¿Bajcheʼ miʼ mejlel laj cʼʌn jiñi sección: «Muʼ bʌ i mejlel la cʌl»?

Jiñi sección: «Muʼ bʌ i mejlel la cʌl», mi lac taj yaʼ ti ñaxam bʌ i yopol ti jiñi lac Jun chaʼan lac tempa bʌ: I Subtʼan yicʼot i Melbal jiñi xÑoptʼan, ili sección tsaʼ caji ti loqʼuel ti enero, 2018. ¿Bajcheʼ yom miʼ cʼʌjñel ili sección?

Cheʼ bʌ miʼ ñusʌntel jiñi demostración. Yom miʼ cʼʌjñel jiñi ñaxam bʌ cʼajtiya, jiñi texto yicʼot jiñi cʼajtiya mejl bʌ laj cʌy am bʌ ti jiñi sección. Pero iliyi mach yomic i yʌl chaʼan cheʼʌch mi caj a yoque al cheʼ bajcheʼ miʼ yʌjlel yaʼ ti video. Jumpʼejl ejemplo, miʼ mejlel laj qʼuextan baqui mi lac chaʼlen subtʼan, bajcheʼ mi lac tech lac tʼan yicʼot bajcheʼ mi lac tʌcʼ tac majlel jiñi tʼan. Cheʼ jaʼel, miʼ mejlel laj cʼʌn jumpʼejl jun am bʌ yaʼ ti la queʼtijib chaʼan bʌ cʌntesa anquese jiñi «Yom bʌ miʼ mejlel yaʼ ti tempa bʌ I Subtʼan yicʼot i Melbal jiñi xÑoptʼan» maʼañic miʼ yʌl.

Ti jiñi subtʼan. Jiñi sección: «Muʼ bʌ i mejlel la cʌl» miʼ coltañonla lac ñaʼtan bajcheʼ yom mi lac chaʼlen subtʼan. Mi an juntiquil yom bʌ i ñumen cʌn majlel jiñi Biblia, miʼ mejlel lac bej pejcan i tajol miʼ mejlel laj cʼʌn jiñi muʼto bʌ caj i cʼʌjñel ti jiñi revisita. Miʼ mejlel a qʼuextan jiñi tsaʼ bʌ a ñaʼta a suben jiñi i yum otot o cʼʌñʌ jumpʼejl temaj tsaʼix bʌ a chajpa. ¿Muʼ ba i mejlel i ñumen coltan jiñi quixtañujob yaʼ ti lac territorio cheʼ mi laj cʼʌn jumpʼejl temaj tsaʼix bʌ cʼʌjñi ti yambʌ uw o yambʌ texto? ¿Am ba jumpʼejl noticia tsaʼ jaxto bʌ loqʼui o an chuqui tsaʼ ujti yom bʌ i ñaʼtan jiñi quixtañujob? Joñonix mi laj qʼuel miʼ mucʼʌch i mejlel laj cʼʌn jiñi sección: «Muʼ bʌ i mejlel la cʌl». Pero mach yomic miʼ ñajʌyel lac chaʼan chaʼan jiñi la com bʌ jiñʌch ‹chaʼan miʼ cʌñob jiñi wen tʼan, chaʼan miʼ tajob i wenlel jaʼel ti jiñi wen tʼan yicʼot jiñi muʼ bʌ i ñopob› (1 Co. 9:22, 23).