Ti ñaxan maʼañic mic ñop Dios

BAJCHEʼ QUILAL TI WAJALI

Tsaʼ quila pañimil ti jumpʼejl tejclum ti jiñi estado Sajonia, ti jimbʌ ora jiñʌch jiñi República Democrática Alemana. Yaʼ ti cotot añʌch jiñi cʼuxbiya, i jiñi c tatob tsiʼ pʌsbeyoñob chaʼan yom wen jiñi c melbal tac. Jiñi República Democrática Alemana jumpʼejlʌch país comunista bʌ, i jin chaʼan cabʌl lac piʼʌlob ti Sajonia maʼañic miʼ qʼuelob ti ñuc jiñi ñopbalʌl. Joñon ti ñaxan maʼañic mic ñop Dios. An chaʼchajp tsaʼ bʌ i qʼuexta jiñi ñaxam bʌ 18 jab j cuxtʌlel: Jiñi ateísmo yicʼot jiñi comunismo.

¿Chucoch tsaʼ c wen mulaj jiñi comunismo? Come mic mulan chaʼan junlajal pejtelel jiñi lac piʼʌlob, cheʼto jaʼel tsaʼ c ñaʼta chaʼan junlajal yom miʼ tʼoxtʌl jiñi chubʌʼañʌl tac chaʼan cheʼ bajcheʼ jiñi maʼañic majqui pʼumpʼum bʌ i maʼañic majqui ñumen am bʌ i chubʌʼan. Jin chaʼan, tsaʼ cajiyon ti coltaya ti jumpʼejl organización comunista chaʼan bʌ xcolelob. Cheʼ bʌ an 14 c jabilel tsaʼ caji c mel jumpʼejl eʼtel baqui miʼ tempʌntel jiñi jun i miʼ chaʼ cʼʌjñel, i cheʼ bajcheʼ jiñi miʼ cʌntʌntel jiñi Pañimil. Jiñi añoʼ bʌ i yeʼtel ti Aue tsiʼ qʼueleyob ti ñuc i tsiʼ yʌqʼueyoñob c majtan. Anquese chʼitoñonto, tsaʼ j cʌñʌ políticojob wen ñucoʼ bʌ i yeʼtel yaʼ ti país. Weñʌch woli bʌ c mel tsaʼ cubi, i tsaʼ c ñaʼta chaʼan mucʼʌch caj c bej taj chuqui tac wem bʌ.

Cheʼ jiñi an chuqui tsaʼ ujti. Ti 1989 tsaʼ jejmi jiñi muro ti Berlín, cheʼ jaʼel tiʼ sʌtʌ i pʼʌtʌlel jiñi comunismo yaʼ ti Europa del Este. Jumpʼejl wocol tsiʼ yʌcʼʌ yambʌ wocol. Tsaʼ c taja j qʼuel jaʼel chaʼan cabʌl chuqui mach bʌ weñic woliʼ mejlel. Jumpʼejl ejemplo, jiñi maʼañic bʌ miʼ coltañob jiñi comunismo maʼañic miʼ wen qʼuejlelob ti ñuc. Pero ¿chucoch? ¿Mach ba muqʼuic i pʌs jiñi comunismo chaʼan junlajalonla? ¿Jumpʼejl jach ba lot jiñi? Pejtelel jiñi tsiʼ wen acʼʌyon ti pensar.

