Cʼay tac muʼ bʌ i lʌcʼtesañonla ti Dios

Jiñi música jiñʌch wen utsʼatax bʌ majtañʌl tilem bʌ ti Jehová. Miʼ mejlel i coltañonla chaʼan wen jach chuqui mi lac ñaʼtan, chaʼan tijicñayonla i miʼ ñijcan lac pusicʼal. Cheʼʌch mi la cubin lac bʌ cheʼ mi lac ñʌchʼtan jiñi laj cʼay tac muʼ bʌ i loqʼuel ti JW Broadcasting®. Cheʼ jaʼel, miʼ ñumen lʌcʼtesañonla ti Jehová.

Cʼʌlʌl cheʼ ti 2014, an mejli ñumen ti 70 cʼay tac i an jumpʼejl cʼay muʼ bʌ mejlel lac ñʌchʼtan ñumen ti 500 tʼan tac. Tajol maʼ cʼajtiben a bʌ: ¿Bajcheʼ miʼ mejlel jiñi cʼay tac i majqui miʼ mel?

Jiñi eʼtel mach bʌ añic miʼ qʼuejlel

Tiʼ coltaya jiñi Comité chaʼan cʌntesa chaʼan jiñi Junmojt muʼ bʌ i pʌsob bij, jiñi Equipo de Música chaʼan jiñi Servicio chaʼan Audio yicʼot video jiñʌch an tiʼ wenta miʼ qʼuel jiñi cʼay tac, bajcheʼ muʼ bʌ i loqʼuel ti JW Broadcasting yicʼot yan tac bʌ. Ti jiñi Equipo de Música an 13 hermanojob yicʼot hermanajob. Muʼ bʌ i chajpañob jiñi eʼtel miʼ qʼuelob muʼ bʌ caj i cʼʌjñel yicʼot yan tac bʌ eʼtel. Cheʼ jaʼel, jiñi Comité chaʼan cʌntesa an i yʌlʌ chaʼan miʼ cʼʌjñel hermanojob tiʼ petol pañimil chaʼan miʼ chaʼleñob coltaya. An muʼ bʌ i tsʼijbuñob jiñi cʼay tac, muʼ bʌ i ñijcañob música yicʼot xcʼayob. Ili hermanojob miʼ cʼʌñob chuqui yujilob i maʼañic miʼ sʌclañob i ñuclel.

¿Bajcheʼ miʼ mejlel ili cʼay tac? Ñaxam bʌ, jiñi Comité chaʼan cʌntesa miʼ qʼuel ti baqui tac bʌ texto mi caj i loqʼuel ili cʼay tac yicʼot chuqui jiñi yom bʌ i yʌqʼueñonla la cubin. Ti wiʼil, jiñi Equipo de Música miʼ qʼuel majqui mi caj i mel yicʼot majqui mi caj i tsʼijbun jiñi letra. Cheʼ jiñi, miʼ chaʼlentel ti grabar i jiñi Comité chaʼan cʌntesa miʼ ñʌchʼtan i miʼ yʌl baqui yomto miʼ ñumen weñʼesʌntel. Ti wiʼil, jiñi Equipo de Música miʼ tojʼesañob i cheʼ jiñi miʼ chaʼ chaʼleñob ti grabar. Jiñi cʼay tac mach junsujmic jach baqui miʼ chaʼlentel ti grabar. Jumpʼejl ejemplo, tajol ti sucursal o ti yambʌ otot tac.

Chaʼan miʼ melob yicʼot chaʼan miʼ chaʼleñob ti grabar jiñi cʼay tac, jiñi hermanojob miʼ cʼʌñob cabʌl eʼtijibʌl tac yicʼot programa tac chaʼan computadora. Cheʼ jaʼel, miʼ cʼʌjñel mezcladoras de sonido, amplificadores, altavoces yicʼot micrófono tac. Jujumpʼejl micrófono miʼ tojtʌl ti 100 o 1000 dólares o ñumento. Cheʼ ti 2020 tsaʼ cʼʌjñi 116 mil dólares chaʼan jiñi equipo de grabación.

