Laʼ lac ñusʌben i sajtemal jiñi yambʌlob

1, 2. ¿Chuqui tsiʼ wʌn alʌ Jehová chaʼan jiñi i tejclum?

WɅLE ora an junmojt wiñicob xʼixicob (quixtañujob) chajpʌbiloʼ bʌ muʼ bʌ i cʼuxbiñob Dios yicʼot yomoʼ bʌ i melben i yeʼtel (troñel). Cʌmbilob bajcheʼ i testigojob Jehová. Melelʌch chaʼan mucʼʌch i tajob i sajtemal, pero Jehová miʼ cʼʌn chʼujul bʌ i yespíritu chaʼan miʼ yʌqʼueñob i bendición yicʼot miʼ tojʼesañob majlel. Laʼ laj qʼuel bajcheʼ an i mele.

² Jiñi muʼ bʌ i chʼujutesañob Jehová cheʼ ti 1914 maxto wen cabʌlobic. Pero yonlelix an i cʌñʌyob i sujmlel am bʌ ti Biblia yicʼot i testigojobix Jehová come wolʌch i yʌcʼ i bendición ti jiñi subtʼan. Dios tsiʼ wʌn alʌ chaʼan jiñi i tejclum mi caj i colel: «Jini mach bʌ ñuquic mi caj i pʼojlel ti jumpʼejl mil. Jini jumpʼejl alʌ colonia mi caj i colel ti colem tejclum. Joñon laʼ Yumon. Mi caj c tsʼʌctesan cheʼ i yorajlelix» (Isaías 60:22). Wen tsiquil chaʼan woliyʌch (choncolʌch) ti tsʼʌctiyel ili profecía. Jiñi i tejclum Jehová lajalʌch bajcheʼ jumpʼejl colem tejclum am bʌ i chaʼan ñumen ti 8 millón xchumtʌlob. Jiñʌch jiñi tejclum ñumen am bʌ xchumtʌl i chaʼan tiʼ pejtelel pañimil (mulawil).

3. ¿Bajcheʼ an i pʌsʌ i cʼuxbiya i tejclum Dios?

³ Ti ili cojix bʌ qʼuin, Jehová an i colta i ñumen pʼʌtʼesañob i cʼuxbiya jiñi i wiñicob. Dios «Cʼuxbiyajʌch» i yom chaʼan cheʼʌch miʼ mel i wiñicob jeʼel (1 Juan 4:8). Jesús tsiʼ yʌlʌ chaʼan yom miʼ cʼuxbiñob i bʌ jiñi xcʌntʼañob i chaʼan. Tsiʼ subeyob jaʼel: «Cheʼ jini, pejtelel winicob mi caj i ñaʼtañob xcʌntʼañetla c chaʼan cheʼ mi laʼ cʼuxbin laʼ bʌ» (Juan 13:34, 35). Ti ili ora, jiñi i tejclum Jehová an i pʌsʌ i cʼuxbiya anquese an guerra tac. Jumpʼejl ejemplo, cheʼ tsaʼ ujti jiñi Segunda Guerra Mundial cheʼ bʌ 55 millón quixtañu tsaʼ chʌmiyob. Pero jiñi Testigojob maʼañic tsiʼ chaʼleyob tsʌnsa (pejcan Miqueas 4:1, 3). Ili an i coltayob chaʼan maʼañobic i mul miʼ yajñelob (Hechos 20:26).

4. ¿Chucoch wen ñuc ti qʼuelol cheʼ woliʼ colel majlel i tejclum Dios?

⁴ Wʌle ora, jiñi i tejclum Dios woliʼ colel majlel anquese an pʼʌtʌl bʌ i contra. Ili i contra jiñʌch Satanás, «i dios jini jontoloʼ bʌ ti pañimil» (2 Corintios 4:4). Tiʼ pejtelel jiñi organización i chaʼan bʌ política yicʼot jiñi muʼ bʌ i ñumel ti televisión o yan tac bʌ jiñʌch an tiʼ cʼʌb Satanás, i miʼ cʼʌn chaʼan miʼ mʌctan jiñi subtʼan. Pero maʼañic miʼ mejlel. «Yujil [chaʼan] lʌcʼʌlix i yorajlel» miʼ jisʌntel, jin chaʼan woliʼ chaʼlen wersa chaʼan mi laj cʌy lac melben i yeʼtel Jehová (Apocalipsis 12:12).

