Chucoch mi lac wen qʼuel ti ñuc cheʼ Jehová tsiʼ ñusʌbeyonla lac mul

1, 2. ¿Chucoch mi la cʌl chaʼan lʌcʼʌl lajal tsaʼ ujtiyonla bajcheʼ jiñi chʼiton muʼ bʌ i yʌjlel ti párrafo 1?

LAʼCU lac ñaʼtan juntiquil chʼiton wem bʌ chumul, jiñi i papá i mamá wen añob i taqʼuin. Pero jumpʼejl bʌ qʼuin jiñi chʼiton miʼ subentel chaʼan jiñi i papá i mamá tsaʼ chʌmi. I mach cojach jiñi, miʼ cʼotel i ñaʼtan chaʼan jiñi i papá i mamá tsiʼ laj jisayob jiñi taqʼuin i tsiʼ wen otsayob cʌytʌl i bet, wʌle jiñi chʼiton ti ora yom miʼ toj pejtelel jiñi bet, pero come wen on maʼañic baʼ ora mi caj i mejlel i toj.

² Joñonla lʌcʼʌl lajal tsaʼ ujtiyonla bajcheʼ jiñi chʼiton. Ti ñaxan, Adán yicʼot Eva utsʼat baqui chumulob i mach xmulilobic (Gn. 1:27; 2:​7-9). Tsaʼ subentiyob chaʼan tijicña miʼ mejlelob ti chumtʌl tiʼ pejtelel ora. Pero mach cheʼic tsaʼ ujti come tsiʼ chaʼleyob mulil i tiʼ sʌtʌyob jiñi utsʼatax bʌ i chumlib yicʼot tsaʼ chʌmiyob. ¿I chuqui tsiʼ cʌybe jiñi i yalobilob? Jiñi Biblia miʼ yʌl: «Tiʼ tojlel juntiquil wiñic [Adán], jiñi mulil tsaʼ ochi ti pañimil i tiʼ caj jiñi mulil tsaʼ ochi jiñi chʌmel, i cheʼʌch tsaʼ pam pujqui jiñi chʌmel tiʼ tojlel pejtelel wiñicob come tiʼ pejtelelob tsiʼ chaʼleyob mulil» (Rom. 5:12). Jiñʌch tsaʼ bʌ i cʌybeyonla Adán, jiñi mulil, jin chaʼan mi lac chʌmel. Jiñi mulil lajalʌch bajcheʼ wen on bʌ lac bet maʼañic bʌ miʼ mejlel lac toj (Sal. 49:8).

3. ¿Chucoch miʼ yʌl jiñi Biblia chaʼan jiñi mulil lajal bajcheʼ lac bet?

³ Jiñi Biblia miʼ yʌl chaʼan jiñi mulil lajal bajcheʼ lac bet (Mat. 6:12; Luc. 11:4). Jin chaʼan, cheʼ mi lac chaʼlen mulil lajal bajcheʼ mi la cotsan lac bet la quicʼot Jehová i cojach miʼ mejlel lac toj yicʼot laj cuxtʌlel. Pero Jehová an chuqui tsiʼ mele chaʼan miʼ ñusʌbeñonla jiñi lac bet (Rom. 6:​7, 23).

4. a) ¿Chucoch yomʌch laj coltʌntel? (Salmo 49:​7-9). b) ¿Chuqui yom i yʌl jiñi tʼan mulil? (Qʼuele jiñi recuadro «Mulil»).

⁴ ¿Muʼ ba mejlel lac chaʼ taj pejtelel tsaʼ bʌ i sʌtʌ Adán yicʼot Eva? Mucʼʌch. Pero mach ti lac bajñelic (pejcan Salmo 49:​7-9). Chaʼan mi lac mejlel ti chumtʌl tiʼ pejtelel ora yicʼot chaʼan jiñi chʌmeñoʼ bʌ miʼ mejlelob ti chaʼ chʼojyel yomʌch laj coltʌntel, mi maʼañiqui lajal mi la cujtel bajcheʼ miʼ chʌmel juncojt añimal, cheʼ bʌ mi lac chʌmel yaʼ jaxʌl mi lac jilel (Ec. 3:19; 2 Ped. 2:12).

