¿Bajcheʼ miʼ mejlel la cubin lac ñʌchʼtʌlel cheʼ bʌ mi lac ñusan wocol tac?

1. ¿Chuquiyes «jiñi i ñʌchʼtʌlel Dios», i bajcheʼ miʼ coltañonla? (Filipenses 4:6, 7).

JIÑI i pañimil (mulawil) Satanás mach i cʌñʌyic «jiñi i ñʌchʼtʌlel Dios», ili jiñʌch muʼ bʌ i yubin juntiquil lac piʼʌl lʌcʼʌl bʌ an ti Jehová. Cheʼ bʌ an lac chaʼan i ñʌchʼtʌlel Dios, maʼañic chuqui mi lac bʌcʼñan (pejcan Filipenses 4:6, 7). La camigojob jiñi muʼ bʌ i cʼuxbiñob Jehová yicʼot lʌcʼʌl añonla tiʼ tojlel jiñi «Dios chaʼan bʌ ñʌchʼtʌlel» (1 Tes. 5:23). Mi lac taj jiñi i ñʌchʼtʌlel Dios cheʼ bʌ mi laj cʌn, mi lac ñop tiʼ tojlel yicʼot mi lac jacʼben i tʼan. Ili ñʌchʼtʌlel miʼ tijicñesan lac pusicʼal cheʼ bʌ mi lac ñusan wocol tac.

2. ¿Bajcheʼ la cujil chaʼan mucʼʌch i mejlel lac taj jiñi i ñʌchʼtʌlel Dios?

² ¿Mucʼʌch ba i mejlel la cubin i ñʌchʼtʌlel Dios cheʼ bʌ mi lac ñusan wocol tac? ¿Mucʼʌch ba i mejlel la cubin ñʌchʼtʌlel cheʼ bʌ miʼ tejchel jumpʼejl cʼamʌjel, yambʌ wocol tac o lac tsʼaʼlentel? Ili wocol tac mucʼʌch i mejlel i bʌcʼtesañonla. Pero Jesús tsiʼ yʌqʼue ili ticʼojel jiñi xcʌntʼañob i chaʼan: «Mach yomic mi laʼ cʼojoʼtan laʼ bʌ yicʼot laʼ chaʼlen bʌqʼuen» (Juan 14:27). Cabʌl hermanojob añʌch i meleyob (chaʼleyob) tsaʼ bʌ i yʌlʌ Jesús. Jehová an i coltayob chaʼan miʼ yubiñob jiñi ñʌchʼtʌlel cheʼ bʌ miʼ ñusañob tsʌts tac bʌ wocol.

MIʼ MEJLEL LA CUBIN ÑɅCHʼTɅLEL CHEʼ BɅ AN JUMPʼEJL CʼAMɅJEL

3. ¿Bajcheʼ miʼ mejlel i chilbeñonla lac ñʌchʼtʌlel jumpʼejl cʼamʌjel muʼ bʌ i pam pujquel?

³ Jumpʼejl cʼamʌjel muʼ bʌ i pam pujquel mucʼʌch i tech cabʌl wocol. Laʼcu lac ñaʼtan bajcheʼ an i ticʼla yonlel lac piʼʌlob jiñi COVID-19. Jumpʼejl estudio tsaʼ bʌ mejli tsiʼ pʌsʌ chaʼan ojlil tsaʼ bʌ melbentiyob jiñi encuesta tsiʼ yʌlʌyob chaʼan maʼañic miʼ wen mejlelob ti wʌyel tiʼ yorajlel jiñi pandemia. Cheʼ jaʼel, tsaʼ ñumen pʼojli jiñi añoʼ bʌ i chaʼan ansiedad, depresión, muʼ bʌ i japob lembal, muʼ bʌ i cʼʌñob droga, muʼ bʌ i jajtsʼelob tiʼ yotot yicʼot tsaʼ bʌ i ñopoyob i tsʌnsan i bʌ. Mi yaʼ baqui chumulet an jumpʼejl cʼamʌjel bajcheʼ iliyi, ¿chuqui miʼ mejlel a mel chaʼan maʼañic miʼ ticʼlañet jiñi ansiedad yicʼot chaʼan maʼ taj jiñi i ñʌchʼtʌlel Dios?

