Laʼ bej ajñiconla tiʼ sujmlel

1. ¿Chucoch weñʌch cheʼ bʌ mi la cʌl bajcheʼ tsaʼ laj cʌñʌ «jiñi i sujmlel»?

«¿BAJCHEʼ tsaʼ cʌñʌ jiñi i sujmlel?». Miʼ mejlel la cʌl chaʼan añʌch lac jacʼʌ ili cʼajtiya. I mi lac wen melbentel cheʼ bʌ mi laj cʌn yambʌ hermanojob. Mi lac wen mulan la cubin bajcheʼ tsiʼ cʌñʌyob i sujmlel yicʼot tsaʼ cʼoti i cʼuxbiñob Jehová jiñi yambʌlob. I cheʼ jaʼel mi lac mulan la cʌl bajcheʼ yilal mi laj qʼuel jiñi i sujmlel (Rom. 1:11). Iliyi miʼ cʼajtesʌbeñonla chaʼan jumpʼejlʌch ñuc bʌ majtañʌl cheʼ i testigojonla Jehová. Cheʼ jaʼel, miʼ coltañonla chaʼan la com bej ajñel «ti jiñi i sujmlel», yom i yʌl chaʼan la com lac bej aqʼuen i tijicñʌyel Jehová yicʼot la com i bendición (3 Juan 4).

2. ¿Chuqui mi caj laj qʼuel ti ili estudio?

² Ti ili estudio mi caj laj cʼajtesan chucoch mi laj cʼuxbin jiñi i sujmlel. Cheʼ jaʼel, mi caj laj qʼuel bajcheʼ miʼ mejlel lac bej pʌs chaʼan mi lac wen qʼuel ti ñuc ili utsʼatax bʌ majtañʌl. I jiñi mi caj i coltañonla chaʼan mi lac wen qʼuel ti ñuc cheʼ Jehová tsiʼ pʌyʌyonla ochel tiʼ sujmlel (Juan 6:44). I mi caj lac ñumen mulan lac suben yambʌlob jiñi i sujmlel.

¿CHUCOCH MI LAJ CʼUXBIN «JIÑI I SUJMLEL»?

3. ¿Chuqui jiñi ñumen ñuc bʌ i cʼʌjñibal miʼ yʌqʼueñonla laj cʼuxbin jiñi i sujmlel?

³ Cabʌl chucoch mi laj cʼuxbin jiñi i sujmlel. Jiñi ñumen ñuc bʌ i cʼʌjñibal jiñʌch chaʼan mi laj cʼuxbin Jehová, baqui tilem jiñi i sujmlel. Jiñi Biblia an i coltayonla laj cʌn chaʼan jiñʌch jiñi Dios mach bʌ añic i pʼisol i pʼʌtʌlel tsaʼ bʌ i mele (pʌtʌ) jiñi panchan yicʼot jiñi Pañimil. I chaʼan jiñʌch lac Tat am bʌ ti panchan, muʼ bʌ i cʼuxbiñonla yicʼot i wentajoñʌchla (1 Ped. 5:7). La cujil chaʼan juntiquilʌch Dios yujil bʌ pʼuntaya, uts bʌ, mach ti orajic miʼ michʼan, miʼ wen pʼuntañonla yicʼot xucʼul (Éx. 34:6). Miʼ mulan cheʼ miʼ mejlel chuqui toj (Is. 61:8). Jehová cʼux miʼ yubin cheʼ bʌ miʼ qʼuel chaʼan mi lac ñusan wocol i yomix i jisan pejtelel jiñi wocol ti jiñi i yorajlel ñaʼtʌbil bʌ i chaʼan (Jer. 29:11). ¡Wen la comix chaʼan miʼ cʼotel jiñi qʼuin! Jin chaʼan mucʼʌch lac wen cʼuxbin Jehová.

4, 5. ¿Chucoch tsiʼ yʌlʌ jiñi apóstol Pablo chaʼan jiñi lac pijtaya lajal bajcheʼ jumpʼejl ancla?

