¿Bajcheʼ miʼ mejlel laj cʼajtin ticʼojel?

1. ¿Chuqui yom mi lac mel chaʼan utsʼat miʼ loqʼuel jiñi muʼ bʌ lac ñaʼtan lac mel? (Proverbios 13:10; 15:22).

TI LAC pejtelel la com chaʼan utsʼat miʼ loqʼuel jiñi muʼ bʌ lac ñaʼtan lac mel. I chaʼan wen miʼ loqʼuel, jiñi i Tʼan Dios miʼ yʌl chaʼan yom mi laj cʼajtin ticʼojel (pejcan Proverbios 13:10; 15:22).

2. ¿Chuqui miʼ subeñonla Jehová?

² Muʼ bʌ i mejlel i yʌqʼueñonla wen tac bʌ ticʼojel jiñʌch Jehová. Jin chaʼan, yomʌch mi laj cʼajtiben chaʼan miʼ yʌqʼueñonla lac ñaʼtʌbal. Ti Salmo 32:​8, Jehová miʼ subeñonla: «Mi caj c tojʼesañet majlel tic wut». Ili yom i yʌl chaʼan Jehová mi caj i yʌqʼueñonla ticʼojel tac cheʼ i cʼʌjñibal lac chaʼan yicʼot mi caj i coltañonla lac jacʼ.

3. ¿Chuqui mi caj laj qʼuel ti ili estudio?

³ Ti ili estudio mi caj laj cʼʌn jiñi Biblia chaʼan mi la cʌqʼuen i jacʼbal ili cʼajtiya tac: 1) «¿Chuqui ti melbalʌl yom bʌ mic pʌs chaʼan miʼ coltañon jiñi ticʼojel tac muʼ bʌ cʌqʼuentel?», 2) «¿Majqui miʼ mejlel i yʌqʼueñon wen tac bʌ ticʼojel?», 3) «¿Bajcheʼ mic pʌs chaʼan i sujmʌch woli c sʌclan j coltʌntel?» i 4) «¿Chucoch mach yomic mij cʌybeñob tiʼ wenta yañoʼ bʌ chaʼan miʼ subeñoñob chuqui yom bʌ mic mel?».

«¿CHUQUI TI MELBALɅL YOM BɅ MIC PɅS?»

4. ¿Chuqui ti melbalʌl yom mi lac pʌs chaʼan miʼ coltañonla jiñi ticʼojel tac muʼ bʌ la cʌqʼuentel?

⁴ Mi la com chaʼan miʼ coltañonla jiñi ticʼojel tac muʼ bʌ la cʌqʼuentel yom mi lac pʌs lac pecʼlel. Yom mi laj cʼajtesan chaʼan ñumen wento mi caj i loqʼuel muʼ bʌ lac ñaʼtan lac mel mi mucʼʌch laj cʼajtiben ticʼojel juntiquil ñumen añix bʌ i ñaʼtʌbal. Mi maʼañic mi lac pʌs lac pecʼlel, Jehová maʼañic mi caj i mejlel i coltañonla i maʼañic mi caj lac mulan lac jacʼ jiñi ticʼojel tac am bʌ tiʼ Tʼan (Mi. 6:8; 1 Ped. 5:5). Pero mi mucʼʌch lac pʌs lac pecʼlel mi caj lac chʼʌm ti ñuc pejtelel jiñi ticʼojel tac loqʼuem bʌ ti Biblia.

5. ¿Chuqui tac tsiʼ mele David tsaʼ bʌ mejli i yʌcʼ chaʼan miʼ qʼuel i bʌ ti ñuc?