4. ¿Chucoch miʼ yʌqʼueñonla ñʌchʼtʌlel cheʼ bʌ mi laj cʌn tsaʼ bʌ i wʌn alʌ Jesús chaʼan jiñi cojix tac bʌ qʼuin?

⁴ Jesús tsiʼ wʌn alʌ chaʼan ti cojix bʌ qʼuin miʼ cajel cʼamʌjel tac muʼ bʌ i pam pujquel «ti cabʌl tejclum» (Luc. 21:11). Cheʼ la cujil iliyi miʼ yʌqʼueñonla ñʌchʼtʌlel. ¿Chucoch? Come la cujilix chaʼan mi caj i yujtel i maʼañix miʼ yʌcʼ ti toj sajtel lac pusicʼal. Mi laj qʼuel chaʼan cheʼʌch woli (choncol) i yujtel cheʼ bajcheʼ tsiʼ yʌlʌ Jesús. Jin chaʼan, mi lac jacʼ jiñi ticʼojel tsaʼ bʌ i yʌqʼue jiñi muʼ bʌ i chumtʌlob ti jiñi cojix tac bʌ qʼuin. Tsiʼ yʌlʌ: «Tsajaletla, mach laʼ bʌcʼñan» (Mat. 24:6).

5. a) Cheʼ bajcheʼ miʼ yʌl Filipenses 4:8, 9, ¿chuqui yom mi laj cʼajtiben Jehová cheʼ bʌ miʼ tejchel jumpʼejl cʼamʌjel? b) ¿Bajcheʼ miʼ coltañonla cheʼ mi lac ñʌchʼtan i audiojlel jiñi Biblia?

⁵ Mucʼʌch lac bʌcʼñan cheʼ bʌ miʼ tejchel jumpʼejl cʼamʌjel. Jiñʌch tsaʼ bʌ ujti tiʼ tojlel juntiquil hermana i cʼabaʼ Desi.b Cheʼ bʌ tsaʼ chʌmi (sajti) tiʼ caj COVID-19 jiñi i tío, i primo yicʼot jiñi i doctor, tsiʼ bʌcʼña miʼ cʼamʼan jaʼel yicʼot miʼ cʼamʼan i mamá, ñoxix bʌ. Cheʼ jaʼel, tsiʼ bʌcʼña chaʼan miʼ sʌt i yeʼtel (troñel), i tsiʼ cʼajtibe i bʌ baqui mi caj i taj jiñi taqʼuin chaʼan i bʌl i ñʌcʼ yicʼot chaʼan miʼ toj jiñi i renta. Maʼañic miʼ cʌy i ñaʼtan iliyi i maʼañix miʼ mejlel ti wʌyel. Pero tsaʼʌch i chaʼ taja i ñʌchʼtʌlel. ¿Bajcheʼ? Jamʌ tsiquil chuqui tsiʼ yʌlʌ tiʼ yoración chaʼan Jehová miʼ coltan i chaʼ taj i ñʌchʼtʌlel yicʼot chaʼan miʼ ñaʼtan chuqui wem bʌ (pejcan Filipenses 4:8, 9). Chaʼan miʼ «ñʌchʼtan» Jehová, tsaʼ caji i ñʌchʼtan i audiojlel jiñi Biblia. Miʼ yʌl: «Jiñi audio miʼ coltañon chaʼan maʼañic mij cʌlʌx chaʼlen pensar yicʼot miʼ cʼajtesʌbeñon chaʼan Jehová i wentajoñʌch» (Sal. 94:19).

6. ¿Bajcheʼ miʼ coltañonla cheʼ bʌ mucʼʌch lac chaʼlen estudio yicʼot mi lac majlel ti tempa bʌ?

