Chuqui yom i yʌl chaʼañet cheʼ Jehová miʼ ñusʌbeñonla lac mul

1. ¿Chuqui miʼ mejlel ti ujtel cheʼ bʌ juntiquil a wamigo miʼ subeñet «¡mach a pensarin, mic ñusʌbeñet!»?

ÑATANCU chaʼan an chuqui tsaʼ sube o tsaʼ melbe juntiquil a wamigo i cʼux tsiʼ yubi, ti wiʼil maʼ cʼajtiben chaʼan miʼ ñusʌbeñet i miʼ subeñet: «¡Mach a pensarin, mic ñusʌbeñet!». ¿Bajcheʼ yubil mi caj a wubin? Tajol tijicña mi caj a wubin a bʌ i muqʼuix i ñajʌyel a chaʼan jiñi tsaʼ bʌ ujti. Pero ¿lajalixto ba mi caj laʼ bej pejcan laʼ bʌ bajcheʼ ti ñaxan? ¿Am ba chuqui mi caj i qʼuextʌyel?

2. ¿Chuqui miʼ yʌl jiñi Biblia tiʼ tojlel Jehová cheʼ miʼ ñusan lac mul? (Qʼuele jiñi nota).

² Jiñi salmista miʼ yʌl tiʼ tojlel Jehová: «Maʼ ñusʌbeñon lojon c mul [ . . . ] awom mic bʌcʼñañet lojon» (Sal. 130:4).a Maʼañic i lajintel bajcheʼ miʼ ñusan lac mul Jehová. Joñonla miʼ mejlel lac ñusʌben i mul juntiquil lac piʼʌl, pero maʼañic majqui miʼ mejlel i mel cheʼ bajcheʼ miʼ mel Jehová. Cheʼ bʌ jiñi Tsʼijbujel Hebreo miʼ yʌl tiʼ tojlel Jehová chaʼan miʼ ñusan lac mul miʼ cʼʌn jumpʼejl tʼan mach bʌ añic miʼ cʼʌjñel tiʼ tojlel lac piʼʌlob.

3. ¿Chucoch qʼuexelʌch bajcheʼ miʼ ñusan lac mul Jehová cheʼ bajcheʼ joñonla? (Isaías 55:​6, 7).

³ Cheʼ bʌ Jehová miʼ ñusʌben i mul juntiquil miʼ junyaj yʌp i miʼ yʌcʼ chaʼan miʼ chaʼ lʌcʼtesan i bʌ tiʼ tojlel. Jehová ti jumpʼejl i pusicʼal miʼ ñusʌbeñonla lac mul. ¿Mach ba wen utsʼatic muʼ bʌ i mel? (Pejcan Isaías 55:​6, 7).

4. ¿Bajcheʼ miʼ coltañonla Jehová chaʼan mi lac chʼʌmben i sujm muʼ bʌ i mel cheʼ miʼ ñusan lac mul?

⁴ Ti lac bajñelil maʼañic mi lac chʼʌmben i sujm bajcheʼ Jehová miʼ ñusan lac mul come qʼuexelʌch miʼ mel bajcheʼ joñonla. Pero Jehová miʼ coltañonla lac chʼʌmben i sujm cheʼ bʌ miʼ cʼʌn ejemplo tac am bʌ ti Biblia. Ti ili estudio mi caj laj qʼuel jiñi ejemplo tac. Cheʼ bajcheʼ jiñi mi caj laj qʼuel pejtelel muʼ bʌ i mel Jehová chaʼan miʼ ñusan lac mul yicʼot chaʼan miʼ mejlel lac lʌcʼtesan lac bʌ tiʼ tojlel. Cheʼ jaʼel, mi caj i coltañonla chaʼan mi lac ñumen cʼuxbin Jehová yicʼot mi laj qʼuel ti ñuc.

JEHOVÁ MIʼ CHʼɅM MAJLEL JIÑI LAC MUL

5. ¿Chuqui miʼ mel Jehová cheʼ miʼ ñusan lac mul?

