¿Bajcheʼ yilal jiñi estudio loqʼuem bʌ ti Biblia muʼ bʌ i yʌcʼob jiñi i testigojob Jehová?
Jiñi cʌntesa muʼ bʌ i yʌcʼob jiñi i testigojob Jehová miʼ coltan jiñi lac piʼʌlob chaʼan miʼ cʌñob muʼ bʌ i yʌl jiñi Biblia. Jiñi estudio loqʼuem bʌ ti Biblia miʼ mejlel i coltañet chaʼan...
tijicña maʼ chumtʌl.
maʼ sujtel tiʼ yamigo Dios.
maʼ cʌn muʼ bʌ i yʌl jiñi Biblia chaʼan jiñi talto bʌ qʼuin.
Ti ili página mi caj i jajqʼuel ili cʼajtiya tac:
Mi tsaʼ c jacʼʌ jiñi estudio, ¿yom ba mic sujtel tiʼ testigo Jehová?
Mi tsaʼix c chaʼle estudio quicʼot jiñi Testigojob ti wajali, ¿muʼto ba c chaʼ mejlel ti estudio?
¿Muʼ ba mejlel c chʼʌm jiñi estudio mi mach comic chaʼan an majqui miʼ cʌntesañon?
¿Bajcheʼ yilal jiñi estudio loqʼuem bʌ ti Biblia?
Juntiquil i testigo Jehová mi caj i coltañet a cʌn ti jumpʼejl tema muʼ bʌ i yʌl jiñi Biblia. Ti jiñi estudio loqʼuem bʌ ti Biblia mi caj a cʼʌn jiñi jun Ubin a tijicñʌyel, mi caj i coltañet a cʌn majlel muʼ bʌ i yʌl jiñi Biblia yicʼot bajcheʼ miʼ mejlel i coltañet. Mi a wom a ñumen cʌn, qʼuele ili video.
¿Jaypʼejl i tojol jiñi estudio?
Mach tojbilic. Mi lon c jacʼ tsaʼ bʌ i sube Jesús jiñi xcʌntʼañob i chaʼan: «Majtan jach tsaʼ aqʼuentiyetla, majtan jach yom mi laʼ wʌcʼ» (Mateo 10:8). Cheʼ jaʼel, maʼañic mi caj a toj jiñi muʼ bʌ caj a cʼʌn ti estudio, bajcheʼ jiñi Biblia yicʼot jiñi jun Ubin a tijicñʌyel.
¿Jaypʼejl miʼ jalʼan jiñi estudio?
Jiñi libro miʼ chʼʌm tilel 60 cʌntesʌntel. Jatet a wujil bajcheʼ jalel a wom. Pero an muʼ bʌ qʼuelob jumpʼejl cʌntesʌntel ti jujumpʼejl semana, i an muʼto bʌ i qʼuelob chaʼpʼej uxpʼejl.
¿Baqui yom mic tech?
1. Butʼu jiñi solicitud am bʌ ti internet. Jiñi dato tac muʼ bʌ caj a wotsan cojach mi caj lon j cʼʌn chaʼan miʼ mejlel i pejcañet juntiquil i testigo Jehová.
2. Jiñi muʼ bʌ caj i yʌqʼueñet jiñi estudio mi caj i pejcañet. Mi caj i subeñet chuqui mi caj a cʌn ti jiñi estudio loqʼuem bʌ ti Biblia i mi caj i tsictesʌbeñet pejtelel chuqui a wom bʌ a ñaʼtan.
3. Jatet yicʼot jiñi muʼ bʌ caj i cʌntesañet mi caj laʼ wʌl bajcheʼ mi caj laʼ chaʼlen estudio. Maʼ mejlel ti estudio ti a wotot, ti teléfono, ti videollamada, correo o correo electrónico. Jiñi estudio miʼ mejlel ti jalʼan jumpʼejl ora o mach i taja, o muʼto i mejlel ti ñumel, jiñʌch bajcheʼ jalel ora a wom.
¿Muʼ ba mejlel j qʼuel bajcheʼ yilal?
Mucʼʌch. Pero yom maʼ butʼ jiñi solicitud am bʌ ti internet. Cheʼ bʌ maʼ pejcʌntel, subu chaʼan a wom jaxto a qʼuel bajcheʼ yilal jiñi estudio chaʼan maʼ ñaʼtan mi mucʼʌch a mulan o maʼañic. Cheʼ jiñi mi caj laʼ cʼʌn jiñi folleto Ubin a tijicñʌyel, muʼ bʌ i chʼʌm tilel uxpʼejl cʌntesʌntel.
Mi tsaʼ c jacʼʌ jiñi estudio, ¿yom ba mic sujtel tiʼ testigo Jehová?
Maʼañic. Jiñi i testigojob Jehová miʼ mulañob i cʌntesañob jiñi lac piʼʌlob, pero maʼañic baʼ ora mi caj i xicʼob jiñi yambʌlob chaʼan miʼ yochelob tiʼ ñopbal. Yujilob chaʼan jujuntiquilonla mi lac mejlel lac yajcan chuqui la com lac ñop, jin chaʼan, wen jach miʼ tsictesañob chuqui miʼ pʌs jiñi Biblia (1 Pedro 3:15).
¿Muʼ ba mejlel j cʼʌn jiñi c Biblia?
Muʼcu. Maʼ mejlel a cʼʌn baqui jach bʌ Biblia a wom. Joñon lon mij cʼʌn lojon jiñi Traducción del Nuevo Mundo come toj chuqui miʼ yʌl yicʼot mach wocolic ti chʼʌmbentel i sujm. Pero cujil lojon chaʼan cabʌl lac piʼʌlob miʼ mulañob i cʼʌn jiñi Biblia añoʼ bʌ i chaʼan.
¿Muʼ ba i mejlel ti ajñel yambʌ ti jiñi estudio?
Mucʼʌch. Miʼ mejlel a pʌy pejtelel a familia o jiñi a wamigojob.
Mi tsaʼix c chaʼle estudio quicʼot jiñi Testigojob ti wajali, ¿muʼto ba c chaʼ mejlel ti estudio?
Muʼcu. I tajol muʼto caj a ñumen mulan, come jiñi estudio qʼuexelix bajcheʼ miʼ mejlel chaʼan miʼ ñumen coltan jiñi lac piʼʌlob. Laja lajal mi caj laʼ chaʼlen tʼan i miʼ chʼʌm tilel video tac yicʼot dibujo tac.
¿Muʼ ba mejlel c chʼʌm jiñi estudio mi mach comic chaʼan an majqui miʼ cʌntesañon?
Mucʼʌch. Pero cabʌlob ñumen wen miʼ qʼuelob cheʼ an majqui miʼ cʌntesañob. An yambʌlob i bajñelob jach yomob i ñaxan qʼuel. Ti jiñi sección «Eʼtijib tac chaʼan mi laj cʌn am bʌ ti Biblia» cabʌl chuqui mi caj a taj mach bʌ tojbilic, bajcheʼ tac iliyi:
Video tac i chaʼan bʌ Biblia. Ili alʌ video tac miʼ yʌqʼuen i jacʼbal cʼajtiya tac am bʌ ti Biblia ñuc tac bʌ i cʼʌjñibal.
Cʼajtiya tac chaʼan bʌ Biblia. Iliyi miʼ chʼʌm tilel i jacʼbal cabʌl cʼajtiya tac chaʼan bʌ jiñi Biblia.
Texto tac tsictesʌbil bʌ. Qʼuele chuqui yom i yʌl jiñi tʼan tac yicʼot versículo tac am bʌ ti Biblia wen cʌmbil bʌ.