⁵ Laʼ laj qʼuel chuqui miʼ mejlel laj cʌn tiʼ tojlel David. Tsiʼ chʌn pʌsʌ i pecʼlel anquese cabʌl chuqui yujil bʌ melol yicʼot cabʌl chuqui ñuc tac bʌ tsiʼ mele. Cheʼ bʌ maxto reyic, David cʌmbil bajcheʼ juntiquil wen yujil bʌ i chaʼan bʌ música, jin chaʼan jiñi rey Saúl tsiʼ pʌyʌ tiʼ yotot chaʼan miʼ ñijcʌben jiñi arpa (1 S. 16:​18, 19). Cheʼ bʌ Jehová tsiʼ yajca chaʼan miʼ yochel bajcheʼ rey, tsiʼ yʌqʼue jiñi chʼujul bʌ i yespíritu (1 S. 16:​11-13). I cheʼ bʌ tsiʼ jisa Goliat yicʼot yambʌ i contrajob, jiñi israelitajob tsaʼ caji i qʼuelob ti ñuc (1 S. 17:​37, 50; 18:7). Cheʼ tsaʼic i chañʼesa i bʌ, tajol David tsaʼ mejli i ñaʼtan chaʼan mach cʼʌñʌlic miʼ yʌqʼuentel ticʼojel come cabʌlix chuqui ñusʌbil i chaʼan. Pero David mach cheʼic tsiʼ ñaʼta.

6. ¿Bajcheʼ la cujil chaʼan David tsaʼʌch i mulaj chaʼan miʼ yʌqʼuentel ticʼojel? (Qʼuele jaʼel jiñi dibujo).

⁶ Cheʼ bʌ David añix bajcheʼ rey, tiʼ sʌcla i yamigojob muʼ bʌ mejlel i yʌqʼueñob wen tac bʌ ticʼojel (1 Cr. 27:​32-34). Tsiʼ mele bajcheʼ ili come cʼʌlʌl ti wajali tsiʼ mulaj chaʼan miʼ yʌqʼuentel wen tac bʌ ticʼojel, mach yʌlʌyic mi tilem tiʼ tojlel juntiquil wiñic o juntiquil xʼixic. Laʼcu lac ñaʼtan tsaʼ bʌ ujti cheʼ bʌ Abigaíl, i yijñam juntiquil wiñic wen jontol bʌ (simaron bʌ) i cʼabaʼ Nabal, tsiʼ tiqʼui. David tsaʼʌch i pʌsʌ i pecʼlel i tsaʼʌch i chʼʌmʌ ti ñuc jiñi ticʼojel tsaʼ bʌ aqʼuenti, jin chaʼan maʼañic tsiʼ yotsa i bʌ ti wocol (1 S. 25:​2, 3, 21-25, 32-34).

7. ¿Chuqui mi laj cʌn tiʼ tojlel David? (Eclesiastés 4:13; qʼuele jaʼel jiñi foto tac).

⁷ ¿Chuqui mi laj cʌn tiʼ tojlel David? Junchajp jiñʌch chaʼan mach yomic mi lac ñaʼtan chaʼan tiʼ caj cabʌl chuqui la cujil bʌ melol o an lac privilegio luʼ la cujilix i mach cʼʌñʌlic mi la cʌqʼuentel ticʼojel. Yambʌ muʼ bʌ laj cʌn jiñʌch chaʼan yom mi lac chʼʌm ti ñuc yicʼot mi lac jacʼ jiñi wen tac bʌ ticʼojel muʼ bʌ la cʌqʼuentel mach yʌlʌyic majqui miʼ yʌqʼueñonla (pejcan Eclesiastés 4:13). Jiñi mi caj i coltañonla chaʼan maʼañic mi la cotsan lac bʌ ti wocol o mi la cotsan ti wocol yañoʼ bʌ.

«¿MAJQUI MIʼ MEJLEL I YɅQʼUEÑON WEN TAC BɅ TICʼOJEL?»

8. ¿Chucoch Jonatán jiñʌch tsaʼ bʌ mejli i coltan David chaʼan miʼ ñaʼtan chuqui yom bʌ miʼ mel?