⁵ Jiñi Biblia miʼ lajeʼ jiñi mulil bajcheʼ al bʌ laj cuch, jin chaʼan jiñi rey David tsiʼ yʌlʌ: «Jini c jontolil tsaʼix i teñeyon jubel. Yom i cʼʌson cheʼ bajcheʼ al bʌ cuchʌl» (Sal. 38:4). Ti Salmo 25:18 yicʼot 32:5 miʼ yʌl chaʼan Jehová miʼ ñusʌben i mul jiñi muʼ bʌ i chaʼ ñaʼtan i bʌ. Jiñi tʼan am bʌ ti hebreo muʼ bʌ i cʼʌjñel ti ili versículo tac yom i yʌl chaʼan Jehová miʼ «chʼuy» o miʼ «chʼʌm majlel». Ili miʼ yʌqʼueñonla lac ñaʼtan chaʼan Jehová lajal bajcheʼ juntiquil pʼʌtʌl bʌ wiñic muʼ bʌ i chʼʌmbeñonla jiñi laj cuch i miʼ chʼʌm majlel.

6. ¿Baqui miʼ chʼʌm majlel Jehová jiñi lac mul?

⁶ ¿I baqui miʼ chʼʌm majlel Jehová jiñi lac mul? Ti Salmo 103:12 mi lac taj jumpʼejl ejemplo muʼ bʌ i coltañonla lac chʼʌmben i sujm: «Cheʼ bajcheʼ i ñajtlel pañimil cʼʌlʌl tiʼ pasibal qʼuin cʼʌlʌl tiʼ bʌjlibal qʼuin, cheʼʌch tsiʼ chocbeyonla lac mul». Yaʼ baqui miʼ pasel jiñi qʼuin mach wis lʌcʼʌlic miʼ cʌlel yicʼot yaʼ baqui miʼ bʌjlel, wen ñajt, ¡pero wen ñajt! Ili versículo miʼ pʌsbeñonla chaʼan cheʼ bʌ Jehová miʼ ñusʌbeñonla lac mul wen ñajt baqui miʼ chʼʌm majlel baqui maʼañix mi lac mejlel ti cʼotel. ¡Jehová mucʼʌch i junyaj ñusan lac mul!

7. ¿Chuqui miʼ tumben Jehová jiñi lac mul? (Miqueas 7:​18, 19).

⁷ Cheʼ bʌ Jehová miʼ chʼʌm majlel jiñi lac mul, ¿muʼ ba i cʌytʌl yicʼot? Maʼañic. Jiñi rey Ezequías tiʼ sube Jehová: «Tsaʼix a choco ti a pat pejtelel jiñi c mul» (Is. 38:​9, 17, TNM). Jin chaʼan, cheʼ bʌ mi lac chaʼ ñaʼtan lac bʌ Jehová miʼ chʼʌm jiñi lac mul i miʼ choc baqui maʼañix miʼ mejlel laj qʼuel. Ili versículo miʼ mejlel ti chaʼlentel ti traducir jaʼel bajcheʼ ili: «Ti a tojlel lajal bajcheʼ maʼañic baʼ ora tsaʼ c chaʼle mulil». Jiñi Biblia miʼ cʼʌn yambʌ lajiya muʼ bʌ i coltañonla lac ñumen chʼʌmben i sujm iliyi, mi lac taj ti Miqueas 7:​18, 19 (pejcan). Yaʼi miʼ yʌl chaʼan Jehová miʼ choc ochel lac mul ti mar. Ti wajali, cheʼ bʌ an chuqui miʼ yajlel tiʼ tamlel jiñi mar maʼañix miʼ mejlel ti tajtʌl.

8. ¿Chuqui jiñi tsaʼix bʌ laj cʌñʌ tilel?

⁸ Tsaʼix laj qʼuele chaʼan cheʼ bʌ Jehová miʼ ñusʌbeñonla jiñi lac mul lajal bajcheʼ miʼ junyaj chʼʌmbeñonla majlel jiñi laj cuch. David tsiʼ yʌlʌ: «Tijicñayob jiñi tsaʼix bʌ ñusʌbentiyob jiñi mach bʌ weñic tac tsiʼ meleyob yicʼot jiñi tsaʼix bʌ ñusʌbentiyob i mul, Jehová maʼañic mi caj i cʼajtesʌben i mul jiñi wiñic muʼ bʌ i chaʼlen mulil, tijicña jiñi wiñic» (Rom. 4:​6-8). ¡Jehová tiʼ sujm miʼ ñusan lac mul!

JEHOVÁ MIʼ JISAN LAC MUL

9. ¿Chuqui ti ejemplo miʼ cʼʌn Jehová chaʼan miʼ coltañonla lac chʼʌmben i sujm chaʼan miʼ junyaj ñusan lac mul?