¿XUCʼUL BA MI CAJ LA CAJÑEL CHEʼ YAÑOʼ BɅ MIʼ MELOB MACH BɅ TOJIC?

5. ¿Chucoch an qʼuiñil miʼ mejlel i lowonla yañoʼ bʌ? (Qʼuele jiñi foto am bʌ tiʼ tejchibal).

⁵ I wiñiconbʌla Dios lac ñaʼtayix chaʼan wen an i cʼʌjñibal cheʼ mi laj cʼuxbin Dios yicʼot yambʌ quixtañujob. Jesús tsiʼ yʌlʌ: «‹Cʼuxbin a Yum Dios tiʼ pejtelel a pusicʼal, tiʼ pejtelel a chʼujlel [cuxtʌlel], tiʼ pejtelel a ñaʼtʌbal›. Jiñʌch jini ñaxan bʌ mandar, jini cʼax ñuc bʌ. Lajal jini wiʼilix bʌ mandar: ‹Cʼuxbin a piʼʌlob cheʼ bajcheʼ maʼ cʼuxbin a bʌ ti a bajñelil›» (Mateo 22:35-39). Pero jiñi Biblia miʼ subeñonla chaʼan xmuliloñixla cheʼ mi la quilan pañimil (chʼocʼan) tiʼ caj jiñi mulil tsaʼ bʌ i mele Adán (pejcan Romanos 5:12, 19). Jin chaʼan, tajol juntiquil hermano ti congregación miʼ mel o miʼ yʌl muʼ bʌ mejlel i lowonla. ¿Chuqui mi caj lac mel cheʼ jiñi? ¿Chʌn pʼʌtʌl ba mi caj i yajñel laj cʼuxbiya ti Jehová? ¿Xucʼul ba mi caj la cajñel tiʼ tojlel Jehová yicʼot i tejclum? (Qʼuele jiñi recuadro «¿Chuqui yom i yʌl?»). Jiñi Biblia miʼ taj ti tʼan i wiñicob Dios tsaʼ bʌ i lowoyob yañoʼ bʌ tiʼ caj tsaʼ bʌ i yʌlʌyob o meleyob. Laʼ laj qʼuel chuqui miʼ mejlel laj cʌn tiʼ tojlelob.

6. ¿Chuqui mach bʌ tojic tsiʼ mele Elí?

⁶ Laʼ lac ñaʼtan tiʼ tojlel Elí. Jiñʌch ñuc bʌ motomaj ti Israel, i jiñi i yalobilob maʼañic tsiʼ chʼujbibeyob i mandar Jehová. Jiñi Biblia miʼ yʌl chaʼan wen jontolob yicʼot maʼañic tsiʼ qʼueleyob ti ñuc Jehová (1 Samuel 2:12). Elí yujil chaʼan woliʼ melob mach bʌ weñic jiñi i yalobilob. Pero tsiʼ yotsa i bʌ ti wocol cheʼ maʼañic tsiʼ tiqʼuiyob. Ti wiʼil, Jehová tsiʼ yʌqʼue i toj i mul Elí yicʼot jiñi i yalobilob. Cheʼ jaʼel, maʼañix tsiʼ yʌcʼʌ chaʼan bej jinto tiʼ pʼolbal Elí miʼ loqʼuel jiñi ñuc bʌ motomaj (1 Samuel 3:10-14). Laʼ cu lac ñaʼtan chaʼan chumulonla cheʼ tiʼ yorajlel Elí i mi la cubin chaʼan cheʼ jach woliʼ qʼuel cheʼ miʼ melob mach bʌ weñic jiñi i yalobilob. ¿Chuqui mi caj lac mel? ¿Muʼ ba caj laj cʌcʼ ti cʼunʼan lac ñopoñel (chʼujbiya) ti Jehová yicʼot mi laj cʌy?

7. a) ¿Chuqui ti tsʌts bʌ mulil tsiʼ mele David? b) ¿Chuqui tsiʼ mele Dios chaʼan jiñi?