5. ¿Chuqui tsiʼ mele Jehová chaʼan miʼ coltañonla lac toj jiñi mulil? (Qʼuele jiñi dibujo am bʌ tiʼ tejchibal).

⁵ Laʼcu lac chaʼ ñaʼtan jiñi chʼiton tsaʼ bʌ ajli ti párrafo 1. ¿Bajcheʼ yubil miʼ yubin maʼ wʌl cheʼ juntiquil wen am bʌ i taqʼuin miʼ tilel i miʼ suben chaʼan mi caj i tojben pejtelel i bet? ¿Mach ba añic mi caj i jacʼ? Jiñʌch tsaʼ bʌ i mele Jehová, jiñi lac Tat muʼ bʌ i wen cʼuxbiñonla, tsiʼ yʌqʼueyonla wen ñuc bʌ lac majtan muʼ bʌ i toj jiñi mulil tsaʼ bʌ i cʌybeyonla Adán. Jesús tsiʼ yʌlʌ baqui bʌ jiñi majtañʌl: «Dios tsiʼ wen cʼuxbi jiñi lac piʼʌlob ti pañimil i tsiʼ yʌcʼʌ cojim bʌ i Yalobil chaʼan pejtelel muʼ bʌ i pʌs chaʼan miʼ ñop tiʼ tojlel maʼañic miʼ jisʌntel, miʼ taj i cuxtʌlel mach bʌ añic miʼ jilel» (Juan 3:16). Ili majtañʌl miʼ coltañonla chaʼan wen mi la cajñel la quicʼot Jehová.

6. ¿Chuqui mi caj laj qʼuel ti ili estudio, i chucoch?

⁶ ¿Bajcheʼ miʼ coltañonla ili utsʼatax bʌ lac majtan tsaʼ bʌ i yʌqʼueyonla Jehová i miʼ ñusʌntel lac mul? Chaʼan mi lac ñaʼtan, laʼ laj qʼuel bajcheʼ an i sujmlel ili tʼan tac muʼ bʌ i tilel yaʼ ti Biblia: Mi lac chaʼ utsʼan la quicʼot Dios, i ñusʌntel mulil, i tojol laj coltʌntel, tsaʼ cojliyonla yicʼot mi lac chaʼ qʼuejlel ti toj. Cheʼ mi lac wen ñaʼtan jujunchajp iliyi mi caj i coltañonla chaʼan mi lac ñumen qʼuel ti ñuc pejtelel tsaʼ bʌ i mele Jehová chaʼan miʼ ñusan lac mul.

MI LAC CHAʼ UTSʼAN LA QUICʼOT DIOS

7. a) ¿Chuqui yambʌ tiʼ sʌtʌyob Adán yicʼot Eva? b) ¿Chuqui wersa i cʼʌjñibal i chaʼañob jiñi i yalobilob Adán yicʼot Eva? (Romanos 5:​10, 11).

⁷ Adán yicʼot Eva maʼañix tsaʼ mejliyob ti chumtʌl tiʼ pejtelel ora come tsiʼ chaʼleyob mulil, i cheʼ jaʼel ñajtix tsaʼ ajñiyob tiʼ tojlel Jehová come tiʼ caj jiñi mulil Jehová tsiʼ locʼsayob tiʼ familia (Luc. 3:38). Ili tsaʼ ujti cheʼ bʌ maxto añobic i yalobilob (Gn. 3:​23, 24; 4:1). Jin chaʼan, joñonla yom mi lac chaʼ utsʼan la quicʼot Jehová (pejcan Romanos 5:​10, 11). Jumpʼejl diccionario chaʼan Biblia miʼ yʌl chaʼan jiñi tʼan am bʌ ti griego muʼ bʌ i yʌjlel chaʼ utsʼan, miʼ mejlel i yʌcʼ ti ñaʼtʌntel chaʼan «mi lac sujtesan ti la camigo juntiquil laj contra». I wen utsʼatax bʌ jin cheʼ mach joñoñicla tsaʼ bʌ lac ñaʼta bajcheʼ mi lac chaʼ utsʼan la quicʼot Jehová, jiñʌch Jehová tsaʼ bʌ i ñaxan sʌcla bajcheʼ yom miʼ mel. ¿Bajcheʼ tsiʼ mele?