⁹ Mi caj laj qʼuel yambʌ ejemplo muʼ bʌ caj i coltañonla lac chʼʌmben i sujm bajcheʼ Jehová tsiʼ cʼʌñʌ i cuxtʌlel i Yalobil chaʼan miʼ junyaj ñusʌben i mul jiñi muʼ bʌ i chaʼ ñaʼtan i bʌ. Jiñi Biblia miʼ yʌl chaʼan Jehová miʼ poc yicʼot miʼ sʌqʼuesʌben i mul jiñi muʼ bʌ i chaʼlen mulil (Sal. 51:7; Is. 4:4; Jer. 33:8). Jehová miʼ subeñonla bajcheʼ yilal mi laj cʌytʌl cheʼ bʌ miʼ sujcun loqʼuel jiñi lac mul: «Anquese wen chʌctsʼeran jini laʼ mul, lajal mi caj i sujtel bajcheʼ ñaʼal tsʌñal. Anquese wen chʌchʌc jini laʼ mul, lajal mi caj i sujtel bajcheʼ wen sʌsʌc bʌ tsuts» (Is. 1:18). Anquese jiñi lac mul lajal bajcheʼ jumpʼejl mancha ti pisil wen chʌchʌc bʌ i wocol bʌ miʼ loqʼuel, Jehová miʼ subeñonla chaʼan miʼ mejlel i junyaj sujcubeñonla jiñi lac mul.

10. ¿Baqui bʌ yambʌ ejemplo miʼ cʼʌn Jehová chaʼan miʼ coltañonla lac chʼʌmben i sujm chaʼan miʼ ñusan lac mul ti jumpʼejl i pusicʼal?

¹⁰ Cheʼ bajcheʼ tsaʼix laj qʼuele ti yambʌ estudio jiñi lac mul lajal bajcheʼ lac bet (Mat. 6:12; Luc. 11:4). Jajayajl mi lac chaʼlen mulil lajal bajcheʼ woli (choncol) lac bej otsan lac bet la quicʼot Jehová. Pero cheʼ bʌ miʼ ñusʌbeñonla lajal bajcheʼ miʼ jisan pejtelel jiñi lac bet, maʼañix miʼ wersa cʼajtin chaʼan mi lac toj anquese wen on. ¿Mach ba wen tijicña mi la cubin cheʼ Jehová miʼ jisan lac mul?

11. ¿Chuqui yom i yʌl cheʼ bʌ Jehová miʼ jisan lac mul? (Hechos 3:19).

¹¹ Cheʼ bʌ Jehová miʼ ñusan jiñi lac mul miʼ junyaj jisan (pejcan Hechos 3:19). Ñaʼtancu chaʼan an a bet ti jumpʼejl tienda, cheʼ bʌ jiñi i yum tienda mi caj i yʌp jiñi a bet tiʼ libreta miʼ chaʼlen ti rayar. Pero anquese miʼ chaʼlen ti rayar, bej cʌñʌlixto jiñi lac bet. Mach jiñic muʼ bʌ i mel Jehová cheʼ bʌ miʼ ñusʌbeñonla lac mul. Chaʼan mi lac ñumen chʼʌmben i sujm, laʼcu lac ñaʼtan iliyi, ti wajali chaʼan miʼ chaʼleñob tsʼijb miʼ cʼʌñob jumpʼejl tinta mach bʌ wocolic ti sujcuntel. Chaʼan miʼ yʌpob miʼ cʼʌñob jumpʼejl alʌ esponja tsʼitaʼ achʼ bʌ i sʌc miʼ chaʼ cʌytʌl, lajal bajcheʼ maʼañic chuqui tsaʼ tsʼijbunti. Wen tijicña mi la cubin cheʼ la cujil chaʼan cheʼ bʌ Jehová miʼ ñusan lac mul miʼ junyaj sujcun cʌytʌl (Sal. 51:9).

12. ¿Chuqui miʼ pʌsbeñonla jiñi ejemplo chaʼan colem tocal?

¹² Ti Isaías 44:​22, Jehová miʼ cʼʌn yambʌ ejemplo chaʼan miʼ yʌqʼueñonla c ñaʼtan chuqui miʼ mel cheʼ miʼ ñusan lac mul: «Joñon tsac sʌc jisa a mul cheʼ bajcheʼ tocal. Majlemix cheʼ bajcheʼ i yowix lum». Cheʼ bʌ Jehová miʼ ñusan jiñi lac mul lajal bajcheʼ miʼ mʌc ti colem tocal chaʼan maʼañix mi lac taj laj qʼuel.