⁸ Laʼ laj qʼuel chuqui yambʌ miʼ mejlel laj cʌn tiʼ tojlel David. David tsiʼ chʼʌmʌ ti ñuc jiñi ticʼojel tac muʼ bʌ i yʌqʼueñob jiñi wem bʌ añob yicʼot Jehová yicʼot muʼ bʌ i chʼʌmbeñob i sujm chuqui woli bʌ (choncol bʌ) i ñusan. Jumpʼejl ejemplo, cheʼ bʌ tsiʼ mulaj i ñaʼtan mi Saúl bej michʼto yicʼot, tsaʼ majli i pejcan Jonatán chaʼan miʼ ñaʼtan chuqui yom bʌ miʼ mel. ¿Chucoch tsiʼ mele bajcheʼ jiñi? Come yujil chaʼan Jonatán wen an yicʼot Jehová i cheʼ jaʼel wen i cʌñʌ Saúl (1 S. 20:​9-13). ¿Bajcheʼ miʼ mejlel lac lajin David?

9. ¿Majqui yom bʌ mi laj cʼajtiben ticʼojel? Alʌ jumpʼejl ejemplo (Proverbios 13:20).

⁹ Cheʼ bʌ an chuqui woli (yʌquel) lac ñaʼtan lac mel i an majqui la com laj cʼajtiben ticʼojel, ñumen wen cheʼ mi lac sʌclan juntiquil wem bʌ an yicʼot Jehová yicʼot muʼ bʌ i chʼʌmben i sujm jiñi woli bʌ lac ñusan come añix i ñusa jaʼel o añix i mele jiñi woli bʌ lac ñaʼtan lac mel (pejcan Proverbios 13:20).a Laʼcu lac ñaʼtan juntiquil hermano yom bʌ ñujpuñel. ¿Majqui miʼ mejlel i cʼajtiben ticʼojel? Tajol juntiquil i yamigo i bajñelto bʌ miʼ mejlel i yʌqʼuen ticʼojel tac loqʼuem bʌ ti Biblia. Pero ñumen wento jiñi ticʼojel muʼ bʌ caj i yʌqʼuentel mi jin miʼ cʼajtiben jiñi ñujpuñemobix bʌ i cʌñʌyoʼ bʌ jiñi chʼiton yic’ot tsʼitaʼ añix bʌ ora cajel i tem melbeñob i yeʼtel Jehová. Jiñi ñujpuñemoʼ bʌ mach cojach mi caj i subeñob bajcheʼ miʼ mejlel i cʼʌn jiñi principio tac am bʌ ti Biblia, mi caj i subeñob jaʼel chuqui tac ñusʌbilob i chaʼan.

10. ¿Chuqui mi caj laj qʼuel?

¹⁰ Tsaʼix laj qʼuele jiñi melbalʌl yom bʌ mi lac pʌs cheʼ bʌ mi la cʌqʼuentel ticʼojel i majqui miʼ mejlel i yʌqʼueñonla wem bʌ ticʼojel tac. Wʌle mi caj laj qʼuel bajcheʼ miʼ mejlel lac pʌs chaʼan tiʼ sujmʌch la com coltʌntel i mi weñʌch cheʼ mi laj cʌybeñob tiʼ wenta yañoʼ bʌ chaʼan miʼ subeñoñobla chuqui yom bʌ mi lac mel.

«¿BAJCHEʼ MIC PɅS CHAʼAN I SUJMɅCH WOLI C SɅCLAN J COLTɅNTEL?»

11, 12. a) ¿Chuqui mach bʌ yomic mi lac mel? b) ¿Bajcheʼ tsiʼ pʌsʌ Rehoboam chaʼan mach i sujmic woliʼ sʌclan i coltʌntel?

¹¹ Tajol an majqui miʼ cʼajtin ticʼojel pero woli jach i sʌclan chaʼan miʼ subentel chaʼan weñʌch jiñi woli bʌ i ñaʼtan i mel anquese mach ñoj weñic. Jiñi muʼ bʌ i mel bajcheʼ jiñi woliʼ pʌs chaʼan mach i sujmic woliʼ cʼajtin coltʌntel. Jiñi tsaʼ bʌ ujti tiʼ tojlel Rehoboam miʼ coltañonla laj qʼuel chuqui miʼ mejlel ti ujtel mi cheʼ mi lac mel bajcheʼ jiñi.

