I MELBAL JIÑI XÑOPTʼAN
Mi lac pʌs cʼuxbiya cheʼ bʌ maʼañic mi lac ñochtan jiñi muʼ bʌ i chaʼlentel ti expulsar
Cheʼ bʌ an majqui miʼ chaʼlentel ti expulsar miʼ yʌcʼ chaʼan wen miʼ yajñel jiñi congregación yicʼot chaʼan miʼ yʌqʼuentel ticʼojel jiñi tsaʼ bʌ i mele mulil (1 Co. 5:6, 11). Mi lac pʌs cʼuxbiya cheʼ bʌ maʼañic mi lac ñochtan jiñi muʼ bʌ i chaʼlentel ti expulsar. Cheʼ bʌ an majqui miʼ chaʼlentel ti expulsar, mucʼʌch i yʌcʼ cabʌl chʼijyemlel, ñumen chʼijyemto jiñi i familiajob jiñi tsaʼ bʌ chaʼlenti ti expulsar yicʼot jiñi comité chaʼan meloñel. Jin chaʼan, ¿bajcheʼ an i sujmlel cheʼ bʌ mi lac pʌs laj cʼuxbiya?
Ñaxam bʌ, mi lac pʌs chaʼan mi laj qʼuel ti ñuc yicʼot chaʼan mi laj cʼuxbin jiñi i cʼabaʼ Jehová yicʼot jiñi chʼujul tac bʌ i mandar muʼ bʌ i yʌl bajcheʼ yilal yom lac melbal (1 P. 1:14-16). Cheʼ jaʼel, woli lac pʌsben cʼuxbiya jiñi tsaʼ bʌ chaʼlenti ti expulsar. Anquese cʼuxʌch cheʼ bʌ an majqui miʼ chaʼlentel ti expulsar, ‹miʼ yʌcʼ ti pʼojlel toj bʌ i pusicʼal yicʼot i ñʌchʼtʌlel i pusicʼal› (He. 12:5, 6, 11). Mi maʼañic mi laj cʌy lac ñochtan jiñi tsaʼ bʌ chaʼlentiyob ti expulsar o jiñi tsaʼ bʌ i cʌyʌyob ajñel bajcheʼ i testigojob Jehová, woli lac mʌctan Jehová chaʼan miʼ coltan i tojʼesan i melbal. Cʼajtesan chaʼan Jehová miʼ yʌqʼuen ticʼojel juntiquil quixtañu cheʼ bajcheʼ cʼamel yom (Jer. 30:11). Laʼ lac chʌn jacʼben i ticʼojel Jehová yicʼot laʼ lac chʌn melben i yeʼtel chaʼan chʌn lʌcʼʌl mi la cajñel tiʼ tojlel. Mi lac pijtan chaʼan jiñi tsaʼ bʌ i cʌyʌyob Jehová miʼ chaʼ sujtelob (Is. 1:16-18; 55:7).
CHEʼ BɅ TSAʼIX LAʼ QʼUELE JIÑI VIDEO YOM TI JUMPʼEJL LAC PUSICʼAL XUCʼUL MI LA CAJÑEL TIʼ TOJLEL JEHOVÁ, JACʼɅ ILI CʼAJTIYA TAC:
¿Bajcheʼ yubil miʼ yubiñob jiñi tatʌlob cheʼ bʌ jiñi i yalobilob miʼ cʌyob Jehová?
¿Bajcheʼ miʼ mejlel i chaʼleñob coltaya jiñi congregación?
¿Chuqui ti ejemplo am bʌ ti Biblia miʼ pʌs chaʼan ñumen ñuc i cʼʌjñibal cheʼ bʌ xucʼul mi la cajñel la quicʼot Jehová i mach jiñic cheʼ xucʼul mi la cajñel la quicʼot lac familia?
¿Bajcheʼ mi lac pʌs chaʼan xucʼulonla ti Jehová i mach jiñic ti lac familia?