13. ¿Bajcheʼ yubil maʼ yubin cheʼ a wujil chaʼan Jehová miʼ ñusʌbeñet a mul?

¹³ ¿Chuqui miʼ pʌsbeñonla ili ejemplo tac tsaʼix bʌ laj qʼuele? Chaʼan cheʼ bʌ Jehová miʼ ñusan lac mul, mach yomic mi lac ñaʼtan chaʼan yaʼto lotol i chaʼan come tsaʼix i cʼʌñʌ i chʼichʼel Jesús chaʼan miʼ toj jiñi lac mul. Jin chaʼan, lajal bajcheʼ tsaʼix i junyajl yʌpʌ jiñi lac bet, cheʼ bajcheʼ maʼañic tsaʼ lac chaʼle mulil. Jiñʌch muʼ bʌ i mel Jehová cheʼ mi lac chaʼ ñaʼtan lac bʌ, miʼ junyaj ñusan jiñi lac mul.

MI LAC MEJLEL TI CHAʼ SUJTEL TIʼ YAMIGO JEHOVÁ

14. ¿Chucoch miʼ mejlel lac ñop chaʼan Jehová mucʼʌch i ñusan lac mul tiʼ sujm? (Qʼuele jaʼel jiñi foto tac).

¹⁴ Cheʼ bʌ Jehová miʼ ñusan lac mul miʼ mejlel lac ñop chaʼan miʼ mejlel lac chaʼ sujtel tiʼ yamigo. Cheʼ bʌ mi lac ñaʼtan iliyi miʼ coltañonla chaʼan maʼañix mi lac pensarin jiñi tsaʼ bʌ lac mele i chaʼan maʼañic mi lac bʌcʼñan chaʼan michʼ yicʼotonla o chaʼan ti jumpʼejl bʌ qʼuin mi caj i yʌqʼueñonla lac toj lac mul. ¡Maʼañic mi caj i yujtel jiñi! ¿Chucoch mi la cʌl bajcheʼ jiñi? Come Jehová tiʼ sube jiñi xʼaltʼan Jeremías: «Maʼanic mi caj c chʌn ñaʼtʌbeñob i mul» (Jer. 31:34). Jiñi apóstol Pablo tsiʼ taja ti tʼan jaʼel ili versículo cheʼ bʌ tsiʼ yʌlʌ: «Maʼañix mi caj c chʌn cʼajtesan jiñi mulil tac tsaʼ bʌ i meleyob» (Heb. 8:12). ¿Chuqui yom i yʌl iliyi?

15. ¿Chuqui yom i yʌl cheʼ bʌ Jehová maʼañix miʼ cʼajtesan jiñi lac mul?

¹⁵ Cheʼ bʌ jiñi Biblia miʼ taj ti tʼan cʼajtesan an i tajol yom i yʌl chaʼan an chuqui miʼ mejlel, mach cojach yom i yʌl miʼ chaʼ ñaʼtʌntel tsaʼ bʌ ujti. Jumpʼejl ejemplo, jiñi wiñic tsaʼ bʌ jichʼchoconti tiʼ tʼejl Jesús tiʼ sube: «Cʼajtesañon cheʼ bʌ maʼ wochel ti a Yumʌntel» (Luc. 23:​42, 43). Jiñi wiñic mach cojach woli (yʌquel) i cʼajtin chaʼan miʼ chaʼ cʼajtesʌntel ti jiñi bʌ ora. I cheʼ bajcheʼ tsiʼ jacʼʌ Jesús miʼ pʌs chaʼan an chuqui woliʼ cʼajtin chaʼan miʼ mejlel tiʼ tojlel, jiñʌch cheʼ miʼ chaʼ cuxtesʌntel. Jin chaʼan, cheʼ bʌ Jehová miʼ yʌl chaʼan maʼañix mi caj i cʼajtesan jiñi lac mul, yom i yʌl chaʼan maʼañix chuqui mi caj i mel chaʼan miʼ yʌqʼueñonla lac toj jiñi lac mul. Cheʼ jaʼel, maʼañix baʼ ora mi caj i chaʼ cʼajtesʌbeñonla come tsaʼix i ñusʌbeyonla.

