¿Bajcheʼ mi lac mejlel ti coltaya cheʼ bʌ miʼ yujtel jumpʼejl wocol?

Ili ora muqʼuix i ñumen ujtel wocol tac bajcheʼ icʼ jaʼal, yujquel lum o yan tac bʌ. Jin chaʼan cheʼ bʌ miʼ yujtel ili wocol tac, yomʌch wen chajpʌbilob jiñi muʼ bʌ i chaʼleñob coltaya. Jiñi Junmojt muʼ bʌ i pʌsob bij an i sube pejtelel jiñi sucursal tac chaʼan yom añob i chaʼan jiñi Departamento chaʼan labores de socorro.

Cheʼ bʌ jiñi hermanojob ti jiñi departamento miʼ yubiñob chaʼan tsaʼ ujti jumpʼejl wocol bajcheʼ icʼ jaʼal o yan tac bʌ, ti ora miʼ pejcañob jiñi ancianojob baqui tsaʼ ujti jiñi wocol chaʼan miʼ cʼajtiñob mi an chuqui i cʼʌjñibal i chaʼañob. Mi wen tsʌtsʌch tsaʼ ñumi jiñi wocol i jiñi hermanojob maʼañic miʼ bajñel mejlelob, jiñi sucursal mi caj i sʌclan yambʌ hermanojob wen chajpʌbiloʼ bʌ chaʼan miʼ qʼuelob jiñi eʼtel tac yom bʌ miʼ mejlel. Ili hermanojob tajol mi caj i sʌclan yambʌlob chaʼan miʼ chaʼleñob coltaya o tajol miʼ cʼajtiñob o miʼ mʌñob bʌlñʌcʼʌl o yan tac bʌ i cʼʌjñibal bʌ yaʼ baqui tsaʼ ujti wocol.

Añʌch i wenlel cheʼ chajpʌbil chuqui miʼ mejlel yaʼ baqui miʼ yujtel wocol tac. Jumpʼejl ejemplo, ili miʼ coltan chaʼan wen jach bajcheʼ miʼ mejlel jiñi eʼtel tac, wen jach miʼ cʼʌjñel jiñi taqʼuin yicʼot yan tac bʌ.

Jiñi hermanojob muʼ bʌ i waʼchocontelob ti jiñi sucursal miʼ mejlel i yʌlob jaypʼejl taqʼuin mi caj i cʼʌjñel i jaytiquil mi caj i chaʼleñob coltaya. Cheʼ jaʼel, miʼ mejlelob i pejcan jiñi añoʼ bʌ i yeʼtel chaʼan maʼañic miʼ tajtʌl wocol. Jin chaʼan, a wocolic, mach a tech a tempan taqʼuin o bʌlñʌcʼʌl mi maʼañic woli a subentel.

I sujmʌch chaʼan la com laj coltan jiñi la quermañujob cheʼ miʼ yujtel wocol come mi laj cʼuxbiñob (Heb 13:16). Jin chaʼan, ¿chuqui miʼ mejlel lac mel? Miʼ mejlel lac mel oración tiʼ tojlelob jiñi woli bʌ i ñusañob wocol yicʼot jiñi woli bʌ i chaʼleñob coltaya, i cheʼ jaʼel miʼ mejlel la cʌcʼ lac donación. Jiñi ñumen yujil bʌ baqui yicʼot bajcheʼ miʼ mejlel ti cʼʌjñel jiñi donación jiñʌch jiñi sucursal. I mi la com lac chaʼlen coltaya, miʼ mejlel lac butʼ jiñi Solicitud de voluntario local de diseño y construcción (DC-50).

CHEʼ BɅ TSAʼIX LAʼ QʼUELE JIÑI VIDEO JIÑI BUTʼJAʼ TSAʼ BɅ UJTI TI BRASIL, JACʼɅLA ILI CʼAJTIYA:

¿Chuqui miʼ yʌcʼ ti toj sajtel a pusicʼal chaʼan jiñi coltaya tsaʼ bʌ yʌcʼʌyob jiñi i testigojob Jehová yaʼ ti Brasil cheʼ bʌ tsaʼ ujti jiñi butʼjaʼ?