⁶ Tiʼ sujm mucʼʌch i wen ticʼlañonla cheʼ bʌ miʼ tejchel jumpʼejl cʼamʌjel. Pero mach la cʌcʼ chaʼan ili miʼ mʌctañonla chaʼan mi lac chaʼlen estudio o mi lac majlel ti tempa bʌ. Yaʼ ti lac jun tac yicʼot video tac mi lac taj experiencia tac muʼ bʌ i cʼajtesʌbeñonla chaʼan jiñi la quermañujob wolʌch i ñusañob wocol tac lʌcʼʌ lajal bʌ bajcheʼ jiñi i chʌn xucʼul miʼ yajñelob ti Jehová (1 Ped. 5:9). Jiñi tempa bʌ tac miʼ coltañonla la cotsan texto tac ti lac jol, miʼ mejlel lac tijicñesan yambʌlob yicʼot mi lac tijicñesʌntel jaʼel (Rom. 1:11, 12). Jiñi lac ñopoñel mi caj i pʼʌtʼan i mi caj lac ñop chaʼan Jehová mi caj i coltañonla jaʼel cheʼ mi lac ñaʼtan bajcheʼ an i colta jiñi i wiñicob cheʼ bʌ cʼamob, woliyob ti bʌqʼuen o i bajñel miʼ yubiñob i bʌ.

7. ¿Bajcheʼ miʼ mejlel lac lajin jiñi apóstol Juan?

⁷ Laʼ lac chaʼlen wersa chaʼan maʼañic mi laj cʌy lac pejcan jiñi la quermañujob. Jumpʼejl cʼamʌjel miʼ mejlel i mʌctañonla chaʼan mi lac lʌcʼtesan lac bʌ la quicʼot yambʌlob yicʼotto cheʼ bʌ añonla la quicʼot la quermañujob. Tajol cheʼ mi la cubin lac bʌ bajcheʼ jiñi apóstol Juan, yom bʌ i qʼuel jiñi i yamigo Gayo (3 Juan 13, 14). Pero yujil chaʼan maʼañic mi caj i mejlel i qʼuel. Jin chaʼan tsiʼ chocbe majlel jumpʼejl carta. Mi maʼañic miʼ mejlel laj qʼuel lac bʌ la quicʼot la quermañujob, miʼ mejlel lac melbeñob jumpʼejl llamada, videollamada o mi lac chocbeñob majlel jumpʼejl mensaje. Cheʼ bʌ maʼañic mi laj cʌy lac pejcan lac bʌ la quicʼot la quermañujob, mach lac bajñelic mi caj la cubin lac bʌ yicʼot mi caj la cubin lac tijicñʌyel. I mi wen woliyonla ti pensar, laʼ lac pejcan jiñi ancianojob i laʼ la cʌcʼ lac bʌ ti coltʌntel (Is. 32:1, 2).

MIʼ MEJLEL LA CUBIN ÑɅCHʼTɅLEL CHEʼ BɅ MIʼ ÑUMEL YAMBɅ WOCOL TAC

8. ¿Bajcheʼ miʼ mejlel i chilbeñet a ñʌchʼtʌlel jumpʼejl wocol?

⁸ Mi tsaʼ ñusa jumpʼejl wocol chaʼan butʼjaʼlel, yujquel o an chuqui tsaʼ puli a chaʼan, tajol cabʌlix ora an a chaʼan ansiedad. I mi an majqui tsaʼ chʌmi a chaʼan o tsaʼ sʌtʌ chuqui tac an a chaʼan, tajol cʼux maʼ wubin o michʼet. Pero ili mach yomic i yʌl chaʼan maʼ wen mulan jiñi chubʌʼañʌl tac o chaʼan maʼañic maʼ wen ñop Dios. Tsaʼ ñusa jumpʼejl tsʌts bʌ wocol, i tajol an mach bʌ lecojic miʼ qʼuelob cheʼ mach weñic chuqui maʼ mel (Job 1:11). Pero mucʼʌch i mejlel la cubin lac ñʌchʼtʌlel anquese wen tsʌts chuqui mi lac ñusan. Laʼ laj qʼuel bajcheʼ.

9. ¿Bajcheʼ miʼ coltañonla chaʼan chajpʌbilonla chaʼan jumpʼejl wocol jiñi tsaʼ bʌ i yʌlʌ Jesús?

