Ñopo chaʼan Jehová tsaʼix i ñusʌbeyet a mul

1, 2. ¿Bajcheʼ yubil mi la cubin cheʼ bʌ Jehová miʼ ñusan lac mul? (Qʼuele jaʼel jiñi dibujo).

JIÑI rey David tsiʼ wen ubi i chʼijyemlel chaʼan jiñi mach tac bʌ weñic tsiʼ mele ti wajali (Sal. 40:12; 51:3). Pero tsiʼ chaʼ ñaʼta i bʌ i Jehová tsiʼ ñusʌbe i mul (2 S. 12:13). Cheʼ bʌ David tsiʼ qʼuele chaʼan Jehová tsiʼ ñusʌbe i mul tsiʼ chaʼ taja i tijicñʌyel (Sal. 32:1).

² Joñonla jaʼel miʼ mejlel lac chaʼ ubin lac tijicñʌyel cheʼ bajcheʼ David. Mi tsaʼ lac chaʼle tsʌts bʌ mulil, Jehová miʼ ñusan lac mul mi mucʼʌch lac chaʼ ñaʼtan lac bʌ ti jumpʼejl lac pusicʼal, mi lac suben jiñi ancianojob i mi lac chaʼlen wersa chaʼan maʼañic mi lac chaʼ yajlel ti mulil (Pr. 28:13; Hech. 26:30; 1 Juan 1:9). Cheʼ bʌ Jehová miʼ ñusan lac mul maʼañix miʼ chʌn cʼajtesan, lajal bajcheʼ maʼañic tsaʼ lac chaʼle mulil i jiñi miʼ yʌqʼueñonla lac tijicñʌyel (Ez. 33:16).

3, 4. ¿Bajcheʼ yubil tsiʼ yubi i bʌ Jennifer? ¿Chuqui mi caj laj qʼuel ti ili estudio?

³ Pero an i tajol wocol mi la cubin chaʼan mi lac ñop chaʼan Jehová tsaʼix i ñusa lac mul. Jiñʌch tsaʼ bʌ ujti tiʼ tojlel Jennifer. I papá i mamá tsiʼ pʌsbeyob i sujmlel, pero cheʼ bʌ tsaʼix i taja majlel i colel, tsaʼix caji i mucu mel mach tac bʌ weñic. Ti wiʼil tsiʼ qʼuexta i melbal (chaʼlibal) i tsiʼ chʼʌmʌ jaʼ. Jennifer miʼ yʌl: «Tsaʼ wen ochi quicʼot wiñicob, mic wen jap lembal, mic wen michʼan i mic wen mulan c sʌclan taqʼuin. Cujil chaʼan jiñi Biblia miʼ yʌl chaʼan Jehová miʼ mejlel i ñusan lac mul come Jesús tsaʼix i yʌcʼʌ i cuxtʌlel. Anquese tsaʼix c chaʼ ñaʼta c bʌ maʼañic mic wen ñop chaʼan Jehová tsaʼix i junyaj ñusʌbeyon c mul».

⁴ Ixcu jatet, ¿muʼ baʼ ñop chaʼan Jehová tsaʼix i ñusa jiñi a mul? Cʼajtesan chaʼan Jehová miʼ pʼuntañonla i miʼ ñusan lac mul. Yom chaʼan tijicña mi la cubin lac bʌ cheʼ bajcheʼ David cheʼ bʌ tsaʼ ñusʌbenti i mul. Ti ili estudio mi caj laj qʼuel chucoch yom mi lac ñop chaʼan Jehová tsaʼix i ñusa lac mul yicʼot chuqui mi caj i coltañonla lac ñop iliyi.

¿CHUCOCH ÑUC I CʼɅJÑIBAL MI LAC ÑOP CHAʼAN JEHOVÁ TSAʼIX I ÑUSɅBEYONLA LAC MUL?

5. ¿Chuqui yom i yʌqʼueñonla lac ñaʼtan Satanás? Alʌ jumpʼejl ejemplo.