⁴ Jiñi i sujmlel miʼ wen coltañonla ti laj cuxtʌlel, jin chaʼan mi lac wen cʼuxbin jaʼel. Laʼ laj qʼuel jumpʼejl ejemplo. Junchajp cʌmbil bʌ lac chaʼan yaʼ ti Biblia jiñʌch jiñi lac pijtaya. Pablo tsiʼ pʌsʌ chaʼan wen ñucʌch i cʼʌjñibal iliyi cheʼ bʌ tsiʼ yʌlʌ: «Ili pijtaya i sujm bʌ yicʼot xucʼul bʌ am bʌ lac chaʼan lajal bajcheʼ jumpʼejl ancla chaʼan laj cuxtʌlel» (Heb. 6:19). Cheʼ bajcheʼ jumpʼejl ancla miʼ xucʼchocon juncojt barco, jiñi pijtaya am bʌ ti Biblia miʼ xucʼchocoñonla yicʼot miʼ coltañonla cheʼ bʌ miʼ tilel wocol tac.

⁵ Cheʼ bʌ Pablo tsiʼ yʌlʌ iliyi, woli (choncol) i ñaʼtan jiñi pijtaya añoʼ bʌ i chaʼan jiñi xñoptʼañob muʼ bʌ caj i majlelob ti panchan. Pero jiñi tsaʼ bʌ i yʌlʌ miʼ coltan jaʼel jiñi muʼ bʌ caj i chumtʌlob tiʼ pejtelel ora ila ti Lum cheʼ bʌ sujtemix ti jumpʼejl paraíso (Juan 3:16). Tiʼ sujm, jiñi lac pijtaya chaʼan mi caj lac chumtʌl tiʼ pejtelel ora tsiʼ yʌqʼue i sujmlel laj cuxtʌlel.

6, 7. ¿Bajcheʼ tsiʼ colta Yvonne muʼ bʌ i yʌl jiñi Biblia chaʼan jiñi talto bʌ qʼuin?

⁶ Laʼ laj qʼuel chuqui tsaʼ ujti tiʼ tojlel juntiquil hermana i cʼabaʼ Yvonne. Cheʼ bʌ alʌlto miʼ bʌcʼñan chʌmel (sajtel) come maʼañic tsaʼ coli tiʼ sujmlel. Cʼajal i chaʼan chaʼan ti jumpʼejl bʌ qʼuin tsaʼ toj sajti i pusicʼal cheʼ bʌ tsiʼ pejca ti jumpʼejl libro iliyi: «Ti jumpʼejl bʌ qʼuin maʼañix mi caj lac sʌcʼan». Yvonne miʼ yʌl: «Jiñi tsaʼ bʌ c pejca maʼañic miʼ yʌcʼon ti wʌyel ti acʼʌlel come mic ñaʼtan jiñi talto bʌ qʼuin. Mic suben c bʌ: ‹Mi cʌl añixto i sujmlel jiñi cuxtʌlel. ¿Chucoch cuxulon?›. ¡Mach comic chʌmel!».

⁷ Yvonne tsiʼ cʌñʌ jiñi i testigojob Jehová cheʼ bʌ ñuquix cajel. Miʼ yʌl: «Tsaʼ caji c ñop chaʼan mic mejlel ti chumtʌl tiʼ pejtelel ora ti jumpʼejl Paraíso». Yvonne miʼ yʌl bajcheʼ tsiʼ colta cheʼ bʌ tsiʼ cʌñʌ jiñi i sujmlel: «Muqʼuix c mejlel ti wʌyel ti acʼʌlel come maʼañix mic chʌn ñaʼtan jiñi talto bʌ qʼuin o jiñi chʌmel». Yvonne miʼ wen qʼuel ti ñuc jiñi i sujmlel, i miʼ mulan i suben yambʌlob jiñi i pijtaya (1 Tim. 4:16).

8, 9. a) ¿Bajcheʼ tsiʼ pʌsʌ jiñi wiñic tsaʼ bʌ i taja ti tʼan Jesús chaʼan mucʼʌch i qʼuel ti ñuc jiñi tsaʼ bʌ i taja? b) ¿Bajcheʼ yilal maʼ qʼuel jiñi i sujmlel?