⁹ Ti ili pañimil an muʼ bʌ i ñaʼtañob chaʼan maʼañic baʼ ora mi caj i tajob wocol. Pero joñonla cʼajal lac chaʼan tsaʼ bʌ i yʌlʌ Jesús. La cujil chaʼan mi caj i ñumen pʼojlel jiñi wocol tac i chaʼan miʼ mejlel i tajonla jaʼel. Jesús tiʼ sube jiñi xcʌntʼañob i chaʼan chaʼan cheʼ bʌ lʌcʼʌlix i jilibal ili pañimil miʼ cajel «ñuc tac bʌ yujquel lum» yicʼot yan tac bʌ wocol (Luc. 21:11). Cheʼ jaʼel, tsiʼ yʌlʌ chaʼan mi caj i ñumen pʼojlel jiñi jontolil, i cheʼʌch mi laj qʼuel ili ora. Cabʌlob jontoloʼ bʌ (mañajoʼ bʌ) yicʼot terroristajob (Mat. 24:12). Jesús maʼañic tsiʼ yʌlʌ chaʼan jin jach mi caj i tajob wocol jiñi mach bʌ lʌcʼʌlic añob ti Jehová. Cabʌl i wiñicob Dios am bʌ i ñusayob jaʼel ili wocol tac (Is. 57:1; 2 Cor. 11:25). Tajol Jehová maʼañic mi caj i mel jumpʼejl milagro chaʼan miʼ cʌntañonla ti ili wocol tac, pero mucʼʌch caj i yʌqʼueñonla jiñi i cʼʌjñibal bʌ lac chaʼan chaʼan maʼañic mi lac sʌt jiñi ñʌchʼtʌlel.

10. ¿Chucoch mi la cʌl chaʼan mucʼʌch lac pʌs chaʼan mi lac ñop Dios cheʼ bʌ mi lac chajpan lac bʌ chaʼan jumpʼejl wocol? (Proverbios 22:3).

¹⁰ Mi chajpʌbiloñʌchla maʼañic mi caj lac sʌt lac ñʌchʼtʌlel cheʼ bʌ miʼ yujtel jumpʼejl wocol. ¿Pero mach ba añic miʼ pʌs jiñi chaʼan maʼañic mi lac ñop ti Jehová? Maʼañic. Mi chajpʌbiloñʌchla chaʼan jumpʼejl wocol, mi lac pʌs chaʼan mucʼʌch lac ñop chaʼan mi caj i cʌntañonla. ¿Chucoch? Come jiñi Biblia miʼ yʌl chaʼan añʌch chuqui yom mi lac mel cheʼ bʌ an wocol tac (pejcan Proverbios 22:3). I jiñi organización an i cʼʌñʌ jiñi tema tac muʼ bʌ i loqʼuel ti revista tac, jiñi tempa bʌ yicʼot anuncio tac chaʼan miʼ subeñonla chaʼan yom mi lac chajpan lac bʌ chaʼan jiñi wocol tac.c ¿Chuqui mi caj lac mel mi mucʼʌch lac ñop ti Jehová? Mi caj lac jacʼ jiñi ticʼojel tac ili ora, cheʼ bʌ maxto ujti jumpʼejl wocol.

11. ¿Chuqui mi laj cʌn tiʼ tojlel Margaret?

¹¹ Laʼcu lac ñaʼtan tsaʼ bʌ ujti tiʼ tojlel Margaret. Jiñi añoʼ bʌ i yeʼtel tiʼ subeyob chaʼan miʼ loqʼuel tiʼ yotot come woliʼ pulel mateʼel yaʼi. Tiʼ caj cabʌlob jiñi woli (yʌquel) bʌ i ñopob putsʼel, tsaʼ mʌctiyi jiñi carretera i maʼañix tsaʼ mejliyob ti loqʼuel. Cabʌl butsʼ, i Margaret maʼañic tsaʼ loqʼui yaʼ tiʼ carro. Pero maʼañic chuqui tsiʼ chaʼle come wen chajpʌbil. Yaʼ tiʼ cartera an i chaʼan jumpʼejl mapa tsaʼ bʌ i cʼʌñʌ chaʼan miʼ qʼuel baqui bʌ yambʌ bij miʼ mejlel i chʼʌm. Wʌn i cʌñʌyix jiñi bij chaʼan miʼ mejlel ti putsʼel cheʼ bʌ miʼ yujtel jumpʼejl wocol. Maʼañic chuqui tsiʼ chaʼle come wen chajpʌbil.