16. ¿Bajcheʼ yubil mi la cubin cheʼ Jehová miʼ ñusan jiñi lac mul?

¹⁶ Cheʼ bʌ Jehová miʼ ñusan lac mul librejoñixla mi la cubin lac bʌ. Jiñi Biblia miʼ cʼʌn yambʌ ejemplo chaʼan miʼ coltañonla lac chʼʌmben i sujm iliyi. Come luʼ xmulilonla, xyaj eʼtelonla i chaʼan jiñi mulil, lajal bajcheʼ cʌchʌlonla. Pero cheʼ bʌ Jehová miʼ ñusʌbeñonla jiñi lac mul lajal bajcheʼ miʼ tsʼoc jiñi cadena i mi laj cojlel ti jiñi mulil (Rom. 6:​17, 18; Apoc. 1:5). Cheʼ la cujil iliyi miʼ wen aqʼueñonla lac tijicñʌyel come la cujil chaʼan librejoñixla ti jiñi mulil.

17. ¿Chucoch mi la cʌl chaʼan cheʼ Jehová miʼ ñusan lac mul lajal bajcheʼ miʼ tsʼʌcan laj cʼamʌjel? (Isaías 53:5).

¹⁷ (Pejcan Isaías 53:5). Mi caj laj qʼuel jiñi cojix bʌ ejemplo, jiñi Biblia miʼ yʌl chaʼan jiñi mulil lajal bajcheʼ jumpʼejl tsʌts bʌ cʼamʌjel. Jehová tsiʼ cʼʌñʌ i cuxtʌlel i Yalobil chaʼan miʼ lajmesan jiñi laj cʼamʌjel, jin chaʼan miʼ mejlel lac chaʼ lʌcʼtesan lac bʌ tiʼ tojlel (1 Ped. 2:24). ¿Bajcheʼ yubil miʼ yubin juntiquil lac piʼʌl wen cʼamix bʌ muʼto bʌ i chaʼ cʼocʼan? ¡Wen tijicña! I cheʼʌch mi la cubin lac bʌ cheʼ Jehová miʼ ñusan jiñi lac mul. Lajal bajcheʼ tsaʼix i «tsʼʌca» jiñi laj cʼamʌjel.

BAJCHEʼ MIʼ COLTAÑONLA CHEʼ JEHOVÁ MIʼ ÑUSAN LAC MUL

18. ¿Chuqui miʼ pʌsbeñonla jiñi ejemplo tac tsaʼix bʌ laj qʼuele? (Qʼuele jaʼel jiñi recuadro «Bajcheʼ miʼ ñusʌbeñonla lac mul Jehová»).

¹⁸ ¿Chuqui miʼ pʌsbeñonla jiñi ejemplo tac tsaʼix bʌ laj qʼuele? Chaʼan cheʼ bʌ Jehová miʼ ñusʌbeñonla lac mul chaʼañʌch tiʼ pejtelel ora. Ili miʼ coltañonla chaʼan miʼ mejlel lac chaʼ lʌcʼtesan lac bʌ tiʼ tojlel. Pero laʼ laj cʼajtesan chaʼan mach i wentʌlelic miʼ ñusʌntel lac mul, Jehová miʼ ñusʌbeñonla come miʼ cʼuxbiñonla yicʼot wen uts i pusicʼal (Rom. 3:24).

19. a) ¿Chucoch mi lac wen ubin lac tijicñʌyel? (Romanos 4:8). b) ¿Chuqui mi caj laj qʼuel ti yambʌ estudio?

¹⁹ (Pejcan Romanos 4:8). Wen tijicña mi la cubin cheʼ Jehová miʼ ñusʌbeñonla lac mul, cheʼʌch bajcheʼ miʼ yʌl Salmo 130:4. Pero añʌch chuqui yom mi lac mel jaʼel, yom mi lac jacʼ tsaʼ bʌ i yʌlʌ Jesús: «Mi maʼañic mi laʼ ñusʌben i mul yambʌlob, jiñi laʼ Tat maʼañic mi caj i ñusʌbeñetla laʼ mul jaʼel» (Mat. 6:​14, 15). Jin chaʼan yomʌch mi lac ñusʌben i mul yambʌlob cheʼ bajcheʼ miʼ mel Jehová, jiñʌch muʼ bʌ caj laj qʼuel ti yambʌ estudio.