⁵ Mi mucʼʌch lac ñop chaʼan Jehová tsaʼix i ñusa lac mul maʼañic mi caj lac yajlel tiʼ yac tac Satanás. Laʼ laj cʼajtesan chaʼan Satanás yom chaʼan mi laj cʌy lac melben i yeʼtel Jehová. Junchajp muʼ bʌ i cʼʌn jiñʌch cheʼ miʼ yʌqʼueñonla lac ñaʼtan chaʼan Jehová maʼañic miʼ ñusan lac mul. Laʼcu lac ñaʼtan tiʼ tojlel jiñi wiñic am bʌ ti Corinto tsaʼ bʌ i chaʼle tsʼiʼlel i tsaʼ chojqui loqʼuel ti congregación, pero ti wiʼil tsaʼʌch i chaʼ ñaʼta i bʌ (1 Cor. 5:​1, 5, 13). Satanás tsiʼ mulaj chaʼan jiñi hermanojob maʼañic miʼ ñusʌbeñob i mul ili wiñic yicʼot maʼañic miʼ chaʼ otsañob ti congregación. Mi jiñi hermanojob maʼañic miʼ ñusʌbeñob i mul, ili wiñic mi caj i ñaʼtan chaʼan Jehová maʼañic baʼ ora mi caj i ñusʌben i mul. Jiñi miʼ mejlel i yʌqʼuen i chʼijyemlel i miʼ cʌy i melben i yeʼtel Jehová. Jiñʌch yom bʌ Satanás tsiʼ yʌlʌ jiñi. Ili ora cheʼʌch miʼ mel jaʼel, yom chaʼan mi lac ñaʼtan chaʼan Jehová maʼañic miʼ ñusan jiñi lac mul, i cheʼ bajcheʼ jiñi mi laj cʌy lac melben i yeʼtel. Pero maʼañic miʼ lotiñonla «come laj cʌñʌyʌch chuqui tac miʼ cʼʌn» (2 Cor. 2:​5-11).

6. ¿Chuqui miʼ mejlel i coltañonla mi bej anto lac mul mi la cubin?

⁶ Mi mucʼʌch lac ñop chaʼan Jehová tsaʼix i ñusa lac mul, mi lac chaʼ ubin lac tijicñʌyel. Cheʼ mi lac chaʼlen mulil mach tijicñayic mi la cubin lac bʌ (Sal. 51:17). I weñʌch cheʼ mi la cubin lac bʌ bajcheʼ jiñi, come jiñʌch muʼ bʌ caj i coltañonla chaʼan mi lac tojʼesan lac melbal yicʼot mi lac mel chuqui wem bʌ (2 Cor. 7:​10, 11). Pero mi bej anto lac mul mi la cubin anquese tsaʼix lac chaʼ ñaʼta lac bʌ miʼ mejlel la cubin lac chʼijyemlel, mi laj cʼuñʼan i mach la comix lac melben i yeʼtel Jehová mi la cubin. Pero mi mucʼʌch lac ñop chaʼan Jehová tsaʼix i ñusa lac mul, maʼañix mi caj lac chʌn cʼajtesan chuqui tsaʼ bʌ lac mele. I cheʼ bajcheʼ jiñi mi caj lac bej melben i yeʼtel Jehová yicʼot lac tijicñʌyel come chaʼ weñix añonla la quicʼot (Col. 1:10; 2 Tim. 1:3). Wʌle laʼ laj qʼuel chuqui miʼ mejlel i coltañonla chaʼan mi lac junyajl ñop chaʼan Jehová tsaʼix i ñusa lac mul.

¿CHUQUI MIʼ MEJLEL I COLTAÑET A ÑOP CHAʼAN JEHOVÁ TSAʼIX I ÑUSA A MUL?

7, 8. ¿Bajcheʼ tsiʼ taja i bʌ ti tʼan Jehová i bajcheʼ miʼ coltañonla jiñi? (Éx. 34:​6, 7)

⁷ Wen ñaʼtan bajcheʼ Jehová tsiʼ taja i bʌ ti tʼan. Laʼcu lac ñaʼtan tsaʼ bʌ i sube Moisés yaʼ ti wits Sinaí (pejcan Éxodo 34:​6, 7).a Jehová tsiʼ yʌlʌ i bʌ chaʼan juntiquilʌch Dios yujil bʌ pʼuntaya. Jin chaʼan, mi Jehová yujil pʼuntaya, ¿mach ba añic mi caj i ñusʌben i mul juntiquil muʼ bʌ i cʼuxbin yicʼot tsaʼix bʌ i chaʼ ñaʼta i bʌ? Mi Jehová maʼañic miʼ ñusʌben i mul juntiquil, lajal bajcheʼ jontol yicʼot maʼañic miʼ pʼuntañonla, pero Jehová mach cheʼic bajcheʼ jiñi.