12. ¿Chucoch mucʼʌch lac jacʼ muʼ bʌ lac subentel cheʼ bʌ miʼ yujtel jumpʼejl wocol?

¹² Jiñi añoʼ bʌ i yeʼtel tajol miʼ subeñoñobla chaʼan maʼañic mi lac loqʼuel ti la cotot o chaʼan mi lac loqʼuel, o chaʼan an chuqui tac yambʌ yom mi lac mel chaʼan maʼañic chuqui mi lac chaʼlen. An maʼañic bʌ miʼ jacʼob tiʼ caj mach yomobic i cʌy chuqui añob i chaʼan. Pero ¿chuqui mi lac mel jiñi xñoptʼañonbʌla? Jiñi Biblia miʼ yʌl: «Jacʼbenla i tʼan lac Yum cheʼ mi laʼ wʌcʼ laʼ bʌ tiʼ wenta pejtelel jiñi añoʼ bʌ i yeʼtel waʼchocobil bʌ i chaʼan wiñicob. Mach yʌlʌyic mi juntiquil rey, ñumen ñuc bʌ bajcheʼetla, o jiñi gobernadorob, come jiñi rey jiñʌch tsaʼ bʌ i waʼchocoyob» (1 Ped. 2:13, 14). Jiñi i yorganización Jehová miʼ subeñonla jaʼel chuqui tac yom mi lac mel chaʼan mi laj cʌntan lac bʌ. Miʼ chʌn subeñonla chaʼan yom mi la cʌqʼuen lac número jiñi ancianojob chaʼan miʼ mejlel i pejcañonla cheʼ bʌ miʼ yujtel jumpʼejl wocol. ¿Tsaʼix ba la cʌqʼueyob lac chaʼan? Tajol jiñi organización miʼ subeñonla chaʼan yom mi laj cʌytʌl ti la cotot, chaʼan mi lac loqʼuel o chaʼan mi lac lot lac despensa o yan tac bʌ i cʼʌjñibal bʌ lac chaʼan. O tajol miʼ subeñonla jala yicʼot bajcheʼ yom mi laj coltañob jiñi yañoʼ bʌ. Mi maʼañic mi lac jacʼ, tajol mi lac taj wocol joñonla yicʼot jiñi ancianojob, añoʼ bʌ tiʼ wenta chaʼan miʼ cʌntañonla (Heb. 13:17). Margaret tsiʼ yʌlʌ: «Cujil chaʼan jiñi tsaʼ bʌ i coltayon jiñʌch cheʼ tsaʼ c jacʼʌ tsaʼ bʌ i yʌlʌyob jiñi ancianojob yicʼot jiñi organización».

13. ¿Chuqui miʼ melob cabʌl xñoptʼañob chaʼan miʼ chʌn ubiñob i tijicñʌyel yicʼot i ñʌchʼtʌlel cheʼ bʌ miʼ loqʼuelob tiʼ yotot?

¹³ Cabʌl hermanojob loqʼuemob tiʼ yotot tiʼ caj jiñi guerra tac o yan tac bʌ wocol. Miʼ chaʼleñob wersa chaʼan miʼ ñʌmʼañob yaʼ baqui miʼ cʼotelob yicʼot chaʼan miʼ bej melbeñob i yeʼtel Jehová. Miʼ bej «subob majlel jiñi wen tʼan chaʼan bʌ i tʼan Dios», cheʼ bajcheʼ tsiʼ meleyob jiñi ñaxam bʌ xñoptʼañob tsaʼ bʌ pam pujquiyob tiʼ caj jiñi tsʼaʼlentel (Hech. 8:4). Jiñi subtʼan miʼ coltañob i ñaʼtan jiñi Yumʌntel i mach jiñic jiñi i wocolob. Cheʼ bajcheʼ jiñi miʼ chʌn ubiñob i tijicñʌyel yicʼot i ñʌchʼtʌlel.