⁷ Laʼ laj cʌl chaʼan tiʼ tojlel David. Cabʌl wem bʌ i melbal, jin chaʼan Jehová tsiʼ wen cʼuxbi (1 Samuel 13:13, 14; Hechos 13:22). Pero tsaʼʌch i mele tsʌts tac bʌ mulil jeʼel. An junsujtel tsiʼ piʼlebe i yijñam juntiquil i soldado i cʼabaʼ Urías, cheʼ bʌ an ti guerra. I jiñi xʼixic cʌntʌbilix i chaʼan i yalʌl (xchʌmelix) tsaʼ cʌyle. Come David mach yom miʼ ñaʼtʌntel chuqui tsiʼ mele, tsiʼ xiqʼui ti pʌyol Urías chaʼan miʼ sujtel tiʼ yotot. Tsiʼ lon ñaʼta chaʼan Urías mi caj i piʼlen i yijñam, i cheʼʌch miʼ poj mejlel ti ñaʼtʌntel chaʼan jin i yalobil. Pero Urías maʼañic tsiʼ chʼujbi sujtel. Jin chaʼan, David tsiʼ wen chajpa chaʼan miʼ mejlel ti tsʌnsʌntel ti yambʌ guerra. David yicʼot i familia cabʌl tsiʼ taja wocol tiʼ caj tsaʼ bʌ i mele (2 Samuel 12:9-12). Pero Jehová tsiʼ pʌsbe i yutslel yicʼot tsiʼ ñusʌbe i mul. Yujil chaʼan David yom i mel chuqui toj (1 Reyes 9:4). Cheʼ yaʼic chumulonla ti jiñi bʌ ora, ¿bajcheʼ yubil tsaʼ la cubi lac bʌ chaʼan tsaʼ bʌ i mele David? ¿Tsaʼ ba laj cʌyʌ lac melben i yeʼtel Jehová tiʼ caj jiñi?

8. a) ¿Baqui bʌ tʼan maʼañic tiʼ tsʼʌctesa Pedro? b) Mi jiñi Pedro tsiʼ mele mach bʌ tojic, ¿chucoch Jehová tsiʼ bej aqʼue i yeʼtel?

⁸ Yambʌ ejemplo am bʌ ti Biblia jin i chaʼan apóstol Pedro. Jesús tsiʼ yajca ti apóstol i chaʼan. Pero Pedro an tacʌch mach bʌ weñic tsiʼ yʌlʌ yicʼot tsiʼ mele. Jumpʼejl ejemplo, tsiʼ yʌcʼʌ i tʼan chaʼan maʼañic mi caj i cʌy Jesús, anquese cheʼʌch miʼ melob jiñi yañoʼ bʌ (Marcos 14:27-31, 50). Pero cheʼ bʌ Jesús tsaʼ chujqui majlel, tiʼ pejtel jiñi apóstolob tsiʼ cʌyʌyob, jinto jiñi Pedro. Uxsujtel tsiʼ yʌlʌ chaʼan mach i cʌñʌyic Jesús (Marcos 14:53, 54, 66-72). Pero Pedro tsiʼ yubi i chʼijiyemlel chaʼan tsaʼ bʌ i mele. Jin chaʼan, Jehová tsiʼ ñusʌbe i mul yicʼot tsiʼ chʌn aqʼue ñuc bʌ eʼtel tac. Cheʼ xcʌntʼañoñicla i chaʼan Jesús ti jiñi bʌ ora yicʼot tsaʼic la cubi tsaʼ bʌ i mele Pedro, ¿tsaʼto ba caji lac chʌn qʼuel ti ñuc Jehová?

9. ¿Chucoch maʼ ñaʼtan chaʼan Dios mi caj i mel chuqui toj bʌ tiʼ pejtelel ora?