⁸ Jehová mach yujilic lot, cheʼ bʌ miʼ yʌl chaʼan yujil pʼuntaya miʼ mejlel lac ñop chaʼan i sujmʌch muʼ bʌ i yʌl (Sal. 31:5). Jin chaʼan, mi wocol maʼ wubin chaʼan maʼ ñop chaʼan Jehová tsaʼix i ñusʌbeyet a mul, cʼajtiben a bʌ: ¿Muʼ ba c ñop chaʼan Jehová yujil pʼuntaya yicʼot miʼ ñusʌben i mul majqui jach miʼ chaʼ ñaʼtan i bʌ? Mi mucʼʌch a ñop jiñi, miʼ mejlel a ñop jaʼel chaʼan tsaʼix i ñusʌbeyet a mul.

9. ¿Chuqui miʼ pʌsbeñonla Salmo 32:5 chaʼan bajcheʼ miʼ ñusan lac mul Jehová?

⁹ Wen ñaʼtan muʼ bʌ i yʌl jiñi Biblia chaʼan bajcheʼ miʼ ñusan lac mul Jehová. David tiʼ sube Jehová: «Tsaʼ ñusʌbeyon c mul yicʼot c jontolil» (pejcan Salmo 32:5). Ili tʼan am bʌ ti hebreo tsaʼ bʌ chaʼlenti ti traducir bajcheʼ «tsaʼ ñusʌbeyon c mul» yom i yʌl jaʼel «miʼ chʼuy» o «miʼ chʼʌm majlel». Jin chaʼan cheʼ bʌ Jehová tsiʼ ñusʌbe i mul David, lajal bajcheʼ tsiʼ chʼuybe loqʼuel jiñi al bʌ i cuch i tsiʼ chʼʌmbe majlel. Jin chaʼan David chaʼ tijicñayix tsiʼ yubi come tsaʼix junyaj ñusʌbenti i mul (Sal. 32:​2-4). Mi mucʼʌch lac chaʼ ñaʼtan lac bʌ ti jumpʼejl lac pusicʼal, miʼ mejlel lac chaʼ ubin lac tijicñʌyel cheʼ bajcheʼ David. Mach yomix mi lac chʌn ñaʼtan chaʼan bej anto lac mul come Jehová tsaʼix i ñusʌbeyonla, lajal bajcheʼ tsaʼix i chʼʌmbeyonla majlel.

10, 11. ¿Chuqui miʼ pʌsbeñonla tiʼ tojlel Jehová jiñi Salmo 86:5?

¹⁰ (Pejcan Salmo 86:5). David tsiʼ yʌlʌ chaʼan Jehová miʼ ñusʌbeyonla lac mul. Ili yom i yʌl chaʼan Jehová mach ti orajic miʼ michʼan cheʼ bʌ an majqui miʼ chaʼlen mulil, i chaʼan yomʌch i ñusʌbeñob i mul jiñi muʼ bʌ i chaʼ ñaʼtañob i bʌ. ¿Chucoch cheʼ miʼ mel cheʼ bajcheʼ jiñi? Jiñi versículo miʼ bej al: «Maʼ pʌsbeñob i yutslel a pusicʼal». Cheʼ bajcheʼ tsaʼ laj qʼuele ti yambʌ estudio, jiñi cʼuxbiya muʼ bʌ i yubin Jehová tiʼ tojlel i wiñicob maʼañic miʼ jilel. I jiñʌch muʼ bʌ i ñijcan chaʼan miʼ ñusʌben i mul jiñi muʼ bʌ i chaʼ ñaʼtañob i bʌ (Is. 55:7). Jin chaʼan, mi wocol maʼ wubin chaʼan maʼ ñop chaʼan Jehová tsaʼix i ñusʌbeyet a mul, cʼajtiben a bʌ: «¿Muʼ ba c ñop chaʼan Jehová miʼ ñusʌben i mul jiñi muʼ bʌ i chaʼ ñaʼtañob i bʌ i miʼ cʼajtibeñob chaʼan miʼ ñusʌbeñob i mul?». Mi mucʼʌch a ñop, miʼ mejlel a ñop jaʼel chaʼan tsaʼix i ñusʌbeyet a mul.

¹¹ Cheʼ jaʼel, jiñi Biblia miʼ yʌl chaʼan Jehová yujil bajcheʼ melbilonla (pʌtbilonla) i miʼ chʼʌmben i sujm chaʼan xmulilonla, i jiñi miʼ ñuqʼuesan lac pusicʼal (Sal. 139:​1, 2). Wʌle mi caj laj qʼuel tsaʼ bʌ i yʌlʌ David ti yambʌ salmo muʼ bʌ i coltañonla lac ñop chaʼan Jehová yomʌch i ñusan lac mul.