MIʼ MEJLEL LA CUBIN ÑɅCHʼTɅLEL CHEʼ BɅ MI LAC TSʼAʼLENTEL

14. ¿Chucoch miʼ mejlel i chilbeñonla lac ñʌchʼtʌlel jiñi lac tsʼaʼlentel?

¹⁴ Jiñi tsʼaʼlentel miʼ mejlel i chilbeñonla jiñi muʼ tac bʌ i yʌqʼueñonla lac tijicñʌyel yicʼot ñʌchʼtʌlel, bajcheʼ jiñi tempa bʌ, subtʼan yicʼot cheʼ maʼañic mi lac bʌcʼñan chaʼan mi lac chujquel cheʼ mi lac mel jiñi ñʌmʌl tac bʌ lac mel. Cheʼ bʌ miʼ yujtel tac iliyi, tajol mi lac pensarin chuqui mi caj i yujtel ti wiʼil. I tilelʌch cheʼ mi la cubin lac bʌ bajcheʼ iliyi. Pero yom tsajalonla (mi laj cʌntan lac bʌ) chaʼan jiñi tsʼaʼlentel maʼañic miʼ yʌqʼueñonla laj cʌy lac ñop Dios, cheʼ bajcheʼ tiʼ sube Jesús jiñi xcʌntʼañob i chaʼan (Juan 16:1, 2). ¿Chuqui miʼ mejlel lac mel chaʼan maʼañic mi lac sʌt lac ñʌchʼtʌlel cheʼ bʌ mi lac tsʼaʼlentel?

15. ¿Chucoch mach yomic mi lac bʌcʼñan jiñi tsʼaʼlentel? (Juan 15:20; 16:33).

¹⁵ Jiñi i Tʼan Dios miʼ yʌl: «Jiñi yomoʼ bʌ i chʼujutesañob Dios tiʼ cuxtʌlel bajcheʼ xcʌntʼañob i chaʼan Cristo Jesús mi caj i ticʼlʌntelob jaʼel» (2 Tim. 3:12). Juntiquil hermano i cʼabaʼ Andréi wocol tsiʼ yubi chaʼan miʼ ñop iliyi cheʼ bʌ tsaʼ mʌctʌnti jiñi la queʼtel yaʼ baqui chumul. Tsiʼ ñaʼta: «Ila cabʌl Testigojob, mach mejlic i luʼ chucoñob lon». Pero jiñi tsaʼ jach i wen acʼʌ ti pensar. Pero jiñi yambʌ hermanojob tsiʼ cʌyʌyob ili wocol tiʼ cʼʌb Jehová i maʼañic tsiʼ ñaʼtayob chaʼan maʼañic miʼ mejlelob ti chujquel. Yujilob chaʼan mucʼʌch i mejlel ti ujtel jiñi i maʼañic tsiʼ wen pensariyob bajcheʼ Andréi. Jin chaʼan, Andréi tsiʼ lajiyob i tsiʼ ñopo ti Jehová. Ti ora tsiʼ yubi i ñʌchʼtʌlel, i wʌle tijicña anquese an cabʌl wocol. Joñonla jaʼel cheʼʌch miʼ mejlel la cubin bajcheʼ jiñi. I sujmʌch chaʼan Jesús tsiʼ yʌlʌ chaʼan mi caj lac tsʼaʼlentel, pero tsiʼ yʌlʌ jaʼel chaʼan mucʼʌch i mejlel lac pʌs lac xucʼtʌlel (pejcan Juan 15:20; 16:33).

16. ¿Chuqui yom mi lac jacʼ cheʼ bʌ mi lac ticʼlʌntel?