⁹ ¿Chuqui miʼ mejlel laj cʌn tiʼ tojlelob? Chaʼan an i wiñicob Jehová melbil bʌ i chaʼañob mach bʌ weñic i an i lowoyob yañoʼ bʌ. ¿Chuqui mi caj lac mel mi cheʼ miʼ yujtel ili ora? ¿Muʼ ba caj laj cʌy jiñi tempa bʌ tac i mi caj lac ñajtʼesan lac bʌ ti Jehová yicʼot i tejclum? ¿O muʼ ba caj lac ñaʼtan chaʼan Jehová añʌch i yutslel i tajol woliʼ yʌqʼuen i yorajlel chaʼan miʼ cʌy i mul jiñi quixtañu? Pero ¿ixcu mi maʼañic miʼ cʌy i mul? ¿Muʼ ba caj lac ñop chaʼan Jehová yujilʌch chuqui choncol ti ujtel i mucʼʌch caj i mel yom bʌ melol cheʼ baqui ora wen miʼ qʼuel? Mi cheʼʌch yom miʼ qʼuel, miʼ mejlel i locʼsan jiñi quixtañu yaʼ ti congregación. Pero tiʼ pejtelel ora yom mi lac ñaʼtan chaʼan Jehová mi caj i mel chuqui toj.

YOM CHɅN XUCʼULONLA

10. ¿Chuqui tsaʼ cʼoti i ñaʼtan Jesús chaʼan tsaʼ bʌ i mele Judas Iscariote yicʼot Pedro?

¹⁰ Jiñi Biblia miʼ taj ti tʼan chaʼan cabʌl xucʼul bʌ tsaʼ ajñiyob tiʼ tojlel Jehová yicʼot i tejclum anquese an tsaʼ bʌ i meleyob mach bʌ weñic. Jiñi ñumen wem bʌ ejemplo jiñʌch Jesús. Cheʼ bʌ maxto i yajca jiñi 12 apóstolob i chaʼan, jumpʼejl acʼʌlel tsiʼ ñaxan cʼajtibe i coltaya i Tat ti oración. Pero Judas Iscariote, juntiquil apóstol i chaʼan, tsiʼ cʌyʌ. I jiñi apóstol Pedro tsiʼ yʌlʌ chaʼan mach i cʌñʌyic (Lucas 6:12-16; 22:2-6, 31, 32). Jesús wen yujil chaʼan Jehová yicʼot jiñi yambʌ xcʌntʼañob i chaʼan maʼañobic i mul chaʼan tsaʼ bʌ i mele Judas Iscariote yicʼot Pedro. Jin chaʼan, lʌcʼʌl tsaʼ ajñi tiʼ tojlel i Tat yicʼot xucʼul tsiʼ chʌn melbe i yeʼtel. Jehová tsaʼʌch i chaʼ aqʼue i cuxtʌlel i ti wiʼil tsiʼ waʼchoco bajcheʼ Rey chaʼan jiñi Yumʌntel ti panchan (Mateo 28:7, 18-20).

11. ¿Chuqui tsiʼ wʌn alʌ jiñi Biblia tiʼ tojlel i wiñicob Dios ili bʌ ora?

¹¹ Jiñi i ejemplo Jesús miʼ cʌntesañonla chaʼan yom xucʼul mi la cajñel tiʼ tojlel Jehová yicʼot i tejclum. I añʌch chucoch yom mi lac mel. Miʼ mejlel laj qʼuel chaʼan Jehová choncol i pʌsbeñonla majlel jiñi bij ti ili cojix bʌ qʼuin. Miʼ coltañonla ti subtʼan tiʼ pejtelel pañimil. Cojach joñonla woli bʌ lac mel ili troñel. Wocolix i yʌlʌ i cʌntesa Jehová, junmujchʼ añonla ti lac pejtelel yicʼot tijicñayonla. Jiñi Biblia tsiʼ wʌn alʌ chaʼan jiñi i wiñicob Dios mi caj i tajob «i tijicñʌyel i pusicʼal» (Isaías 65:14).

12. ¿Bajcheʼ yom mi laj qʼuelben i sajtemal yambʌlob?