¿CHUQUI YUJIL BɅ JEHOVÁ TI LAC TOJLEL?

12, 13. ¿Chuqui yambʌ mi laj cʌn ti Salmo 103:14 chaʼan bajcheʼ miʼ ñusan lac mul Jehová?

¹² (Pejcan Salmo 103:14). David tsiʼ taja ti tʼan junchajp chucoch Jehová miʼ ñusʌben i mul jiñi muʼ bʌ i chaʼ ñaʼtañob i bʌ. David tsiʼ yʌlʌ chaʼan Jehová yujil chaʼan melbilonla «ti tsʼubejn». Ili tsaʼ bʌ i taja ti tʼan yom i yʌl chaʼan Jehová yujil chaʼan xmulilonla i chaʼan miʼ cʼotel lac mel mach tac bʌ weñic. Laʼ lac ñumen cʌn chuqui yom i yʌl ili tsaʼ bʌ i yʌlʌ David.

¹³ David tsiʼ yʌlʌ chaʼan Jehová yujil chaʼan melbilonla ti tsʼubejn. Jehová tsiʼ mele Adán ti tsʼubejn, ili yom i yʌl chaʼan an tacʌch chuqui i cʼʌjñibal i chaʼan miʼ cajel jiñi wiñicob xʼixicob anquese tojobʌch: Cʼʌñʌl miʼ japob icʼ, miʼ cʼuxob i waj yicʼot miʼ wʌyelob (Gn. 2:7). Pero cheʼ bʌ Adán yicʼot Eva tsiʼ chaʼleyob mulil, añix yambʌ i sujmlel cheʼ bʌ miʼ yʌjlel chaʼan melbilonla ti tsʼubejn, yom i yʌl jaʼel chaʼan añix laj cʼunlel yicʼot xmuliloñixla. Jin chaʼan, Jehová yujil chaʼan an i tajol mi caj lac mel mach bʌ weñic, pero mi tsaʼ lac chaʼle mulil i mi lac chaʼ ñaʼtan lac bʌ, miʼ pʌsbeñonla i pʼuntaya i miʼ ñusʌbeñonla lac mul (Sal. 78:​38, 39).

14. a) ¿Chuqui miʼ pʌsbeñonla Salmo 103:12 chaʼan bajcheʼ miʼ ñusʌbeñonla lac mul Jehová? b) ¿Chuqui miʼ pʌsbeñonla chaʼan bajcheʼ Jehová tsiʼ ñusʌbe i mul David? (Qʼuele jiñi recuadro «Cheʼ bʌ Jehová miʼ ñusan lac mul, maʼañic miʼ chʌn cʼajtesan»).

¹⁴ David tsiʼ yʌlʌ chaʼan cheʼ bʌ Jehová miʼ ñusan lac mul, ñajt baqui miʼ choc majlel (pejcan Salmo 103:12). Lajal bajcheʼ jiñi lac mul an tiʼ pasibal qʼuin i Jehová miʼ choc majlel tiʼ bʌjlibal qʼuin. Ili yom i yʌl chaʼan cheʼ bʌ Jehová miʼ ñusan lac mul, lajal bajcheʼ ñajt baqui miʼ chʼʌm majlel, maʼañic miʼ chʌn cʼajtesan i mi muqʼuicto i cʼajtesʌbeñonla chaʼan miʼ yʌqʼueñonla lac toj (Ez. 18:​21, 22; Hech. 3:19).

15. ¿Chuqui miʼ mejlel i coltañet mi bej anto a mul maʼ wubin tiʼ caj tsaʼ bʌ a mele ti wajali?

¹⁵ Mi bej anto a mul maʼ wubin tiʼ caj tsaʼ chaʼle mulil wajali, jiñi Salmo 103 miʼ mejlel i coltañet a ñop chaʼan Jehová tsaʼix i ñusʌbeyet a mul. Jin chaʼan cʼajtiben a bʌ: «Mi Jehová miʼ cʼajtesan chaʼan xmulilon yic’ot tsaʼix i ñusa c mul come tsaʼix c chaʼ ñaʼta c bʌ, ¿mach ba jiñic yom bʌ mij cʼajtesan jaʼel? Cheʼ jaʼel, mi Jehová tsaʼix i ñajʌtesa jiñi c mul i maʼañic miʼ chʌn cʼajtesʌbeñon, ¿mach ba jiñic yom bʌ mic mel jaʼel?». Jehová maʼañix miʼ chʌn cʼajtesan a mul, jin chaʼan mach yomix maʼ chʌn cʼajtesan jaʼel (Sal. 130:3). Cheʼ bʌ maʼ ñop chaʼan Jehová tsaʼix i ñusʌbeyet, mi caj a chaʼ ubin a tijicñʌyel i mi caj a melben i yeʼtel ti jumpʼejl a pusicʼal.

