¿Cʼajal baʼ chaʼan?
¿Wen pejcʌbilix baʼ chaʼan jiñi tema tac maxto bʌ wen jalic loqʼuem ti Lac Tsictesʌbentel? Qʼuele mi mucʼʌch i mejlel a jacʼ ili cʼajtiya tac:
¿Bajcheʼ yilal miʼ qʼuel Jehová jiñi xʼixicob?
Jehová junlajal miʼ qʼuel wiñic yicʼot xʼixic, maʼañic majqui ñumen ñuc bʌ. Miʼ ñʌchʼtan chuqui miʼ yʌl jiñi xʼixicob i miʼ chʼʌm ti ñuc bajcheʼ yubil miʼ yubiñob yicʼot jiñi wocol muʼ bʌ i ñusañob. Miʼ ñop chaʼan mi caj i tsʼʌctesañob jiñi eʼtel tsaʼ bʌ i yʌqʼueyob (w24.01, página 15 yicʼot 16).
¿Bajcheʼ miʼ mejlel lac pʌs chaʼan mucʼʌch lac jacʼ muʼ bʌ i yʌl Efesios 5:7: «Mach laʼ mel cheʼ bajcheʼ miʼ melob»?
Jiñi apóstol Pablo tiʼ subeyonla chaʼan mach lac ñochtan jiñi lac piʼʌlob mach bʌ añic miʼ coltañonla lac jacʼ jiñi i mandar tac Dios. Pero mach jin jach muʼ bʌ lac ñusan qʼuin la quicʼotob, yicʼotob jaʼel jiñi muʼ bʌ lac tajob ti internet o ti redes sociales (w24.03, página 22 yicʼot 23).
¿Chuqui tac mach bʌ yomic mi lac ñop?
Yomʌch mi laj cʌntan lac bʌ cheʼ bʌ jiñi la camigojob miʼ chocbeñoñobla cʼotel mensaje tac muʼ bʌ caj i coltañonla miʼ poj ñaʼtañob, pero mach yujilobic miʼ sujmʌch jiñi. O tajol miʼ chocbeñonla cʼotel correo tac jiñi mach bʌ laj cʌñʌyobic. Cheʼ jaʼel yom mi laj cʌntan lac bʌ tiʼ tojlel jiñi apóstatajob muʼ bʌ i poj alob chaʼan yom i yʌlob chaʼan bʌ Biblia (w24.04, página 12).
¿Chuqui la cujil bʌ yicʼot mach bʌ la cujilic chaʼan bajcheʼ miʼ caj ti meloñel Jehová tiʼ tojlel jiñi rey Salomón, jiñi tsaʼ bʌ chʌmiyob ti Sodoma yicʼot Gomorra yicʼot jiñi tsaʼ bʌ chʌmiyob ti Diluvio?
Mach la cujilic mi Jehová tsaʼix i junyaj jisayob, pero la cujil chaʼan Jehová wen yujil pʼuntaya i mi caj i mel chuqui toj (w24.05, página 3 yicʼot 4).
¿Chuqui miʼ pʌsbeñonla cheʼ Jehová jiñʌch jiñi «xajlel»? (Dt. 32:4).
Jehová lajal bajcheʼ lac putsʼib chaʼan miʼ coltañonla. Miʼ mejlel lac ñop chuqui miʼ yʌl come mach yujilic lot. Jehová xucʼulʌch i maʼañic miʼ qʼuextʌyel (w24.06, página 26 cʼʌlʌl 28).
¿Chuqui mi caj i coltañonla mi tsaʼ laj qʼuexta lac bʌ ti yambʌ congregación?
Cheʼ mi lac ñop chaʼan Jehová mi caj i coltañonla cheʼ bajcheʼ tsiʼ colta i wiñicob ti wajali. Mach lac lajeʼ jiñi lac tsijib congregación yicʼot jiñi congregación baqui tsaʼ loqʼuiyonla. Laʼ lac chaʼlen wersa chaʼan mi laj cʌn bajcheʼ mi laj coltan jiñi lac tsijib congregación yicʼot mi lac sʌclan yambʌ la camigojob (w24.07, página 26 cʼʌlʌl 28).
¿Chuqui mi laj cʌn ti jiñi uxpʼejl lajiya am bʌ ti Mateo capítulo 25?
Ti jiñi lajiya chaʼan jiñi tiñʌmeʼ tac yicʼot chivo mi laj cʌn chaʼan yom xucʼulonla, ti jiñi lajiya chaʼan bʌ 10 xchʼocob mi laj cʌn chaʼan yomʌch chajpʌbilonla, i ti jiñi lajiya chaʼan talento tac mi laj cʌn chaʼan yomʌch wem bʌ xʼeʼtelonla (w24.09, página 20 cʼʌlʌl 24).
¿Bajcheʼ chañel i yochib jiñi templo tsaʼ bʌ i mele Salomón?
An ñoxix tac bʌ tsʼijbujel chaʼan 2 Crónicas 3:4 muʼ bʌ i yʌl chaʼan «120 codo», yom bʌ i yʌl chaʼan jumpʼejlʌch torre am bʌ 53 metro i chanlel. Pero an yambʌ tsʼijbujel tac baqui miʼ yʌl chaʼan an jach «20 codo», yom bʌ i yʌl chaʼan 9 metro i chanlel. Ili cojix bʌ tsaʼ bʌ la cʌlʌ miʼ pʌs chaʼan jiñi i chanlel i yochib jiñi templo wen jach miʼ taj i bʌ yicʼot i pimlel jiñi i paredlel (w24.10, página 31).
¿Chuqui yom i yʌl cheʼ jiñi siervo ministerialob «yom juntiquilob jach i yijñam»? (1 Tim. 3:12).
Jiñi siervo ministerial yom juntiquil jach i yijñam, mach yomic miʼ chaʼlen tsʼiʼlel yicʼot maʼañic baʼ ora mi caj mulan yambʌ xʼixic (w24.11, página 19).
¿Chucoch mi la cʌl chaʼan muʼ bʌ i yʌl Juan 6:53 mach yaʼic chucul bajcheʼ yom miʼ mejlel jiñi i Cena lac Yum?
Ti Juan 6:53, Jesús tsiʼ yʌlʌ chaʼan yom miʼ cʼuxtʌl i bʌcʼtal yicʼot miʼ jajpel i chʼichʼel. Ili tʼan tiʼ sube jiñi judíojob ti Galilea maxto bʌ i ñopoyob tiʼ tojlel, cheʼ ti jabil 32. Pero cheʼ bʌ ñumeñix jumpʼejl jab, tsiʼ mele jiñi Cena yicʼot jiñi apóstolob ti Jerusalén, i jiñi tsaʼ bʌ i pejcayob jiñobʌch muʼ bʌ caj i chaʼleñob yumʌntel yicʼot ti panchan (w24.12, página 10 yicʼot 11).