Tsaʼ qʼuextʌyi jiñi muʼ bʌ j qʼuel ti ñuc, jin chaʼan tsaʼ caji c mulan jiñi música yicʼot jiñi dibujo. Tsaʼ ochiyon ti jumpʼejl escuela chaʼan bʌ música chaʼan ti wiʼil mic majlel ti universidad, tsaʼ caji c mulan c mel jiñi eʼtel chaʼan bʌ música yicʼot jiñi dibujo. Tsaʼ j cʌyʌ pejtelel jiñi wem bʌ c melbal tsaʼ bʌ j cʌñʌ cheʼ bʌ alobonto. Tsaʼ jax caji c mulan jiñi ñusaqʼuin tac, i tsaʼto cajiyon ti loqʼuel quicʼot cabʌl xchʼocob. Pero jiñi música, jiñi dibujo yicʼot bajcheʼ chumulon maʼañic tsiʼ jisa jiñi j cʼojol tac, i jiñi tsiquil ti jiñi dibujo tac muʼ bʌ c mel. ¿Bajcheʼ yilal mi caj cajñel ti talto bʌ qʼuin? ¿Am ba i sujmlel jiñi laj cuxtʌlel?

Tsaʼ toj sajti c pusicʼal cheʼ bʌ tsaʼ c tajbe i jacʼbal jiñi j cʼajtiya tac. Ti jumpʼejl bʌ icʼan, cheʼ bʌ yaʼañon ti escuela, tsaʼ buchleyon quicʼot junmojt alumnojob woli bʌ i tajob ti tʼan jiñi talto bʌ qʼuin. Yaʼan jaʼel jiñi Mandy,a juntiquil i testigo Jehová tsaʼ bʌ i yʌqʼueyon wem bʌ ticʼojel. Tiʼ subeyon: «Andreas, mi a wom a tajben i jacʼbal jiñi cʼajtiya tac chaʼan bʌ laj cuxtʌlel yicʼot jiñi talto bʌ qʼuin, qʼuele muʼ bʌ i yʌl jiñi Biblia».

Mach comic tsaʼ cʌlʌ, pero tsaʼʌch c mele. Mandy tsiʼ pʌsbeyon muʼ bʌ i yʌl Daniel capítulo 2, i cheʼ bʌ tsaʼ c pejca, tsaʼ toj sajti c pusicʼal. Ili profecía miʼ taj ti tʼan yumʌlob tsaʼ bʌ i meleyob chuqui tac ñuc bʌ, i muʼto i yʌjlelob ili ora. Cheʼ jiñi, Mandy tsiʼ pʌsbeyon yambʌ profecía tac muʼ bʌ i taj ti tʼan chuqui mi caj i yujtel ti talto bʌ qʼuin. Tsaʼix c tajbe i jacʼbal jiñi j cʼajtiya tac. Pero ¿majqui tiʼ tsʼijbu jiñi profecía tac? ¿Majqui tsaʼ mejli i wʌn al ti toj chuqui mi caj i yujtel? ¿Muʼ ba i pʌs chaʼan añʌch Dios?

BAJCHEʼ TSIʼ QʼUEXTA C PENSAR JIÑI BIBLIA

Mandy tsiʼ yʌqʼueyon j cʌn Horst yicʼot Angelika, jumpʼejl xñujpuñel Testigojoʼ bʌ. Tsiʼ coltayoñob c ñumen chʼʌmben i sujm jiñi Biblia. Ti ora tsaʼ j cʌñʌ chaʼan maʼañic yambʌ ñopbalʌl muʼ bʌ i cʼʌmbeñob i cʼabaʼ Dios yicʼot miʼ yʌcʼob ti cʌñol, cojach jiñi i testigojob Jehová (Salmo 83:18, TNM; Mateo 6:9). Tsaʼ j cʌñʌ chaʼan Jehová miʼ yʌqʼuen i pijtaya jiñi quixtañujob chaʼan miʼ chumtʌlob ti jumpʼejl paraíso ila ti Lum. Jiñi Salmo 37:9 miʼ yʌl: «Jini muʼ bʌ i chʌn pijtañob lac Yum mi caj i yʌqʼuentelob i wenlel», yom i yʌl, jiñi Pañimil. Tsaʼ c wen mulaj cheʼ tsaʼ j cʌñʌ chaʼan pejtelel muʼ bʌ i chaʼleñob wersa i jacʼben i mandar Jehová miʼ mejlel i tajob iliyi.