¹² Cheʼ bʌ Salomón tsaʼ chʌmi, Rehoboam jiñi i yalobil, tsaʼ ochi bajcheʼ rey. Ti jimbʌ ora weñixto bajcheʼ chumulob jiñi israelitajob, pero tsiʼ yʌlʌyob chaʼan tsaʼ wen ticʼlʌntiyob ti eʼtel (troñel) cheʼ bʌ wolito ti yumʌntel Salomón. Jin chaʼan tiʼ subeyob Rehoboam chaʼan maʼañic miʼ cʌlʌx ticʼlañob ti eʼtel. Rehoboam tiʼ subeyob chaʼan yomto miʼ ñaʼtan chuqui mi caj i mel. Weñʌch tsaʼ bʌ i ñaxan mele come tsaʼ majli i pejcan jiñi tsaʼ bʌ i coltayob Salomón chaʼan miʼ cʼajtibeñob ticʼojel (1 R. 12:​2-7). Pero maʼañic tsiʼ chʼʌmʌ ti ñuc jiñi ticʼojel tsaʼ bʌ aqʼuenti. ¿Chucoch? Tajol wʌn ñaʼtʌbilix i chaʼan chuqui yom bʌ i mel i woli jach i sʌclan chaʼan miʼ subentel chaʼan weñʌch jiñi muʼ bʌ caj i mel. Mi cheʼ bajcheʼ jiñi, tajol jin tiʼ caj tsaʼ majli i pejcan jiñi i piʼʌloʼ bʌ ti colel i tiʼ subeyob chaʼan miʼ ñumen acʼob ti eʼtel jiñi israelitajob, i jiñi jiñʌch yom bʌ i yubin Rehoboam (1 R. 12:​8-14). Tiʼ caj tsiʼ jacʼbe i tʼan jiñi i piʼʌloʼ bʌ ti colel an tsaʼ bʌ caji i contrajiñob Rehoboam i tsaʼ tejchi cabʌl wocol (1 R. 12:​16-19).

13. ¿Bajcheʼ miʼ mejlel lac pʌs chaʼan mucʼʌch lac mulan lac chʼʌm jiñi ticʼojel tac muʼ bʌ la cʌqʼuentel?

¹³ ¿Chuqui miʼ pʌsbeñonla tsaʼ bʌ ujti tiʼ tojlel Rehoboam? Chaʼan cheʼ bʌ mi laj cʼajtin ticʼojel yomʌch mi lac ñʌchʼtan yicʼot mi lac chʼʌm ti ñuc jiñi woli bʌ lac subentel. Tajol mach jiñic la com bʌ la cubin pero jiñʌch jiñi ñumen wem bʌ chaʼañonla. Jin chaʼan laʼ laj cʼajtiben lac bʌ: «Cheʼ bʌ mij cʼajtin ticʼojel i mach jiñic mic subentel chuqui com bʌ cubin, ¿mucʼʌch ba c chʼʌm ti ñuc o maʼañic?». Laʼ laj qʼuel jumpʼejl ejemplo.

14. ¿Chuqui yom bʌ mi laj cʼajtesan? Alʌ jumpʼejl ejemplo (qʼuele jaʼel jiñi dibujo).