⁸ Jiñi wen tʼan chaʼan i Yumʌntel Dios yaʼʌch ochem jaʼel ti jiñi i sujmlel am bʌ ti Biblia. Jesús tsiʼ laji jiñi i sujmlel chaʼan bʌ jiñi Yumʌntel bajcheʼ chubʌʼañʌl lets bʌ i tojol. Tsiʼ yʌlʌ: «Jiñi i Yumʌntel panchan lajalʌch bajcheʼ chubʌʼañʌl wen lets bʌ i tojol mucbil bʌ ti jumpejt lum tsaʼ bʌ i taja juntiquil wiñic. Jiñi wiñic tsiʼ chaʼ mucu, i chaʼan i tijicñʌyel, tsaʼ majli i tsiʼ choño pejtelel chuqui an i chaʼan i tsiʼ mʌñʌ jiñi lum» (Mat. 13:44). Cheʼ bajcheʼ mi laj qʼuel, jiñi wiñic maʼañic woli (yʌquel) i yilol sʌclan chubʌʼañʌl wen lets bʌ i tojol. Pero cabʌl chuqui tsiʼ mele (chaʼle) cheʼ bʌ tsiʼ taja: Tsiʼ luʼ choño pejtelel chuqui an i chaʼan. ¿I chucoch tsiʼ mele jiñi? Come yujil chaʼan ñumen ñuc i cʼʌjñibal jiñi, maʼañic miʼ laj i bʌ yicʼot pejtelel chuqui yan tac bʌ.

⁹ ¿Cheʼ ba yilal maʼ qʼuel jaʼel jiñi i sujmlel? ¡Mi la cʌl chaʼan cheʼʌchi! La cujil chaʼan pejtelel muʼ bʌ i yʌqʼueñonla jiñi pañimil (mulawil) maʼañic miʼ laj i bʌ yicʼot jiñi tijicñʌyel muʼ bʌ lac taj cheʼ bʌ mi lac melben i yeʼtel (troñel) Jehová i yicʼot jiñi lac pijtaya chaʼan mi lac chumtʌl tiʼ pejtelel ora cheʼ bʌ wolix i mel i yeʼtel jiñi i Yumʌntel Dios ila ti Lum. Ñucʌch i cʼʌjñibal pejtelel muʼ bʌ lac mel chaʼan lʌcʼʌl mi la cajñel tiʼ tojlel Jehová. Jumpʼejlʌch ñuc bʌ lac majtan cheʼ i yamigojonla. I maʼañic yambʌ muʼ bʌ i ñumen aqʼueñonla lac tijicñʌyel, cojach cheʼ mi lac mel muʼ bʌ i mulan (Col. 1:10).

10, 11. ¿Chuqui tsiʼ colta Michael chaʼan miʼ qʼuextan i bʌ?

¹⁰ Cabʌl xñoptʼañob cabʌl chuqui tsiʼ cʌyʌyob chaʼan miʼ yʌqʼueñob i tijicñʌyel Jehová. An tsaʼ bʌ i cʌyʌyob ñuc tac bʌ i yeʼtel. Tsiʼ cʌyʌyob i sʌclan chubʌʼañʌl tac. I yambʌlob tsiʼ junyajl qʼuextayob i cuxtʌlel cheʼ bʌ tsiʼ cʌñʌyob Jehová. Jiñʌch tsaʼ bʌ ujti tiʼ tojlel Michael, mach bʌ xñoptʼañic tsaʼ coli. Cheʼ bʌ chʼitonto tsiʼ cʌñʌ artes marciales. Miʼ yʌl: «Wen tijicñayon tiʼ caj poj wen pʼʌtʌlon. […] An i tajol maʼañix majqui miʼ mʌlbeñon (jotbeñon) mi cubin». Pero tsaʼ caji i chʼʌm estudio, i tsiʼ cʌñʌ bajcheʼ yilal miʼ qʼuel Jehová jiñi jatsʼ (Sal. 11:5). Tiʼ tojlel jiñi xñujpuñel Testigo bʌ tsaʼ bʌ i yʌqʼue estudio, miʼ yʌl: «Maʼañic tiʼ subeyoñob chaʼan mij cʌy jiñi artes marciales. Tsaʼ jach i pʌsbeyoñob jiñi i sujmlel».

¹¹ Cheʼ bʌ Michael tsaʼ caji i ñumen cʌn Jehová, tsaʼ caji i ñumen cʼuxbin. Junchajp tsaʼ bʌ wen cʼoti tiʼ pusicʼal jiñʌch cheʼ bʌ tsiʼ cʌñʌ chaʼan Dios miʼ wen pʼuntan jiñi i wiñicob. Michael tsiʼ chʼʌmbe i sujm chaʼan yomʌch miʼ qʼuextan jiñi i cuxtʌlel. Miʼ yʌl: «Tsaʼʌch c ñaʼta chaʼan jiñi ñumen wocol bʌ mi caj cubin jiñʌch cheʼ bʌ mij cʌy jiñi karate. Pero cujil jaʼel chaʼan wen mi caj i qʼuelon Jehová mi mucʼʌch j cʌy jiñi karate, i cujil jaʼel chaʼan mach toʼolic mi lac melben i yeʼtel». Michael tsaʼʌch i qʼuele ti ñuc jiñi i sujmlel tsaʼ bʌ i taja, i jiñʌch tsaʼ bʌ i colta chaʼan miʼ qʼuextan i bʌ (Sant. 1:25).

