«Tsaʼ ñucʼa i pusicʼal Pablo [...]. Tsiʼ sube Dios wocolix i yʌlʌ»

Cheʼ bʌ jiñi hermanojob añoʼ bʌ ti Roma tsiʼ yubiyob chaʼan mi caj i cʼotel Pablo, an tsaʼ bʌ i xʌñʌyob 64 kilómetro chaʼan miʼ majlel i tajob. ¿Bajcheʼ yubil tsiʼ yubi i bʌ Pablo cheʼ jiñi hermanojob tsiʼ pʌsbeyob i cʼuxbiya? «Tsaʼ ñucʼa i pusicʼal Pablo cheʼ bʌ tsiʼ qʼueleyob. Tsiʼ sube Dios wocolix i yʌlʌ» (Hch. 28:15). Anquese Pablo jiñʌch ñʌmʌl bʌ i ñuqʼuesʌben i pusicʼal yambʌlob, ti ili ora jiñʌch yom bʌ miʼ ñuqʼuesʌbentel i chaʼan come an ti cárcel (2 Co. 13:10).

Ti ili ora, jiñi superintendentejob i chaʼan circuito miʼ julaʼtañob jiñi congregación tac chaʼan miʼ ñuqʼuesʌben i pusicʼal jiñi hermanojob. An i tajol miʼ lujbʼañob, an chuqui miʼ cʼojoʼtañob o añob i chʼijiyemlel, cheʼ bajcheʼ mi la cujtel jaʼel. ¿Chuqui miʼ mejlel lac mel chaʼan mi lac ñuqʼuesʌben i pusicʼal jiñi superintendente i chaʼan circuito yicʼot i yijñam chaʼan «mi lac tem ñuqʼuesʌben lac bʌ lac pusicʼal» cheʼ miʼ julaʼtañoñobla? (Ro. 1:11, 12).

• 

  Mi lac majlel ti jiñi tempa bʌ chaʼan subtʼan. Jiñi superintendente i chaʼan circuito tijicña miʼ yubin cheʼ mi lac chaʼlen wersa lac loqʼuel ti subtʼan ti jiñi semana (1 Ts. 1:2, 3; 2:20). Laʼ lac ñop ochel bajcheʼ precursor auxiliar ti jiñi uw. ¿Mejl baʼ lac chajpan lac bʌ chaʼan mi lac loqʼuel ti subtʼan o chaʼan mi lac cʌcʼ estudio la quicʼot jiñi superintendente o i yijñam? Mach a ñaʼtan chaʼan mach wen a wujilic subtʼan o maxto jale a cajel ti loqʼuel, jiñi hermanojob miʼ wen mulañob loqʼuel yicʼot pejtelel xsubtʼañob.

• 

  Mi lac pʌyob ti la cotot. ¿Mejl ba lac subeñob chaʼan miʼ jijlelob ti la cotot o mi lac pʌyob ti uchʼel? Jiñʌch junchajp bajcheʼ mi lac pʌsbeñob chaʼan mi laj cʼuxbiñob. Maʼañic miʼ pijtañob chaʼan wen wocol ti chajpʌntel chuqui mi la cʌqʼueñob (Lc. 10:38-42).

• 

  Mi lac jacʼbeñob i ticʼojel. Jiñi superintendente i chaʼan circuito miʼ coltañonla yicʼot i cʼuxbiya chaʼan ñumen wen mi lac melben i yeʼtel Jehová. An qʼuiñil i cʼʌjñibalʌch miʼ yʌqʼueñonla tsʌts bʌ ticʼojel (1 Co. 5:1-5). Mi mucʼʌch lac jacʼbeñob i tʼan tijicña mi caj i mel i yeʼtel (He. 13:17).

• 

  Mi la cʌqʼueñob wocolix i yʌlʌ. Suben jiñi superintendente i chaʼan circuito yicʼot i yijñam bajcheʼ an i coltayet jiñi melbil bʌ i chaʼañob ti a tojlel. Miʼ mejlel a subeñob o miʼ mejlel a tsʼijbubeñob ti jumpʼejl jun (Col. 3:15).