Teche jumpʼejl estudio i cʼʌñʌ ili video tac

An chʌmpʼejl video muʼ bʌ i pʌs bajcheʼ miʼ yʌjqʼuel estudio. ¿Chucoch miʼ pʌstʌl jiñi video, i bajcheʼ miʼ mejlel laj cʼʌn ti subtʼan?

• 

  ¿Chucoch yom mi lac pejcan jiñi Biblia? (Tsʼʌcʌl bʌ). Yom bʌ ili video jiñʌch chaʼan jiñi lac piʼʌlob miʼ tsʼitaʼ mulañob muʼ bʌ i yʌl jiñi Biblia anquese añob i ñopbal. Cheʼ jaʼel, miʼ pʌs bajcheʼ yom miʼ sʌclañob yaʼ ti Biblia i jacʼbal cʼajtiya tac chaʼañoʼ bʌ i cuxtʌlel i miʼ cʼʌn jumpʼejl ejemplo baqui miʼ pʌs chaʼan añʌch i jacʼbal jiñi cʼajtiya tac. Tiʼ yujtibal miʼ tsictesan bajcheʼ miʼ mejlel a cʼajtin jumpʼejl estudio.

• 

  ¿Chucoch yom mi lac pejcan jiñi Biblia? (Ili mach tsʼʌcʌlic). Iliyi lʌcʼʌ lajal jach bajcheʼ jiñi tsʼʌcʌl bʌ, pero tajol jiñi lac piʼʌlob miʼ mejlel i ñumen mulañob i qʼuel come maʼañic miʼ jalʼan.

• 

  ¿Chuqui jiñi estudio loqʼuem bʌ ti Biblia? Yom bʌ iliyi jiñʌch chaʼan jiñi lac piʼʌlob miʼ mulañob i chʼʌm estudio mach bʌ tojbilic yicʼot chaʼan miʼ tajbeñob i jacʼbal i cʼajtiyajob, jumpʼejl ejemplo, ¿bajcheʼ miʼ mejlel i cʼajtiñob jumpʼejl estudio?

• 

  Ubin a tijicñʌyel cheʼ mi caj a chʼʌm estudio. Ili video miʼ pʌsbentel jiñi estudiantejob. Anquese ili miʼ tajtʌl yaʼ ti página 2 ti jiñi libro Ubin a tijicñʌyel, muqʼuix i mejlel tiʼ qʼuejlel anquese woliʼ chaʼlen ti estudiar jiñi folleto. Jiñi video miʼ tsʼitaʼ al muʼ bʌ i chʼʌm tilel jiñi libro, i cheʼ jaʼel miʼ tsictesʌben jiñi estudiante bajcheʼ yilal miʼ cajel jiñi estudio.

Anquese añʌch jujunchajp i cʼʌjñibal ili video tac, mucʼʌch i mejlel lac pʌsben o lac chocben majlel jiñi lac piʼʌlob mi yomʌch i qʼuelob. Laʼ lac chaʼlen wersa chaʼan mi laj qʼuel ili video tac chaʼan mi lac tajben i wenlel cheʼ bʌ mi laj cʼʌn ti subtʼan.