Laʼ lac lajiben i bʌxlel Jehová yicʼot i yalobil cheʼ tiʼ yorajlel i Cʼajtesʌntel i chʌmel Jesús
1. ¿Chucoch miʼ chaʼleñob wersa ti subtʼan jiñi Testigojob cheʼ tiʼ yorajlel i Cʼajtesʌntel i chʌmel Jesús?
1 Jehová miʼ tsʼʌctesan yicʼot i bʌxlel jiñi ñaʼtʌbil bʌ i chaʼan. Isaías 9:7 (TNM) mi yʌl: «I bʌxlel Jehová, jiñi ñumen ñuc bʌ yumʌl, mi caj i mel iliyi», ili yom yʌl bendición tac muʼ bʌ caj i chʼʌm tilel i Yumʌntel. Cheʼ jaʼel, i yalobil Dios tsiʼ pʌsʌ i bʌxlel ti isujm bʌ chʼujutesaya cheʼ bʌ tsiʼ chaʼle subtʼan (Juan 2:13-17; 4:34). Cheʼ miʼ cʼotel i yorajlel ti jujumpʼejl jab i Cʼajtesʌntel i chʌmel Jesús, millón Testigojob tiʼ petol pañimil miʼ chaʼleñob wersa chaʼan miʼ lajibeñob i bʌxlel Jehová yicʼot Jesús cheʼ bʌ miʼ ñumen chaʼleñob subtʼan. ¿Muʼ baʼ caj a ñumen chaʼlen subtʼan jaʼel?
2. ¿Chuqui mi caj lac mel ti 7 i chaʼan marzo, i chuqui mi caj lac taj mi mucʼʌch lac mel yicʼot lac bʌxlel?
2 I Cʼajtesʌntel i chʌmel Jesús. I subol i Cʼajtesʌntel i chʌmel Jesús ti ili jabil mi caj i tejchel ti sábado 7 i chaʼan marzo. Yomix mi lac tech lac chajpan lac bʌ chaʼan mi lac sub yicʼot lac bʌxlel. Jiñi congregación tac mi caj i wen chaʼleñob eʼtel come mi caj i chaʼleñob wersa chaʼan miʼ subob tiʼ pejtelel yaʼ baqui miʼ chaʼleñob subtʼan. Laʼ lac chajpan lac bʌ chaʼan mi lac suben jiñi muʼ bʌ la cʌqʼueñob estudio, jiñi muʼ bʌ lac julaʼtañob yaʼ baqui mi lac chaʼlen subtʼan, lac piʼʌlob ti troñel, lac piʼʌlob ti qʼuel jun yicʼot lac familia o miʼ mejlel lac pʌsbeñob yaʼ ti jw.org/ctu.
3. ¿Bajcheʼ miʼ mejlel lac ñumen chaʼlen subtʼan ti marzo yicʼot ti abril?
3 Precursor Auxiliar. Jiñi bʌxlel mi caj i ñijcañonla chaʼan mi lac ñumen chaʼlen subtʼan. Cabʌl miʼ cajelob ti eʼtel bajcheʼ precursor auxiliar cheʼ ti marzo yicʼot ti abril, come 30 ora jach miʼ cʼajtibentelob ti jiñi bʌ ora. Ti lac chʼujutesaya ti familia, o cheʼ woli lac bajñel pejcan jiñi Biblia miʼ mejlel la cʌl ti oración chaʼan bajcheʼ miʼ mejlel lac mel (Pr. 15:22). Jiñi lac bʌxlel miʼ mejlel i lajin yambʌlob chaʼan miʼ subob yicʼot i bʌxlelob jaʼel. Mi mucʼʌch a wen chajpan a weʼtel chaʼan maʼ ñumen chaʼlen subtʼan, woli a lajiben i bʌxlel Jesús (Mr. 6:31-34).
4. ¿Chuqui mi caj lac taj cheʼ mi lac lajiben i bʌxlel Jehová yicʼot Jesús?
4 Mi caj lac taj cabʌl bendición cheʼ mi lac lajiben i bʌxlel Jehová yicʼot Jesús cheʼ tiʼ yorajlel i Cʼajtesʌntel i chʌmel Jesús. Ñaxan mi caj i ñumen sujbel yaʼ baqui mi lac chaʼlen subtʼan. Mi caj la cubin lac tijicñʌyel jaʼel cheʼ mi lac melben i yeʼtel Jehová yicʼot cheʼ mi lac suben yambʌlob (Hch. 20:35). Jiñi ñumen ñuc bʌ, jiñʌch cheʼ mi caj lac tijicñesʌben i pusicʼal jiñi Dios yicʼot i Yalobil.