JIÑI I ÑUSɅNTEL MULIL

8. ¿Chuqui tsiʼ mele Jehová chaʼan jiñi wiñicob xʼixicob miʼ mejlel i chaʼ lʌcʼtesañob i bʌ tiʼ tojlel?

⁸ Jehová an chuqui tsiʼ chajpa chaʼan miʼ ñusʌntel jiñi mulil i cheʼ bajcheʼ jiñi pejtelel jiñi wiñicob xʼixicob miʼ mejlel i lʌcʼtesañob i bʌ tiʼ tojlel. An chuqui tsiʼ yʌcʼʌ lajal bʌ bajcheʼ jiñi tsaʼ bʌ sajti. Cheʼ bajcheʼ jiñi, miʼ mejlel lac chaʼ taj tsaʼ bʌ i sʌtʌ Adán yicʼot Eva. Jiñi Tsʼijbujel Griego miʼ yʌl chuqui tsiʼ mele Jehová chaʼan mi lac mejlel lac lʌcʼtesan lac bʌ tiʼ tojlel (Rom. 3:25).

9. ¿Chuqui tsiʼ chajpa Jehová cheʼ tiʼ yorajlel jiñi israelitajob chaʼan miʼ mejlel i ñusʌbeñob i mul?

⁹ ¿Chuqui tsaʼ bʌ i chajpa Jehová tiʼ yorajlel jiñi israelitajob chaʼan miʼ mejlelob ti ñusʌbentel i mul i utsʼat miʼ yajñelob yicʼot? Junyaj ti jumpʼejl jab, jiñi ñuc bʌ sacerdote miʼ yʌcʼ tsʌnsʌbil bʌ majtañʌl chaʼan i mul jiñi tejclum. Pero jiñi majtañʌl tac maʼañic miʼ junyaj ñusʌben i mul jiñi israelitajob come mach lajalic bajcheʼ i cuxtʌlel juntiquil lac piʼʌl. Pero Jehová tsaʼʌch i ñusʌbeyob i mul cheʼ bʌ miʼ qʼuel chaʼan tiʼ sujm miʼ chaʼ ñaʼtañob i bʌ yicʼot miʼ yʌcʼob jiñi majtañʌl tac cheʼʌch bajcheʼ miʼ cʼajtin (Heb. 10:​1-4). Cheʼ jaʼel, jiñi majtañʌl muʼ bʌ i yʌjqʼuel tiʼ qʼuiñilel i ñusʌntel mulil miʼ cʼajtesʌbeñob chaʼan xmulilob yicʼot chaʼan an chuqui ñumen wem bʌ yom miʼ yʌjqʼuel chaʼan miʼ junyaj ñusʌbentelob i mul.

10. ¿Chuqui tsiʼ ñaʼta i mel Jehová chaʼan miʼ junyaj ñusʌntel lac mul?

¹⁰ ¿I chuqui tsiʼ ñaʼta i mel Jehová chaʼan miʼ junyaj ñusʌntel jiñi lac mul? Tsiʼ yʌcʼʌ i Yalobil, jiñi Biblia miʼ yʌl: «Cristo junsujtel jach tsaʼ ajqʼui chaʼan miʼ cuchben i mul cabʌl lac piʼʌlob» (Heb. 9:28). Jesús tsiʼ yʌcʼʌ «i cuxtʌlel bajcheʼ i tojol i coltʌntel cabʌlob» (Mat. 20:28). ¿I chucoch yomʌch jiñi i tojol laj coltʌntel?