12, 13. ¿Bajcheʼ tsiʼ colta Mayli jiñi i sujmlel am bʌ ti Biblia?

¹² Chaʼan miʼ pʌstʌl chaʼan wen ñuc i cʼʌjñibal jiñi i sujmlel, jiñi Biblia miʼ lajin bajcheʼ lámpara tsiquil bʌ i cʼʌcʼal baqui icʼyochʼan (Sal. 119:105; Efes. 5:8). Mayli, chʼoyol bʌ ti Azerbaiyán, miʼ wen qʼuel ti ñuc cheʼ jiñi i Tʼan Dios tsiʼ pʌsbe i bijlel. Chaʼchajp i ñopbal jiñi i familia: Jiñi i papá musulmán i jiñi i mamá judía. Mayli miʼ yʌl: «Cujil chaʼan añʌch Dios, pero an tac chuqui maʼañic bʌ mic chʼʌmben i sujm. Tsaʼ caji j cʼajtiben c bʌ: ‹¿Chucoch tsiʼ meleyonla? ¿Chucoch mi lac ñusan wocol cheʼ cuxulontola i ti wiʼil mi lac ñusan wocol ti infierno?›. Jiñi lac piʼʌlob miʼ yʌlob chaʼan pejtelel chuqui miʼ yujtel jiñʌch yom bʌ Dios, i jiñi tsiʼ yʌcʼʌyon ti pensar: ‹¿I yʌlason jachbala Dios? ¿Muʼ ba i mulan i qʼuel cheʼ mi lac ñusan wocol?›».

¹³ Mayli tsiʼ bej sʌclʌbe i jacʼbal jiñi i cʼajtiya tac. Cheʼ jiñi, tsiʼ chʼʌmʌ estudio i tsaʼ sujti tiʼ testigo Jehová. Miʼ yʌl: «Jiñi Biblia tsiʼ coltayon chaʼan yambʌ bajcheʼ mij qʼuel jiñi j cuxtʌlel i tsiʼ yʌqʼueyon c ñʌchʼtʌlel». Cheʼ bajcheʼ Mayli, ti lac pejtelel muʼ bʌ lac melben i yeʼtel Jehová mi la cʌqʼuen i ñuclel come tsiʼ pʌyʌyonla loqʼuel baqui icʼyochʼan chaʼan mi la cajñel «baqui an jiñi utsʼatax bʌ sʌcjamañiyel» (1 Ped. 2:9).

14. ¿Chuqui miʼ mejlel lac mel chaʼan mi lac ñumen cʼuxbin jiñi i sujmlel? (Qʼuele jaʼel jiñi recuadro «Yambʌ lajiya tac»).

¹⁴ Jiñi ejemplo tac tsaʼ bʌ laj qʼuele ti ili párrafo tac miʼ pʌs chaʼan wen ñucʌch i cʼʌjñibal jiñi i sujmlel. Tajol miʼ tilel ti lac jol yan tac bʌ muʼ bʌ i pʌs chucoch wen ñucʌch i cʼʌjñibal. ¿Ixcu cheʼ muqʼuic laj qʼuel chuqui yan tac bʌ miʼ yʌqʼueñonla laj cʼuxbin jiñi i sujmlel? Cheʼ bʌ mi lac ñumen cʼuxbin jiñi i sujmlel, mi caj lac ñumen pʌs chaʼan mucʼʌch laj cʼuxbin.

¿BAJCHEʼ MI LAC PɅS CHAʼAN MI LAJ CʼUXBIN JIÑI I SUJMLEL?

15. ¿Bajcheʼ junchajp miʼ mejlel lac pʌs chaʼan mi laj cʼuxbin jiñi i sujmlel?

