Laʼ lac wen cʼʌn jiñi libro Muʼ bʌ i cʌntesañonla jiñi Biblia

Cheʼ bʌ jiñi woli bʌ lac pʌsbeñob estudio miʼ cʌñob majlel muʼ bʌ i yʌl jiñi Biblia i miʼ melob, miʼ pʌsob chaʼan woli i colelob tiʼ chaʼan bʌ Dios (Sal. 1:1-3). Mi mucʼʌch laj cʼʌn ti wen bajcheʼ melbil jiñi libro Muʼ bʌ i cʌntesañonla jiñi Biblia, miʼ mejlel laj coltan chaʼan miʼ tajob i colel.

Cʼajtiya tac tiʼ tejchibal. Jujumpʼejl cʌntesʌntel miʼ tejchel yicʼot cʼajtiya tac muʼ bʌ i jajqʼuel ti jiñi cʌntesʌntel. Miʼ mejlel lac melben jiñi cʼajtiya, pero mach chaʼan miʼ jacʼ jiñi woli bʌ lac pʌsben estudio, chaʼañʌch miʼ ñumen mulan i cʌn jiñi cʌntesʌntel. Yambʌ jiñʌch cheʼ mi lac suben chaʼan miʼ tsʼitaʼ al i sujmlel jiñi cʼajtiya tac. Tajol mach tojic miʼ jacʼ, pero mach lac tojʼesan ti jiñi bʌ ora, come jiñi muʼ bʌ i yʌl mi caj i coltañonla lac ñaʼtan chuqui yom mi lac ñumen tsictesʌben (Pr. 16:23; 18:13).

Apéndice. Mi jiñi woli bʌ laj cʌntesan tsaʼix i chʼʌmbe isujm jiñi cʌntesʌntel, miʼ mejlel lac suben chaʼan miʼ bajñel pejcan jiñi apéndice am bʌ ti jiñi temaj. Cheʼ ti yambʌ estudio, miʼ mejlel lac melben cʼajtiya tac chaʼan mi laj qʼuel mi tsaʼʌch i ñaʼta. Mi weñʌch mi laj qʼuel, laʼ laj cʌyben i yorajlel chaʼan mi laj comol tsajin jiñi apéndice tiʼ pejtelel o lamital jach. Miʼ mejlel lac pejcan jiñi párrafo tac i mi lac mel cʼajtiya tac wʌn chajpʌbilix bʌ lac chaʼan.

Recuadro chaʼan repaso. Jujumpʼejl cʌntesʌntel miʼ yujtel yicʼot jumpʼejl recuadro chaʼan repaso baqui an i jacʼbal jiñi cʼajtiya tac am bʌ tiʼ tejchibal. Cheʼ mi laj qʼuel yicʼot, mi caj lac ñaʼtan mi tsaʼʌch i chʼʌmbe isujm jiñi ñumen ñuc tac bʌ yicʼot mi mucʼʌch i mejlel i tsictesan. Cheʼ bʌ tsaʼix laj comol pejca i jacʼbal yicʼot jiñi texto tac, laʼ lac suben chaʼan miʼ cʼʌn jiñi versículo tac chaʼan miʼ tsictesan chucoch i sujmʌch muʼ bʌ i yʌl jiñi recuadro (Hch. 17:2, 3).