I TOJOL LAJ COLTɅNTEL

11. a) ¿Chucoch yomʌch miʼ tojtʌl jiñi lac mul? b) ¿Bajcheʼ yilal yom bʌ miʼ yʌjqʼuel chaʼan i tojol laj coltʌntel?

¹¹ Jiñi Biblia miʼ pʌs chaʼan Jehová tsiʼ qʼuele chaʼan yomʌch miʼ tojtʌl jiñi lac mul chaʼan miʼ mejlel ti ñusʌntel yicʼot mi lac sujtel tiʼ yamigo. ¿I bajcheʼ yilal jiñi yom bʌ miʼ yʌcʼ Jehová chaʼan miʼ tojtʌl lac mul i miʼ mejlel lac chaʼ taj tsaʼ bʌ i sʌtʌ Adán? (1 Tim. 2:6). Yom an i chaʼan ili uxchajp: Yom juntiquil toj bʌ wiñic, muʼ bʌ i mejlel ti chumtʌl tiʼ pejtelel ora yicʼot ti jumpʼejl bʌ i pusicʼal miʼ yʌcʼ i bʌ ti chʌmel chaʼañonla. Cheʼ jach bajcheʼ iliyi miʼ mejlel ti ñusʌntel lac mul i miʼ mejlel lac chaʼ taj jiñi tsaʼ bʌ i sʌtʌ Adán yicʼot Eva.

12. ¿Chucoch tsaʼʌch mejli i toj Jesús jiñi laj coltʌntel?

¹² Jesús tsaʼʌch mejli i toj jiñi laj coltʌntel, laʼ laj qʼuel chucoch: 1) Juntiquilʌch toj bʌ wiñic «maʼañic [bʌ] tsiʼ wis chaʼle mulil», 2) miʼ mejlel ti chumtʌl tiʼ pejtelel ora ila ti pañimil (mulawil), 3) ti jumpʼejl i pusicʼal tsiʼ yʌcʼʌ i bʌ ti chʌmel chaʼañonla (1 Ped. 2:22; Heb. 10:​9, 10). Come Jesús juntiquilʌch toj bʌ wiñic cheʼ bʌ tsaʼ chʌmi tsaʼ mejli i toj tsaʼ bʌ i sʌtʌ Adán (1 Cor. 15:45). Jin chaʼan, miʼ yʌjlel chaʼan Jesús jiñʌch «jiñi cojix bʌ Adán» (Rom. 5:19). Maʼañix mi lac pijtan chaʼan anto majqui yambʌ yom miʼ tilel i toj jiñi tsaʼ bʌ i sʌtʌ Adán come Jesús junsujtel jach tsaʼ chʌmi cheʼ bʌ tsiʼ yʌcʼʌ i bʌ i chaʼañʌch tiʼ pejtelel ora (Heb. 7:27; 10:12).

13. ¿Chuqui tsiʼ mele Jehová chaʼan utsʼat mi lac mejlel ti ajñel tiʼ tojlel?

¹³ Tsaʼix laj qʼuele chaʼan Jehová an chuqui tsiʼ chajpa chaʼan miʼ mejlel ti ñusʌntel jiñi mulil i cheʼ bajcheʼ jiñi utsʼat mi lac mejlel ti ajñel la quicʼot. Pero chaʼan miʼ yujtel iliyi, yomʌch miʼ yʌjqʼuel jiñi i tojol laj coltʌntel i jiñi i cuxtʌlel tsaʼ bʌ i yʌcʼʌ Jesús jiñʌch tsaʼ bʌ i tojo (Efes. 1:7; Heb. 9:14). ¿I baqui bʌ i wenlel mi lac taj? Laʼ laj qʼuel.