Wocol tsaʼ cubi chaʼan mij qʼuextan c melbal yicʼot chaʼan mic jacʼ muʼ bʌ i yʌl jiñi Biblia. Jiñi tsaʼ bʌ c taja bajcheʼ músico yicʼot bajcheʼ xmel dibujo tsiʼ yʌqʼueyon j qʼuel c bʌ ti ñuc, jin chaʼan tsaʼ c chaʼle wersa chaʼan mic pʌs c pecʼlel. Cheʼ jaʼel, wocol tsaʼ cubi chaʼan mij cʌy jiñi xchʼocob. Mic wen aqʼuen wocolix i yʌlʌ Jehová cheʼ wen yujil pijt, miʼ chʼʌmbeñonla i sujm yicʼot miʼ pʌsben i cʼuxbiya jiñi muʼ bʌ i chaʼleñob wersa chaʼan miʼ jacʼob muʼ bʌ i yʌl jiñi Biblia.

Jiñi comunismo yicʼot jiñi ateísmo tsiʼ qʼuexta jiñi ñaxam bʌ 18 jab j cuxtʌlel, pero jiñi Biblia woliʼ qʼuextañon majlel cʼʌlʌl ti jimbʌ ora. Jiñi tsaʼ bʌ j cʌñʌ tsiʼ yʌqʼue i sujmlel jiñi j cuxtʌlel i tsiʼ yʌqʼueyon j cʌy j cʼojoʼtan jiñi talto bʌ qʼuin. Ti 1993 tsaʼ c chʼʌmʌ jaʼ i tsaʼ sujtiyon tiʼ testigo Jehová, i ti jabil 2000 tsaʼ ñujpuñiyon quicʼot Tabitha, juntiquil chʼejl bʌ Testigo. Ti lon c chaʼticlel mi cʌqʼuen lojon i yorajlel chaʼan mic pʌsben lojon jiñi lac piʼʌlob chuqui miʼ yʌl jiñi Biblia. Cheʼ bajcheʼ joñon, cabʌlob an yajlemob ti jiñi comunismo yicʼot jiñi ateísmo. Wen tijicña mi cubin cheʼ mij coltañob chaʼan miʼ cʌñob Jehová.

WENLEL TAC TAJBIL BɅ C CHAʼAN

Jiñi c tatob tsiʼ bʌcʼñayob cheʼ bʌ tsaʼ caji c ñochtan jiñi i testigojob Jehová. Pero ti wiʼil, tsiʼ qʼueleyob bajcheʼ an i coltayon tij cuxtʌlel. Wʌle wen tijicña mi cubin come woliyob ti estudio yicʼot miʼ yajñelob ti jiñi tempa bʌ tac.

Joñon quicʼot Tabitha an c chaʼle lojon wersa chaʼan mi lon c jacʼ jiñi ticʼojel tac muʼ bʌ i yʌcʼ jiñi Biblia chaʼan jiñi ñujpuñemoʼ bʌ, i jiñi an i wen aqʼueyon lojon c tijicñʌyel. Jumpʼejl ejemplo, cheʼ mic jacʼ lojon jiñi ticʼojel tac chaʼan yom xucʼulon lojon tiʼ tojlel lon c piʼʌl an i pʼʌtʼesa jiñi lon c ñujpuñel (Hebreos 13:4).

Maʼañix mic wen cʼojoʼtan jiñi j cuxtʌlel mi jiñicto muʼ bʌ caj i yujtel ti talto bʌ qʼuin. Ochemon ti jumpʼejl familia chaʼan bʌ i testigojob Jehová añoʼ bʌ tiʼ petol pañimil, añoʼ bʌ i chaʼan i sujm bʌ ñʌchʼtʌlel yicʼot juntemelob. Ti ili familia junlajalonla, jiñʌch am bʌ c ñopo cʼʌlʌl ti wajali i tsaʼ c sʌcla tiʼ pejtelel ora.