¹⁶ Cheʼ bʌ maʼañic miʼ wen mejlel lac mel jiñi la queʼtel o mʌctʌbil, tajol jiñi sucursal o ancianojob miʼ subeñoñobla chuqui yom mi lac mel chaʼan mi laj cʌntan lac bʌ, chaʼan mi lac bej aqʼuentel jiñi chʼujul bʌ bʌlñʌcʼʌl yicʼot chaʼan mi lac chʌn chaʼlen subtʼan cheʼ bajcheʼ mi lac mejlel. Yomʌch mi lac jacʼ tʼan anquese maʼañic mi lac chʼʌmben i sujm chucoch woli lac subentel jiñi (Sant. 3:17). I maʼañic chuqui yom mi lac subeñob tiʼ tojlel la quermañujob yicʼot muʼ bʌ i mejlel ti congregación jiñi maʼañic bʌ tiʼ wenta miʼ ñaʼtañob (Ec. 3:7).

17. Cheʼ bajcheʼ jiñi apóstolob, ¿chuqui la com lac mel?

¹⁷ Junchajp chucoch Satanás miʼ chaʼlen wersa chaʼan miʼ ticʼlʌben jiñi i tejclum Dios jiñʌch cheʼ añob «tiʼ wenta miʼ yʌcʼob ti cʌñol chaʼan bʌ Jesús» (Apoc. 12:17). Mach la cʌcʼ chaʼan miʼ bʌcʼtesañonla Satanás yicʼot i pañimil. Miʼ wen aqʼueñonla lac tijicñʌyel yicʼot lac ñʌchʼtʌlel cheʼ bʌ mi lac chaʼlen subtʼan yicʼot mi lac pʌs jiñi i sujmlel anquese an lac tsʼaʼlentel. Cheʼ ti ñaxam bʌ siglo, jiñi apóstolob xucʼul tsaʼ ajñiyob yicʼot tsiʼ jacʼbeyob i tʼan Dios cheʼ bʌ jiñi judíojob añoʼ bʌ i yeʼtel tiʼ subeyob chaʼan miʼ cʌyob subtʼan. Tsiʼ chʌn chaʼleyob subtʼan, i tsiʼ yubiyob i tijicñʌyel (Hech. 5:27-29, 41, 42). I sujmʌch chaʼan yom tsajalonla bajcheʼ mi lac chaʼlen subtʼan cheʼ bʌ mʌctʌbil jiñi la queʼtel (Mat. 10:16). Cheʼ bʌ mi lac wen chaʼlen wersa, mi caj la cubin jiñi ñʌchʼtʌlel muʼ bʌ i yʌcʼ cheʼ bʌ mi la cʌqʼuen i tijicñʌyel Jehová yicʼot mi lac suben yambʌlob jiñi wen tʼan.

«JIÑI DIOS CHAʼAN BɅ ÑɅCHʼTɅLEL MI CAJ I YAJÑEL YICʼOTETLA»

18. ¿Baqui tilem jiñi ñʌchʼtʌlel i cʼʌjñibal bʌ lac chaʼan?

¹⁸ Laʼ lac ñop chaʼan mucʼʌch i mejlel la cubin lac ñʌchʼtʌlel anquese wen wocol bajcheʼ mi lac ñusan. Ti jimbʌ ora, laʼ laj cʼajtesan chaʼan jiñi ñʌchʼtʌlel i cʼʌjñibal bʌ lac chaʼan jiñʌch i chaʼan bʌ Dios, ili jiñʌch muʼ bʌ i yʌqʼueñonla Jehová. Laʼ lac chʌn ñop tiʼ tojlel cheʼ bʌ miʼ tejchel jumpʼejl cʼamʌjel, yambʌ wocol o lac tsʼaʼlentel. Mach laj cʌy i yorganización i laʼ lac ñaʼtan jiñi pijtaya aqʼuebil bʌ i chaʼañonla. Mi mucʼʌch lac mel, «jiñi Dios chaʼan bʌ ñʌchʼtʌlel» mi caj i yajñel yicʼotonla (Filip. 4:9). Yaʼ ti yambʌ estudio mi caj laj qʼuel chuqui miʼ mejlel lac mel chaʼan mi laj coltan jiñi la quermañujob chaʼan miʼ tajob jiñi i ñʌchʼtʌlel Dios cheʼ bʌ miʼ ñusañob wocol tac.