TSAʼ COJLIYONLA YICʼOT MI LAC CHAʼ QʼUEJLEL TI TOJ

14. ¿Chuqui mi caj laj qʼuel, i chucoch?

¹⁴ ¿Bajcheʼ miʼ coltañonla jiñi tsaʼ bʌ i mele Jehová ti lac tojlel? Jiñi Biblia mach junchajpic jach bajcheʼ miʼ taj ti tʼan jiñi wenlel tac muʼ bʌ lac taj chaʼan tsaʼ bʌ i mele Jehová. Mi caj laj qʼuel chaʼchajp muʼ bʌ i taj ti tʼan. I cheʼ bʌ mi lac ñumen chʼʌmben i sujm mi caj i coltañonla chaʼan mi lac ñumen qʼuel ti ñuc tsaʼ bʌ i mele Jehová chaʼan miʼ ñusʌntel lac mul.

15, 16. a) ¿Bajcheʼ miʼ coltañonla jiñi i tojol laj coltʌntel? b) ¿Bajcheʼ yubil maʼ wubin cheʼ maʼ ñaʼtan chaʼan librejoñixla tiʼ pʼʌtʌlel jiñi mulil yicʼot chʌmel?

¹⁵ Jiñi Biblia miʼ yʌl chaʼan colbiloñixla o librejoñixla come tsaʼix ajqʼui jiñi i tojol laj coltʌntel. Jin chaʼan, jiñi apóstol Pedro tsiʼ yʌlʌ iliyi: «Jatetla laʼ wujil chaʼan maʼañic tsaʼ cʼʌjñi chuqui tac miʼ yocʼmʌn, cheʼ bajcheʼ plata yicʼot oro, chaʼan mi laʼ cojlel ti jiñi cuxtʌlel mach bʌ añic i cʼʌjñibal tsaʼ bʌ i cʌybeyetla jiñi laʼ ñojteʼelob. Pero jatetla tsaʼ cojliyetla tiʼ coltaya jiñi utsʼatax bʌ i chʼichʼel Cristo, cheʼ bʌ bajcheʼ i chʼichʼel cʼocʼ bʌ tiñʌmeʼ yicʼot maʼañic bʌ i bibiʼlel» (1 Ped. 1:​18, 19).

¹⁶ Come Jesús tsiʼ yʌcʼʌ i cuxtʌlel chaʼan i tojol jiñi laj coltʌntel, librejoñixla tiʼ pʼʌtʌlel jiñi mulil yicʼot chʌmel (Rom. 5:21). Jin chaʼan, mi lac wen aqʼuen wocolix i yʌlʌ Jehová yicʼot Jesús chaʼan tsaʼ bʌ i meleyob (1 Cor. 15:22).

17, 18. a) ¿Chuqui yom i yʌl cheʼ mi lac sujbel ti toj? b) ¿I bajcheʼ miʼ coltañonla?

¹⁷ Cheʼ mi lac sujbel ti toj yom i yʌl chaʼan Jehová miʼ junyaj ñusʌbeñonla lac mul, maʼañic miʼ wersa cʼajtin chaʼan yom mi lac toj. Pero ili mach yomic i yʌl chaʼan mach lecojic miʼ qʼuel jiñi mulil i miʼ mejlel lac mel chuqui jach la com. Cheʼ jaʼel maʼañic chuqui tsaʼ lac mele chaʼan mi lac sujbel ti toj. Pero mi mucʼʌch laj qʼuel ti ñuc jiñi tsaʼ bʌ i mele yicʼot mi la cʌcʼ lac ñopoñel tiʼ cuxtʌlel Jesús, Jehová miʼ mejlel i ñusʌbeñonla lac mul (Rom. 3:24; Gál. 2:16).