¹⁴ Laʼcu lac ñaʼtan chaʼan juntiquil hermano miʼ subentel jumpʼejl eʼtel baqui wen mi caj i tojtʌl pero ñajt baqui yom miʼ majlel i jal mi caj i cʌy i familia. Cheʼ bʌ maxto i jacʼʌ i chʼʌm jiñi eʼtel miʼ cʼajtiben ticʼojel juntiquil anciano. Jiñi anciano miʼ cʼʌn jiñi Biblia chaʼan miʼ cʼajtesʌben chaʼan jiñi ñumen ñuc bʌ i cʼʌjñibal jiñʌch cheʼ miʼ coltan i familia chaʼan chʌn lʌcʼʌl miʼ yajñel ti Jehová (Efes. 6:4; 1 Tim. 5:8). Come jiñi hermano maʼañic tsiʼ mulaj tsaʼ bʌ subenti maʼañic miʼ chʼʌm ti ñuc jiñi ticʼojel. Jin chaʼan, miʼ majlel i cʼajtiben yambʌ hermanojob jinto miʼ taj juntiquil muʼ bʌ i suben chaʼan maʼañic i wocolel mi tsiʼ chʼʌmʌ jiñi eʼtel. ¿Woliyʌch ba i sʌclan i coltʌntel o woli jach i sʌclan juntiquil muʼ bʌ i suben chaʼan weñʌch jiñi tsaʼix bʌ i ñaʼta i mel? Yom mi laj cʼajtesan chaʼan jiñi lac pusicʼal miʼ mejlel i lotiñonla (Jer. 17:9). An i tajol jiñi ticʼojel maʼañic bʌ mi lac mulan jiñʌch muʼ bʌ mejlel i ñumen coltañonla.

«¿CHUCOCH MACH YOMIC MIJ CɅYBEÑOB TIʼ WENTA YAÑOʼ BɅ CHAʼAN MIʼ SUBEÑOÑOB CHUQUI YOM BɅ MIC MEL?»

15. ¿Chuqui jiñi mach bʌ yomic mi lac mel, i chucoch?

¹⁵ Jehová miʼ pijtan chaʼan ti jujuntiquil miʼ bajñel ñaʼtan chuqui yom bʌ miʼ mel (Gál. 6:​4, 5). Pero cheʼ bajcheʼ tsaʼix laj qʼuele, cheʼ bʌ an chuqui woli lac ñaʼtan lac mel yomʌch mi lac sʌclan laj coltʌntel yaʼ ti Biblia yicʼot tiʼ tojlel jiñi hermanojob añobix bʌ i ñaʼtʌbal. Mach bʌ yomic mi lac mel jin cheʼ mi laj cʌybeñob tiʼ wenta chaʼan miʼ subeñoñobla chuqui yom bʌ mi lac mel. Jin chaʼan, maʼañic baʼ ora mi caj laj cʼajtiben juntiquil la camigo o juntiquil wen laj cʌñʌ bʌ: «¿Chuqui maʼ mel cheʼ jatetiqui?». Cheʼ jaʼel, mach weñic cheʼ mucʼ jach lac mel muʼ bʌ laj qʼuel i melob yañoʼ bʌ, yomʌch mi lac bajñel ñaʼtan chuqui mi caj lac mel.

16. ¿Chuqui yom miʼ melob jiñi xcʌntʼañob ti Corinto? (1 Corintios 8:7; 10:​25, 26).

¹⁶ Laʼ laj qʼuel tsaʼ bʌ ujti cheʼ ti ñaxam bʌ siglo yaʼ ti congregación am bʌ ti Corinto. Jiñi xñoptʼañob yom miʼ ñaʼtañob mi mejlʌch i cʼuxob jiñi weʼelʌl tsaʼix bʌ ñaxan aqʼuenti jiñi melbil tac jach bʌ dios. Pablo tiʼ subeyob: «La cujil chaʼan jiñi melbil tac jach bʌ dios maʼañic i cʼʌjñibal ti pañimil yicʼot chaʼan juntiquil jach Dios» (1 Cor. 8:4). Jin chaʼan, an tsaʼ bʌ i ñaʼtayob chaʼan maʼañic i wocolel mi tsiʼ mʌñʌyob jiñi weʼelʌl muʼ bʌ i chojñel yaʼ ti mercado anquese tsaʼix ñaxan aqʼuenti jiñi melbil tac jach bʌ dios. I an yambʌ tsaʼ bʌ i ñaʼtayob chaʼan maʼañic mi caj i cʼuxob (pejcan 1 Corintios 8:7; 10:​25, 26). Jujuntiquilix yom miʼ ñaʼtan chuqui mi caj i mel. Pablo maʼañic baʼ ora tiʼ sube jiñi xñoptʼañob chaʼan añob tiʼ wenta i suben yambʌlob chuqui yom bʌ miʼ melob. Cheʼ jaʼel, maʼañic tsiʼ yʌlʌ chaʼan cheʼ miʼ melob cheʼ bajcheʼ miʼ melob yañoʼ bʌ come jujuntiquil mi caj i yujtel meloñel tiʼ tojlelob (Rom. 14:​10-12).

