Laʼ laj cʼʌn jiñi video tac chaʼan mi laj cʌntesañob jiñi woli bʌ la cʌqʼueñob estudio

Jiñi muʼ bʌ laj qʼuel ñumen ora miʼ mejlel ti cʌytʌl ti lac jol i miʼ coltañonla lac chʼʌmben isujm chuqui mi laj cʌntesʌntel. Jehová, jiñi la Caj Cʌntesa, tsiʼ cʼʌñʌ jiñi muʼ bʌ mejlel laj qʼuel chaʼan miʼ yʌcʼ ti cʌjñel ñuc tac bʌ i cʼʌjñibal (Gn. 15:5; Jer. 18:1-6). Jesús jiñi Ñuc bʌ xCʌntesa, tsiʼ cʼʌñʌ jaʼel (Mt. 18:2-6; 22:19-21). Ti ili ora, junchajp choncol bʌ i ñumen cʼʌjñel jiñʌch jiñi video tac. ¿Woli ba laj cʼʌn chaʼan mi laj cʌntesañob jiñi woli bʌ la cʌqʼueñob estudio?

Ti ili ora, an lac chaʼan lujumpʼejl video muʼ bʌ i coltañonla lac tsictesan jiñi cʌntesʌntel tac am bʌ ti jiñi folleto ¡Jini wen tʼan tilem bʌ ti Dios! An qʼuiñil, i títulojlel jiñi video yaʼʌch loqʼuem ti jiñi cʼajtiya tac am bʌ ti iʼicʼ muʼ bʌ lac taj ti jiñi folleto. Jiñi folleto muʼ bʌ lac taj yaʼ ti página jw.org miʼ pʌsbeñonla baqui ora yom mi laj cʼʌn jujumpʼejl video. Cheʼ jaʼel, an yambʌ video tac am bʌ ti jiñi la queʼtijib chaʼan bʌ cʌntesa muʼ bʌ laj cʼʌn chaʼan mi lac pʌs estudio.

¿Wocol ba miʼ chʼʌmben i sujm jumpʼejl cʌntesʌntel jiñi woli bʌ a wʌqʼuen estudio o woli ba i yilʌbentel i pusicʼal? Sʌclan jumpʼejl video muʼ bʌ mejlel i coltan am bʌ yaʼ ti jw.org® o yaʼ ti JW Broadcasting®. Tajol miʼ mejlel laʼ comol qʼuel yicʼot mi laʼ tsajin.

Ti jujumpʼejl uw miʼ loqʼuel tsijib tac bʌ video. Cheʼ bʌ maʼ qʼuel, ñaʼtan bajcheʼ miʼ mejlel a cʼʌn chaʼan maʼ cʌntesan yambʌlob.