¹² Wen tijicñayonla come Jehová miʼ pʌsbeñonla jiñi bij yicʼot miʼ coltañonla lac mel chuqui toj. Jiñi quixtañujob añoʼ bʌ tiʼ pañimil Satanás maʼan tijicñayob i maʼañobic i pijtaya ti talto bʌ qʼuin. Jin chaʼan, mi an majch miʼ taj i sajtemal, laʼ lac ñaʼtan bajcheʼ qui yom mi laj qʼuel i chuqui yom mi lac mel. Mach lac ñaʼtan chaʼan jin jach tiʼ caj yom mi laj cʌy Jehová yicʼot i tejclum. Mach utsʼatic mi cheʼ mi lac mel. Yom xucʼulonla tiʼ tojlel Jehová yicʼot laʼ lac mel bajcheʼ miʼ subeñonla. Laʼ laj qʼuel bajcheʼ miʼ mejlel lac mel.

¿CHUQUI YOM MI LAC MEL?

13, 14. a) ¿Chucoch mach ti orajic yom mi lac michʼan yicʼot yañoʼ bʌ? b) ¿Baqui bʌ tʼan yom mi lac chʌn cʼajtesan?

¹³ ¿Chuqui mi caj lac mel mi juntiquil la quermaño miʼ yʌl o miʼ mel muʼ bʌ i lowonla? Jiñi Biblia miʼ yʌl chaʼan mach ti orajic yom mi lac michʼan (Eclesiastés 7:9). Luʼ xmulilonla i mi lac mel mach bʌ tojic. Jin chaʼan, yom mi lac pʌs chaʼan la cujil pijt yicʼot mi laj cʼajtesan chaʼan an i tajol mucʼʌch caj i yʌlob o i melob mach bʌ weñic. Cheʼ jaʼel, mach yom mi lac chʌn cʼajtesan jiñi mach bʌ weñic miʼ mel yañoʼ bʌ come tajol mach chʌn tijicñayix mi caj lac melben i yeʼtel Jehová. Ñumen wocol bʌ jiñʌch cheʼ miʼ cʼunʼan lac ñopoñel ti Dios i tajol mi lac ñajtʼesan lac bʌ tiʼ yorganización. Bajcheʼ jiñi mach mejlic lac melben i troñel Jehová mi añic lac pijtaya chaʼan mi lac chumtʌl ti tsijiʼ bʌ pañimil.

¹⁴ Jin chaʼan, ¿chuqui miʼ mejlel i coltañonla chaʼan chʌn tijicña mi lac melben i yeʼtel Dios anquese an muʼ bʌ i melob mach bʌ weñic ti lac tojlel? Yom mi lac chʌn cʼajtesan ili i tʼan Jehová: «Wolic mel tsijiʼ bʌ panchan yicʼot tsijiʼ bʌ pañimil. Maʼanic mi caj i chʌn ñaʼtʌntel jini tsaʼix bʌ ñumi. Maʼanix majch mi caj i chʌn cʼajtesan» (Isaías 65:17; 2 Pedro 3:13). Jehová mi caj i yʌqʼueñonla ili bendición tac mi chʌn xucʼulonla mi la cajñel tiʼ tojlel.

15. ¿Chuqui yom tsiʼ yʌlʌ Jesús mi lac mel cheʼ yañoʼ bʌ miʼ melob mach bʌ weñic?

¹⁵ Melelʌch chaʼan maxto chumuloñicla yaʼ ti tsijiʼ bʌ pañimil. Jin chaʼan, mi an majqui miʼ mel mach bʌ weñic ti lac tojlel, laʼ lac ñaʼtan chuqui yom Jehová mi lac mel. Jumpʼejl ejemplo, Jesús tsiʼ yʌlʌ: «Mi woli laʼ ñusʌben i mul laʼ piʼʌlob, laʼ Tat ti panchan miʼ ñusʌbeñetla laʼ mul. Pero mi mach mi laʼ ñusʌbeñob i mul laʼ piʼʌlob, maʼanic miʼ ñusʌbeñetla laʼ mul laʼ Tat jaʼel». I cheʼ bʌ jiñi apóstol Pedro tsiʼ cʼajtibe Jesús mi cojach «tiʼ wucyajlel» yom miʼ chaʼlen ñusa mulil, Jesús tsiʼ jacʼʌ: «Yom cʼʌlʌl ti lujumpʼejl i chʌncʼal ti wucyajlel (77)». Jesús tsiʼ wen cʌntesayonla chaʼan tiʼ pejtelel ora yom mi lac ñusʌben i mul yañoʼ bʌ (Mateo 6:14, 15; 18:21, 22).