17. ¿Chuqui miʼ mejlel ti ujtel mi jin jach mi lac mel muʼ bʌ laj qʼuel i melob yañoʼ bʌ? Alʌ jumpʼejl ejemplo (qʼuele jaʼel jiñi foto tac).

¹⁷ ¿Am ba chuqui lajal miʼ mejlel ti ujtel ili ora cheʼ bajcheʼ tsaʼ bʌ ujti yaʼ ti Corinto? Laʼcu lac ñaʼtan chaʼan jiñi tsʼitaʼ loqʼuem tac bʌ ti jiñi chʼichʼ. Jujuntiquil yom miʼ ñaʼtan mi mucʼʌch caj i chʼʌm o maʼañic.b Tajol wocol mi la cubin chaʼan mi lac chʼʌmben i sujm iliyi, pero añʌch ti lac wenta mi lac ñaʼtan chuqui mi caj lac mel (Rom. 14:4). Mi cojach mi lac mel cheʼ bajcheʼ miʼ melob yañoʼ bʌ maʼañic baʼ ora mi caj laj cʌn laj cʼʌn lac ñaʼtʌbal chaʼan mi lac ñaʼtan chuqui yom bʌ mi lac mel (Heb. 5:14). Jin chaʼan, cheʼ bʌ muʼto caj lac chʼʌm jumpʼejl decisión, ñaxan yom mi lac wen chaʼlen ti investigar i mi laj qʼuel chuqui tac ti principio miʼ mejlel i coltañonla. I mi anto chuqui maʼañic bʌ woli lac chʼʌmben i sujm miʼ mejlel laj cʼajtiben juntiquil hermano añix bʌ i ñaʼtʌbal.

MACH LAJ CɅY LAJ CʼAJTIN TICʼOJEL

18. ¿Chuqui an i mele Jehová chaʼan miʼ coltañonla?

¹⁸ Jehová an i cʌybeyonla ti lac wenta chaʼan mi lac ñaʼtan muʼ bʌ caj lac mel come yujil chaʼan mi caj lac chaʼlen wersa lac mel chuqui miʼ mulan. An i yʌqʼueyonla jiñi Biblia yicʼot la camigojob añobix bʌ i ñaʼtʌbal muʼ bʌ mejlel i coltañonla chaʼan mi lac ñaʼtan bajcheʼ miʼ mejlel laj cʼʌn jiñi principio tac. Ili miʼ pʌs chaʼan Jehová miʼ cʌntañonla bajcheʼ juntiquil wem bʌ tatʌl (Pr. 3:​21-23). ¿Bajcheʼ miʼ mejlel lac pʌs chaʼan mi laj qʼuel ti ñuc jiñi am bʌ i mele ti lac tojlel?

19. ¿Bajcheʼ miʼ mejlel la cʌqʼuen i tijicñʌyel Jehová?

¹⁹ Jiñi tatʌlob tijicña miʼ yubiñob cheʼ bʌ miʼ qʼuelob chaʼan jiñi i yalobilob miʼ sujtelob ti wem bʌ xñoptʼan muʼ bʌ i tajob majlel i ñaʼtʌbal yicʼot miʼ mulan i coltan yañoʼ bʌ. Cheʼʌch miʼ yubin i bʌ Jehová jaʼel cheʼ bʌ miʼ qʼuel chaʼan mi lac taj majlel lac ñaʼtʌbal, mi laj cʼajtin ticʼojel i mi lac chʼʌm wen tac bʌ decisión.