¿Mulil ba cheʼ mi lac jap jiñi lembal?
I jacʼbal muʼ bʌ i yʌcʼ jiñi Biblia
Mach mulilic cheʼ pʼisbil jach mi lac jap jiñi lembal. Jiñi Biblia miʼ yʌl chaʼan jiñi vino jumpʼejlʌch majtañʌl tilem bʌ ti Dios muʼ bʌ i tijicñesan lac pusicʼal (Salmo 104:14, 15; Eclesiastés 3:13; 9:7). Jiñi Tsʼijbujel miʼ yʌl chaʼan jiñi vino añʌch i wenlel i miʼ mejlel i coltañonla (1 Timoteo 5:23).
Jesús tsiʼ japʌ vino cheʼ bʌ tsajñi wʌʼ ti lum (Mateo 26:29; Lucas 7:34). Jumpʼejl milagro tsaʼ bʌ i mele jiñʌch cheʼ tiʼ sujtesa jiñi jaʼ ti vino ti jumpʼejl ñujpuñel (Juan 2:1-10).
Jiñi wocol muʼ bʌ lac taj cheʼ mi laj cʌlʌx jap lembal
Anquese jiñi Biblia miʼ yʌl chaʼan jiñi vino añʌch i wenlel, cheʼ jaʼel miʼ yʌl chaʼan mach weñic cheʼ mi laj cʌlʌx jap yicʼot mi lac yʌqʼuesan lac bʌ. Jin chaʼan, mi juntiquil xñoptʼan miʼ ñaʼtan chaʼan mucʼʌch caj i jap lembal pʼisbil jach yom miʼ jap (1 Timoteo 3:8; Tito 2:2, 3). Jiñi Biblia miʼ yʌl chucoch mach yom mi lac ñumel ti pʼis:
Miʼ sʌt lac pensar (Proverbios 23:29-35). Juntiquil yʌc bʌ maʼañix miʼ mejlel i tsʼʌctesan jiñi mandar muʼ bʌ i yʌl jiñi Biblia chaʼan yom mi la cʌcʼ lac bʌcʼtal «bajcheʼ cuxul bʌ majtañʌl, chʼujul bʌ yicʼot muʼ bʌ i mulan Dios, cheʼ bajcheʼ jiñi mi caj laʼ cʼʌn pejtelel laʼ ñaʼtʌbal chaʼan mi laʼ melben jiñi chʼujul bʌ i yeʼtel» (Romanos 12:1).
Maʼañix mi lac ñaʼtan chuqui mi lac mel i chuqui jachix mi lac tech la cʌl. Cheʼ jaʼel maʼañix mi caj lac mel chuqui toj bʌ (Oseas 4:11; Efesios 5:18).
Miʼ yotsañonla ti pobre i mi lac mejlel ti cʼamʼan (Proverbios 23:21, 31, 32).
Dios mach weñic miʼ qʼuel cheʼ an majqui miʼ yʌqʼuesan i bʌ o muqʼuix i ñumel ti pʼis (Proverbios 23:20; Gálatas 5:19-21).
¿Bajcheʼ mi lac ñaʼtan mi tsaʼix ñumiyonla ti pʼis?
Juntiquil tsaʼix bʌ ñumi ti pʼis ti japol lembal miʼ mejlel i taj wocol i miʼ yʌcʼ chaʼan jiñi yambʌlob miʼ tajob wocol. Jiñi Biblia mach jin jach miʼ yʌl chaʼan juntiquil lac piʼʌl yʌc cheʼ bʌ miʼ junyaj sʌt i pensar, yaʼ ochem jaʼel cheʼ bʌ juntiquil jʌmʌcñayix pañimil miʼ yubin, tacamechel miʼ chaʼlen xʌmbal, miʼ cajel ti aʼleya yicʼot mach tojix miʼ loqʼuel i tʼan (Job 12:25; Salmo 107:27; Proverbios 23:29, 30, 33). Anquese maʼañic miʼ junyajl yʌqʼuesan i bʌ miʼ mejlel i taj wocol mi cʌlʌx miʼ jap (Lucas 21:34, 35).
Jalaqui mach yomic mi lac wis jap lembal
Jiñi Biblia miʼ yʌl chaʼan mach yomic mi lac wis jap lembal cheʼ bʌ:
Miʼ yʌcʼ ti yajlel yambʌlob (Romanos 14:21).
Mi yaʼ ti país an jumpʼejl ley chaʼan mach yomic miʼ jajpel lembal (Romanos 13:1).
Mi mach mejl a ticʼ a bʌ cheʼ bʌ maʼ jap lembal. Jiñi añoʼ bʌ i wocol chaʼan miʼ ticʼob i bʌ yomʌch miʼ ñaʼtañob chaʼan machʌch yomic miʼ junyajl japob (Mateo 5:29, 30).