¹⁵ Junchajp bajcheʼ mi lac pʌs chaʼan mi laj cʼuxbin jiñi i sujmlel jiñʌch cheʼ bʌ mi lac pejcan ti jujumpʼejl qʼuin jiñi Biblia yicʼot jiñi lac jun tac. Mach yʌlʌlic jaypʼejlix jab ochemonla tiʼ sujmlel, añʌch chuqui tac miʼ mejlel lac tsijib cʌn. Jiñi ñaxam bʌ número chaʼan ili revista ti inglés tsiʼ yʌlʌ: «Jiñi i sujmlel lajalʌch bajcheʼ jumpʼejl ñichteʼ am bʌ tiʼ tiquiñal pañimil, joyol bʌ ti mateʼel yomix bʌ i tsʌnsan. Mi a wom a taj, yom chʌn yʌxʌl a wo, [...] chaʼan miʼ mejlel a chʼʌm, yom maʼ ñuctʌl a tucʼ. Mach jasʌlic yom mi a wubin mi tsaʼix a taja jumpʼejl. [...] Chʌn sʌclan yicʼot loto». Chaʼan mi lac chaʼlen estudio, yomʌch mi lac chaʼlen wersa, pero mucʼʌch caj laj qʼuelben i wenlel.

16. ¿Bajcheʼ maʼ chaʼlen estudio chaʼan maʼ locʼsʌben i wenlel? (Proverbios 2:4-6).

¹⁶ Mach ti lac pejtelelic mi lac mulan leer yicʼot jiñi estudio, pero Jehová miʼ subeñonla chaʼan mi lac chʌn sʌclan jiñi i ñaʼtʌbal chaʼan mi lac ñaʼtan ti wen jiñi i sujmlel (pejcan Proverbios 2:4-6). Mi mucʼʌch lac chaʼlen wersa lac mel, mi caj lac taj lac wenlel. Juntiquil hermano i cʼabaʼ Corey miʼ yʌl chaʼan cheʼ bʌ miʼ pejcan jiñi Biblia ti jujumpʼejl jach versículo miʼ yʌcʼ majlel i ñaʼtʌbal. Miʼ yʌl: «Mic pejcan jiñi nota tac, mic sʌclan jiñi referencias marginales yicʼot mic mel investigación. […] Cheʼ bajcheʼ jiñi, mic locʼsʌben i wenlel jiñi woli bʌ c pejcan». Mach yʌlʌyic bajcheʼ mi lac chaʼlen estudio, mi mucʼʌch la cʌqʼuen i yorajlel yicʼot mi lac chaʼlen wersa, woli lac pʌs chaʼan mi laj qʼuel ti ñuc jiñi i sujmlel (Sal. 1:1-3).

17. ¿Chuqui yom i yʌl cheʼ mi lac chumtan jiñi i sujmlel? (Santiago 1:25).

¹⁷ Pero mach jasʌlic jach cheʼ mi laj cʌn jiñi i sujmlel. Chaʼan miʼ ñumen coltañonla, yomʌch mi lac chumtan jaʼel, ili yom i yʌl chaʼan yomʌch mi lac jacʼ jiñi muʼ bʌ laj cʌn. Cheʼ bajcheʼ jiñi mi caj i yʌqʼueñonla i sujm bʌ tijicñʌyel (pejcan Santiago 1:25). ¿I bajcheʼ miʼ mejlel lac ñaʼtan mi wolʌch lac chumtan jiñi i sujmlel? Juntiquil hermano miʼ yʌl chaʼan yom mi lac wen qʼuel lac bʌ chaʼan mi lac ñaʼtan chuqui tac weñʌch woli lac mel yicʼot chuqui tac yom mi lac tojʼesan. Jiñi apóstol Pablo tsiʼ yʌlʌ: «Mach yʌlʌyic bajcheʼix cʼamel lac taja laj colel, toj yom mi lac bej chaʼlen xʌmbal ti jin jach bʌ bij» (Filip. 3:16).

18. ¿Chucoch mi lac chaʼlen wersa chaʼan mi lac bej ajñel ti jiñi i sujmlel?

¹⁸ Laʼ lac ñaʼtan pejtelel chuqui wen tac bʌ miʼ yujtel ti lac tojlel cheʼ bʌ mi lac chaʼlen wersa chaʼan mi lac bej ajñel ti jiñi i sujmlel. Mach muqʼuic jach i coltañonla ti laj cuxtʌlel, miʼ yʌqʼuen i tijicñʌyel jaʼel Jehová yicʼot jiñi la quermañujob (Pr. 27:11; 3 Juan 4). ¡Pejtelel iliyi miʼ coltañonla chaʼan mi laj cʼuxbin jiñi i sujmlel yicʼot chaʼan mi lac chumtan!