16. ¿Chucoch mach weñic cheʼ mi lac chʌn ñaʼtan jiñi mulil tsaʼ bʌ lac mele ti wajali? (Qʼuele jaʼel jiñi dibujo).

¹⁶ Cheʼ jin jach mi lac chʌn cʼajtesan jiñi mulil tsaʼ bʌ lac mele ti wajali lajalonla bajcheʼ juntiquil muʼ bʌ i ñijcan majlel i carro i jin jach miʼ qʼuel majlel jiñi yespejo i maʼañic miʼ qʼuel majlel jiñi i bijlel. Weñʌch cheʼ miʼ bixel qʼuel jiñi espejo chaʼan miʼ qʼuel mi an majqui yaʼ tilel tiʼ pat. Pero chaʼan maʼañic miʼ taj accidente yomʌch miʼ qʼuel majlel i bijlel. Jiñʌch yom bʌ maʼ mel jaʼel. Weñʌch cheʼ maʼ bixel ñaʼtan chuqui mach bʌ weñic tsaʼ mele ti wajali chaʼan maʼañic maʼ chaʼ yajlel ti jiñi mulil. Pero mi jin jach maʼ chʌcʌ ñaʼtan chuqui mach bʌ weñic tsaʼ mele, mach tijicñayix mi caj a melben i yeʼtel Jehová. Ñumen wen cheʼ maʼ ñaʼtan chaʼan yaʼ ti tsijiʼ bʌ pañimil maʼañix mi caj a chʌn cʼajtesan jiñi mach tac bʌ weñic tsaʼ mele. Cheʼ bajcheʼ jiñi mi caj a melben i yeʼtel Jehová yicʼot a tijicñʌyel (Is. 65:17; Pr. 4:25).

ÑOPO CHAʼAN JEHOVÁ TSAʼIX I ÑUSA A MUL

17. ¿Chucoch yomʌch mi lac ñop chaʼan Jehová mucʼʌch i cʼuxbiñonla yicʼot miʼ ñusan lac mul?

¹⁷ Yom mi lac chaʼlen wersa lac ñumen ñop chaʼan Jehová mucʼʌch i cʼuxbiñonla yicʼot mucʼʌch i ñusan lac mul (1 Juan 3:19). ¿Chucoch? Come Satanás yom i yʌqʼueñonla lac ñaʼtan chaʼan Jehová maʼañic miʼ cʼuxbiñonla yicʼot maʼañic miʼ ñusan lac mul. Yom chaʼan mi laj cʌy lac melben i yeʼtel Jehová. Ñumento ili ora come tsʼitaʼ jachix i yorajlel cʌylem i chaʼan (Apoc. 12:12). ¡Pero mach la cʼʌc lac bʌ ti lotintel!

18. ¿Chuqui yom maʼ mel chaʼan maʼ ñop chaʼan Jehová mucʼʌch i cʼuxbiñet i tsaʼix i ñusʌbeyet a mul?

¹⁸ Ti yambʌ estudio tsaʼ laj qʼuele chuqui miʼ mejlel i coltañet chaʼan maʼ ñop chaʼan Jehová mucʼʌch i cʼuxbiñet. Ti ili estudio tsaʼ laj qʼuele chuqui miʼ mejlel a mel chaʼan maʼ ñop chaʼan Jehová tsaʼix i ñusa a mul. Aqʼuen i yorajlel chaʼan maʼ wen ñaʼtan chuqui miʼ yʌl jiñi Biblia chaʼan bajcheʼ miʼ ñusan lac mul Jehová. Cheʼ jaʼel, cʼajtesan chaʼan Jehová yujil chaʼan xmulilet yicʼot mucʼʌch i pʼuntañet. I ñaʼtan jaʼel chaʼan cheʼ bʌ Jehová miʼ ñusan lac mul, maʼañix miʼ chʌn cʼajtesan. Mi mucʼʌch a mel iliyi mi caj i mejlel a wʌl cheʼ bajcheʼ tsiʼ yʌlʌ David: «¡Wocolix a wʌlʌ Jehová chaʼan ‹tsaʼ ñusʌbeyon c mul yicʼot c jontolil›!» (Sal. 32:5).