¿Chuqui miʼ mejlel chaʼan maʼañic miʼ wen cʼʌjñel taqʼuin? Miʼ cʼajtibentel i coltayajob jiñi yambʌ hermanojob mach bʌ yaʼic añob ti Betel. Cheʼ jaʼel, mach cʼʌñʌlix miʼ tempañob i bʌ jiñi hermanojob chaʼan miʼ chaʼleñob ti grabar jiñi música come muqʼuix i mejlel ti computadora.

«Añʌch i wen coltayon»

Jiñi hermanojob miʼ wen mulañob i ñʌchʼtan jiñi cʼay tac. Tara, chʼoyol bʌ ti Alemania, miʼ yʌl: «Cheʼ bʌ wen mucʼon ti pensar, jiñi cʼay tac miʼ yʌqʼueñon c ñʌchʼtʌlel. Cheʼ bʌ mic ñʌchʼtan tic tʼan, lajal bajcheʼ Jehová woli i mecʼon mi cubin». Dmitri, chumul bʌ ti Kazajistán, miʼ yʌl: «Mic wen mulan c ñʌchʼtan jiñi cʼay tac, come pejtelel muʼ bʌ i yʌl loqʼuemʌch ti Biblia. Ili cʼay tac an i coltayon chaʼan jiñʌch mic ñaʼtan i chaʼan tac bʌ Dios».

Delia, chʼoyol bʌ ti Sudáfrica, miʼ subeñonla bajcheʼ yubil miʼ yubin i bʌ cheʼ miʼ ñʌchʼtan ili cʼay tac: «Añʌch i wen coltayon. Cheʼ bʌ chʼijyem mi cubin o cheʼ an c wocol añʌch jumpʼejl cʼay muʼ bʌ i wen coltañon. Cheʼ mic ñʌchʼtan jiñi música mic chaʼ taj c tijicñʌyel».

Cabʌlob muʼ bʌ i mulañob ili cʼay tac. Lerato, chʼoyol bʌ ti Sudáfrica, miʼ yʌl: «Ili cʼay tac Lʌcʼʌlix jiñi paraíso yicʼot I sujm bʌ laj cuxtʌlel miʼ yʌqʼueñon c ñaʼtan chaʼan mi caj c chaʼ qʼuel jiñi c mamá. Jiñʌch jaysujtel mic ñʌchʼtan, mij qʼuel chaʼan woli ti ajñel tilel baʼañon i miʼ mecʼon».

An jumpʼejl cʼay tsaʼ bʌ i wen colta juntiquil xchʼoc ti Sri Lanka, miʼ yʌl: «Jiñi c maestra tiʼ subeyon mach tac bʌ weñic come i testigojon Jehová. Tsaʼ c bʌcʼña i maʼañic tsaʼ c ñaʼta chuqui mic suben. Cheʼ bʌ tsaʼ cʼotiyon ti cotot, jiñi c mamá tiʼ subeyon c ñʌchʼtan jiñi cʼay Fuerte tú serás. Ili cʼay tsiʼ coltayon c ñaʼtan chaʼan yomʌch mic chajpan c bʌ chaʼan miʼ mejlel cʌqʼuen i jacʼbal. Tiʼ yijcʼʌlel, tsaʼ c pejca jiñi c maestra. Tsaʼʌch i ñʌchʼtayon i tsiʼ chʼʌmbe i sujm chaʼan jiñi muʼ bʌ c ñop. Mi cʌqʼuen wocolix i yʌlʌ jiñi i yorganización Jehová chaʼan jiñi cʼay tac muʼ bʌ i wen coltañonla».

¿Baqui miʼ tajtʌl jiñi taqʼuin chaʼan miʼ mejlel pejtelel ili cʼay tac? Yaʼʌch miʼ tajtʌl ti jiñi donación muʼ bʌ laʼ mel yaʼ ti donate.jw.org. Wocolix laʼ wʌlʌ chaʼan laʼ coltaya.