¹⁸ ¿Bajcheʼ miʼ coltañonla cheʼ mi lac sujbel ti toj? An yajcʌbiloʼ bʌ chaʼan miʼ majlelob ti panchan yicʼot Jesús i tsaʼix sujtiyob tiʼ yalobilob Dios (Tito 3:7; 1 Juan 3:1). Tsaʼix ñusʌbentiyob i mul, lajal bajcheʼ maʼañic baʼ ora tsiʼ chaʼleyob mulil. Jin chaʼan, miʼ mejlelob ti Yumʌntel yicʼot Cristo (Rom. 8:​1, 2, 30). I an yambʌ wiñicob xʼixicob tsaʼix bʌ sujtiyob tiʼ yamigojob Dios muʼ bʌ caj i mejlelob ti chumtʌl tiʼ pejtelel ora ila ti Lum. Tsaʼix ñusʌbentiyob i mul jaʼel (Sant. 2:​21-23). Pejtelel jiñi cuxul bʌ mi caj i cʌytʌlob cheʼ bʌ miʼ yujtel Armagedón mi caj i mejlelob ti chumtʌl tiʼ pejtelel ora (Juan 11:26). Cheʼ jaʼel «jiñi tojoʼ bʌ yicʼot jiñi mach bʌ tojobic» tsaʼix bʌ chʌmiyob mi caj i mejlelob ti chaʼ chʼojyel (Hech. 24:15; Juan 5:​28, 29). Ti wiʼil, pejtelel jiñi xucʼuloʼ bʌ i wiñicob Jehová añoʼ bʌ ila ti lum «libre mi caj i sujtelob bajcheʼ jiñi i yalobilob Dios» (Rom. 8:21). Jiñi tsaʼ bʌ i chajpa Jehová chaʼan miʼ ñusʌntel jiñi mulil miʼ coltañonla chaʼan mi lac chaʼ utsʼan la quicʼot i utsʼat mi la cajñel tiʼ tojlel. Cheʼ mi lac ñaʼtan iliyi, ¿mach ba wen utsʼatic?

19. ¿Bajcheʼ miʼ coltañonla tsaʼ bʌ i mele Jehová yicʼot Jesús ti lac tojlel? (Qʼuele jaʼel jiñi recuadro «Tsaʼ bʌ i mele Jehová ti lac tojlel»).

¹⁹ Ti ñaxan lajal añonla bajcheʼ jiñi chʼiton tsaʼ bʌ cʌybenti wen on bʌ i bet. Pero Jehová tsiʼ coltayonla, ¿bajcheʼ? An chuqui tsiʼ chajpa chaʼan i ñusʌntel jiñi mulil, i Jesús tsiʼ yʌcʼʌ i cuxtʌlel chaʼan miʼ toj lac mul. Jin chaʼan cheʼ mi la cʌcʼ lac ñopoñel tiʼ tojlel Jesucristo miʼ coltañonla chaʼan mi laj cojlel tiʼ pʼʌtʌlel jiñi mulil yicʼot chʌmel. Tiʼ tojlel Jehová lajal bajcheʼ maʼañic baʼ ora tsaʼ lac chaʼle mulil, pero anto ñumen ñuc bʌ i cʼʌjñibal, jin cheʼ mi lac mejlel ti sujtel tiʼ yamigo jiñi lac Tat am bʌ ti panchan.

20. ¿Chuqui mi caj laj qʼuel ti yambʌ estudio?

²⁰ ¿Mach ba muqʼuic lac wen qʼuel ti ñuc cheʼ mi lac wen ñaʼtan pejtelel tsaʼ bʌ i mele Jehová yicʼot Jesús chaʼañonla? (2 Cor. 5:15). Machic tsiʼ meleyob pejtelel jiñi maʼañic lac pijtaya. Yaʼ ti yambʌ estudio mi caj laj qʼuel ejemplo tac muʼ bʌ caj i coltañonla lac ñumen chʼʌmben i sujm chuqui yom i yʌl chaʼañonla cheʼ Jehová miʼ ñusʌbeñonla lac mul.