquel miʼ yʌl: «Añix jumpʼejl jab yicʼot ojlil tsiʼ cʌyʌyon c ñoxiʼal. Tsaʼ c wen ubi c chʼijiyemlel yicʼot toj lojwel c pusicʼal tsaʼ cubi. Wen cʼux tsaʼ cubi c bʌ i tsaʼto i cʼamʼesayon. Tsaʼ c wen bʌcʼña chuqui miʼ cajel ti talto bʌ qʼuin».

• ¿Woli baʼ ñusan tsʌts bʌ cʼamʌjel i maʼañic woliʼ lajmel yilal? Tajol cheʼ maʼ wubin a bʌ bajcheʼ Job, tsiʼ yʌlʌ: «Tsaʼix cʼojyiyon. Comix chʌmel» (Job 10:1). O tajol cheʼ maʼ wubin a bʌ bajcheʼ Luis, am bʌ 80 i jabilel, tsiʼ yʌlʌ: «Woli jax c pijtan chʌmel mi cubin».

• ¿A wom baʼ tijicñesʌntel come tsaʼ chʌmi (sajti) juntiquil muʼ bʌ a wen cʼuxbin? Robert miʼ yʌl: «Maʼañic tsaʼ mejli c ñop cheʼ bʌ tsaʼ subentiyon chaʼan tsaʼ chʌmi calobil cheʼ tsaʼ yajli jiñi avión. Cheʼ jiñi tsaʼ caji cubin i cʼuxel..., jiñi cʼuxel muʼ bʌ i lajintel ti Biblia bajcheʼ jumpʼejl espada muʼ bʌ i sʌl jecʼonla» (Lucas 2:35, TNM)..

Anquese Julián, Raquel, Luis yicʼot Robert tsiʼ ñusayob tsʌts bʌ wocol, tsaʼʌch i tajayob i tijicñesʌntel i pusicʼal come tsiʼ tajayob jiñi Dios mach bʌ añic i pʼisol i pʼʌtʌlel. ¿Bajcheʼ miʼ tijicñesan lac pusicʼal? ¿Muʼ ba caj i coltañet jaʼel cheʼ woli a ñusan wocol?