Ti a tsʼej: Yasser Qudaih/Anadolu via Getty Images, ti a ñoj: RONALDO SCHEMIDT/AFP via Getty Images
¡YOM CHɅN YɅXɅL LA CO!
¿Jala mi caj i jilel jiñi guerra tac? | ¿Chuqui miʼ yʌl jiñi Biblia?
«I yorajlel wʌleʼli chaʼan maʼañic miʼ ñumen tsʌtsʼan ili wocol. I yorajlel wʌleʼli chaʼan mi lac ticʼ lac bʌ» (tsaʼ bʌ i yʌlʌ António Guterres, secretario general chaʼan jiñi Naciones Unidas, chaʼan bajcheʼqui Irán tsiʼ contraji Israel ti sábado 13 de abril, 2024).
Jiñi guerra ti Oriente Próximo (tiʼ oestejlel Asia) mucʼ jach i tsʼitaʼ pʌs woli bʌ i yujtel tiʼ petol pañimil.
«Ili ora, jiñi guerra tac yicʼot jontolil ñumento an bajcheʼ ti Segunda Guerra Mundial i 2 mil millón lac piʼʌlob chumulob baqui an ili wocol tac» (Consejo de Seguridad de la ONU, 26 de enero, 2023).
Jiñi tejclum tac woli bʌ i ñusañob ili wocol jiñʌch Israel, Gaza, Siria, Azerbaiyán, Ucrania, Sudán, Etiopía, Níger, Myanmar yicʼot Haití.a
¿Jalaqui mi caj i jilel jiñi guerra tac? ¿Muʼ ba i mejlel i yʌcʼob ñʌchʼtʌlel jiñi yumʌlob? ¿Chuqui miʼ yʌl jiñi Biblia?
Jiñi pañimil an ti guerra
Jiñi wocol tac am bʌ ili ora tiʼ petol pañimil miʼ pʌs chaʼan tsʼitaʼ jax yom chaʼan miʼ jilel jiñi guerra tac. Cheʼ bajcheʼ miʼ yʌl jumpʼejl profecía, ili wocol tac miʼ pʌs chaʼan chumulonla ti «i yorajlel i jilibal pañimil» (Mateo 24:3).
«Jatetla mi caj laʼ wubin ti alol guerra tac [...]. Come mi caj i contrajin i bʌ jumpʼejl tejclum yicʼot yambʌ, jumpʼejl yumʌntel yicʼot yambʌ» (Mateo 24:6, 7).
Pejcan jiñi tema «¿Chuqui miʼ pʌs chaʼan añoñixla ti «jiñi cojix tac bʌ qʼuin?» chaʼan maʼ qʼuel chucoch jiñi guerra tac ili ora woliʼ tsʼʌctesan profecía tac am bʌ ti Biblia.
Jiñi guerra muʼ bʌ caj i jisan jiñi guerra tac
Jiñi Biblia miʼ wʌn al chaʼan mi caj i jilel jiñi guerra tac, pero mach jiñic jiñi lac piʼʌlob mi caj i jisañob, jiñʌch jiñi Armagedón, «jiñi guerra chaʼan bʌ jiñi ñuc bʌ i qʼuiñilel Dios, jiñi Mach bʌ añic i pʼisol i pʼʌtʌlel» (Apocalipsis 16:14, 16). Cheʼ bʌ miʼ ñumel ili guerra, Dios mi caj i tsʼʌctesan i tʼan i mi caj i yʌcʼ ñʌchʼtʌlel tiʼ pejtelel ora (Salmo 37:10, 11, 29).
Chaʼan maʼ ñumen cʌn jiñi i guerra Dios muʼ bʌ caj i jisan jiñi guerra tac, pejcan jiñi tema «¿Chuquiyes jiñi Armagedón?».
a ACLED Conflict Index: «Ranking violent conflict levels across the world» (Tsaʼ wen qʼuejli baqui ñumen an guerra yicʼot jontolil tiʼ petol pañimil), enero de 2024.