Laʼ lac ñumen locʼsʌben i wenlel cheʼ mi lac chajpan lac bʌ ti lac bajñelil

¿CHUCOCH ÑUC I CʼɅJÑIBAL? Cheʼ bʌ mi lac chajpan jiñi i Tʼan Dios ti lac bajñelil miʼ coltañonla lac ñumen chʼʌmben i sujm «bajcheʼ an i jawtilel, yicʼot i ñajtlel, yicʼot i chanlel, yicʼot i tamlel» jiñi i sujmlel (Ef. 3:18). Cheʼ jaʼel miʼ coltañonla chaʼan toj mi la cajñel i chaʼan maʼañic lac bibiʼlel ti ili jontol bʌ pañimil yicʼot chaʼan mi lac ñumen taj lac «ñaʼtʌbal» tiʼ Tʼan Dios (Fil. 1:9). Cheʼ mi lac chajpan lac bʌ ti lac bajñelil miʼ coltañonla lac sʌclan temaj tac i cʼʌjñibal bʌ lac chaʼan. ¿Bajcheʼ miʼ mejlel laj cʼʌn ti utsʼat jiñi i yorajlel am bʌ lac chaʼan tiʼ pejcʌntel yicʼot i wen chajpʌntel jiñi Biblia?

¿BAJCHEʼ YOM MIʼ MEJLEL?

• Sʌpʌ jiñi versículo tac yicʼot tsʼijbun nota tac ti jiñi a Biblia muʼ bʌ a cʼʌn a chajpan a bʌ o ti a tableta o celular.

• Cheʼ bʌ woli a pejcan jiñi Biblia melben a bʌ ili cʼajtiya tac: ¿Majqui? ¿Chuqui? ¿Baqui? ¿Jalix? ¿Bajcheʼ? yicʼot ¿Chucoch?

• Miʼ mejlel laj cʼʌn jiñi eʼtijib tac am bʌ lac chaʼan chaʼan mi lac sʌclan jiñi temaj tac o jiñi versículo ti Biblia chaʼan mi lac ñumen chʼʌmben i sujm.

• Yom mi lac wen ñaʼtan woli bʌ lac pejcan chaʼan mi laj qʼuel bajcheʼ miʼ mejlel i coltañonla.

• Yom mi lac pʌs ti laj cuxtʌlel woli bʌ laj cʌn majlel (Lc. 6:47, 48).

CHEʼ BɅ TSAʼIX LAʼ QʼUELE JIÑI VIDEO ÑUMEN TAJA A ÑAʼTɅBAL TIʼ TʼAN DIOS, JACʼɅ ILI CʼAJTIYA TAC:

• ¿Chuqui ti wenlel an i tajayob yambʌlob cheʼ miʼ bajñel chajpañob i bʌ?

• ¿Chucoch yom mi lac mel oración cheʼ bʌ mi caj lac chajpan lac bʌ?

• ¿Chuqui miʼ mejlel i coltañonla chaʼan mi lac ñumen chʼʌmben i sujm jiñi am bʌ ti Biblia?

• ¿Chuqui tac ti marca miʼ mejlel la cʌqʼuen jiñi lac Biblia muʼ bʌ laj cʼʌn lac chajpan lac bʌ?

• ¿Chucoch i cʼʌjñibal mi lac wen ñaʼtan cheʼ bʌ mi lac pejcan jiñi i Tʼan Dios?

• ¿Chuqui yom mi lac mel yicʼot jiñi woli bʌ laj cʌn majlel?