16. ¿Chuqui wem bʌ tsiʼ pʌsbeyonla cʌytʌl José?

¹⁶ Jiñi ejemplo chaʼan José miʼ pʌsbeñonla bajcheʼ yom mi lac jacʼ cheʼ an majqui miʼ mel mach bʌ utsʼatic ti lac tojlel. José yicʼot i yijtsʼin jin jach i yalobilob tsaʼ bʌ i taja Jacob yicʼot Raquel. Jacob an yambʌ 10 i yalobilob, pero tsiʼ ñumen cʼuxbi José. Jin chaʼan, José tsaʼ caji ti michʼ qʼuejlel tiʼ yʌscuñob. Tsaʼ cʼoti i wen tsʼaʼleñob, i jin chaʼan tsiʼ choñoyob. Jiñi i yumob José tsiʼ pʌyʌyob majlel ti Egipto. Cheʼ ñumeñix jabil tac, jiñi rey ti Egipto tsiʼ sujtesa José ti jiñi cojach bʌ i chaʼticlel wiñic ñumen ñuc bʌ ti jiñi tejclum. Jiñi rey tsiʼ wen mulaj tiʼ pejtelel chuqui wem bʌ tsiʼ mele José. Ti wiʼil, jiñi i yʌscuñob José tsaʼ majliyob ti mʌn bʌlñʌcʼʌl yaʼ ti Egipto come maʼañix bʌlñʌcʼʌl tiʼ tejclumob. Cheʼ bʌ tsiʼ qʼueleyob José, maʼañic tsiʼ cʌñʌyob. Pero i bajñel tsaʼʌch i cʌñʌyob. Anquese mach utsʼatic tsaʼ bʌ i meleyob tiʼ tojlel, maʼan tsiʼ chaʼ sutqʼuibeyob. Tsaʼ jach i ñaxan wen qʼueleyob mi tsaʼix i qʼuextayob i melbal. Cheʼ bʌ José tsiʼ qʼuele chaʼan cheʼʌchi, tsiʼ yʌlʌ chaʼan jiñʌch i yerañob. Cheʼ tsʼitaʼ ñumeñix jabil, tsiʼ tijicñesayob cheʼ bʌ tsiʼ subeyob: «Mach yomix mi laʼ chaʼlen bʌqʼuen. Joñon mi caj c weʼsañetla yicʼot laʼ walobilob» (Génesis 50:21).

17. ¿Chuqui mi caj a mel cheʼ ba an majqui miʼ mel mach bʌ weñic?

¹⁷ Ti lac pejtelel mi lac mel chuqui mach bʌ weñic, i miʼ mejlel lac low yambʌlob. Jin chaʼan, mi tsaʼ lac ñaʼta chaʼan an majqui tsaʼ lac lowo ti lac tʼan, laʼ lac chʼujbin jiñi ticʼojel am bʌ ti Biblia. Laʼ laj cʼajtin i ñusʌntel lac mul yicʼot laʼ chaʼ utsʼaconla la quicʼot la quermaño (pejcan Mateo 5:23, 24). ¿Mach ba muqʼuic lac mulan cheʼ mi lac ñusʌbentel lac mul? Cheʼʌch yom mi lac mel tiʼ tojlel yambʌlob jaʼel. Ti Colosenses 3:13 miʼ yʌl chaʼan yom mi laj ‹cuchben lac bʌ lac sajtemal› yicʼot mi lac ñusʌben lac bʌ lac mul, cheʼʌch bajcheʼ miʼ ñusʌbeñonla lac mul Jehová ‹cheʼʌch yom mi lac mel›. Mi mucʼʌch laj cʼuxbin la quermañojob, muqʼuix caj lac ñusan jiñi tsaʼ bʌ melbentiyonla (1 Corintios 13:5). Mi cheʼʌch mi lac mel, Jehová mi caj i ñusʌbeñonla jeʼel. Jin chaʼan, yom utsonla tiʼ tojlel yambʌlob, cheʼʌch bajcheʼ miʼ mel Jehová ti lac tojlel (pejcan Salmo 103:12-14).