¿I sujmʌch ba cheʼ jiñi i testigojob Jehová miʼ tʼoxob jiñi familia tac o miʼ coltañob chaʼan temel miʼ yajñelob?

Jiñi i testigojonbʌlon Jehová mi lon c chaʼlen wersa chaʼan temel miʼ yajñel jiñi lon c familia yicʼot i chaʼan jiñi lon c piʼʌlob ti chumtʌl. Mi lon j qʼuel ti ñuc bajcheʼ yilal an jiñi familia come Dios jiñʌch tsaʼ bʌ i waʼchoco (Génesis 2:21-24; Efesios 3:14, 15). Yaʼ ti Biblia tsiʼ yʌcʼʌ ti tsʼijbuntel principio tac muʼ bʌ i coltan pejtelel lac piʼʌlob chaʼan tijicñayob tiʼ ñujpuñel yicʼot chaʼan temelob.

¿Chuqui miʼ melob jiñi i testigojob Jehová chaʼan wen miʼ yajñelob jiñi i familia?

Junchajp mi lon c chaʼlen wersa chaʼan mi lon c chumtan ti lon j cuxtʌlel jiñi ticʼojel tac muʼ bʌ i yʌl jiñi Biblia chaʼan jiñi wiñic wen miʼ qʼuel jiñi i yijñam yicʼot chaʼan wem bʌ tatʌl (Proverbios 31:10-31; Efesios 5:22-6:4; 1 Timoteo 5:8). Cheʼ jaʼel, jiñi Biblia miʼ coltan jiñi familia chaʼan wen miʼ yajñelob anquese mach junlajalobic i ñopbal (1 Pedro 3:1, 2). Jumpʼejl ejemplo, mi caj laj qʼuel chuqui an i yʌlʌyob jiñi tsaʼ bʌ sujtiyob i piʼʌl ti testigo:

• «Jiñi ñaxam bʌ 6 jab lon c ñujpuñel mi lon c wen chaʼlen leto. Pero cheʼ bʌ Ivete tsaʼ sujti ti testigo, muqʼuix i pʌs i pijt yicʼot maʼañix miʼ wen michʼan. I jiñi tsiʼ colta chaʼan jiñi lon c ñujpuñel maʼañic miʼ jejmel» (Clauir, chʼoyol bʌ ti Brasil).

• «Cheʼ bʌ jiñi c ñoxiʼal, Chansa, tsaʼ caji ti estudio yicʼot jiñi i testigojob Jehová, tsaʼ wen michʼayon come an cubi chaʼan miʼ jemob jiñi familia. Pero tsaʼ caji j qʼuel chaʼan jiñi Biblia woliyʌch i coltan jiñi lon c ñujpuñel (Agness, chʼoyol bʌ ti Zambia).

Jiñi eʼtel muʼ bʌ lon c mel chaʼan subtʼan mi lon c pʌsben jiñi quixtañujob bajcheʼqui jiñi Biblia miʼ coltañonla ti ili muʼ bʌ caj la cʌl:

• Chaʼan miʼ tajob majqui wem bʌ miʼ ñujpuñel yicʼotob

• Chaʼan miʼ mejlel i ñusañob jiñi wocol muʼ bʌ i tajob ti jiñi ñaxam bʌ jab i ñujpuñelob

• Chaʼan wen miʼ yajñelob yicʼot i suegrojob

• Chaʼan wen miʼ cʼʌñob jiñi taqʼuin

• Chaʼan maʼañic miʼ wen michʼañob

• Chaʼan miʼ cʌn i ñusʌbeñob i bʌ i mul

• Chaʼan wen jach miʼ ticʼob i yalobilob

¿Muʼ ba i yʌcʼ wocol cheʼ bʌ juntiquil ñoxiʼalʌl o juntiquil ijñamʌl miʼ qʼuextan i ñopbal?

An i tajol mucʼʌch. Jumpʼejl informe tsaʼ bʌ loqʼui ti 1998 tsiʼ pʌsʌ chaʼan ti 20 xñujpuñel an jumpʼejl baqui jiñi ijñamʌl o jiñi ñoxiʼalʌl tsaʼ sujti tiʼ testigo pero tsiʼ taja cabʌl wocol.

Jesús tsiʼ wʌn alʌ chaʼan jiñi xcʌntʼañob i chaʼan mi caj i ñusañob wocol tiʼ familiajob (Mateo 10:32-36). Jiñi historiador Will Durant tsiʼ yʌlʌ chaʼan tiʼ yorajlel jiñi Imperio romano jiñi ñopbalʌl muʼ bʌ i tsajcañob Cristo tsaʼ ajli chaʼan miʼ jem jiñi familia.a Ili ora cheʼ miʼ yʌjlel tiʼ tojlel jaʼel jiñi testigojob. Pero ¿tiʼ sujm ba chaʼan jiñʌch muʼ bʌ i techob jiñi wocol?

Cheʼ bʌ jiñi testigojob tsaʼ jopʼbentiyob i mul chaʼan miʼ tʼoxob jiñi familia, jiñi Tribunal Europeo de Derechos Humanos tsiʼ yʌlʌ chaʼan jiñi familiajob mach bʌ Testigojobic jiñʌch muʼ bʌ i ñumen techob wocol come mach yomobic i qʼuel chaʼan juntiquil tiʼ familia tsiʼ qʼuexta i ñopbal. Jiñi Tribunal tsiʼ chaʼ alʌ: «Añʌch familiajob cheʼ bʌ miʼ ñusañob jaʼel bajcheʼ iliyi tiʼ caj mach lajalobic i ñopbal, i mach jiñobic jach jiñi i testigojob Jehová».b Mach weñic miʼ qʼuejlel cheʼ bʌ juntiquil miʼ qʼuextan i ñopbal, pero jiñi testigojob miʼ chaʼleñob wersa chaʼan miʼ jacʼob ili ticʼojel: «Mach yomic mi laʼ qʼuextan chuqui mach bʌ weñic mi laʼ melbentel. [...] Mi mucʼʌch i mejlel, yaʼ baqui chilil ti laʼ tojlel, ajñenla ti ñʌchʼtʌlel laʼ wicʼot yambʌlob» (Romanos 12:17, 18).

¿Chucoch jiñi testigojob miʼ ñopob chaʼan cojach yom miʼ ñujpuñel yicʼotob yambʌ Testigo?

Jiñi i Testigojonbʌlon Jehová mi lon jacʼ jiñi mandar chaʼan cojach yom mi lon c ñujpuñel «ti lac Yum», ili yom i yʌl, chaʼan cojach yom mi lon c ñujpuñel lon quicʼot lajal bʌ lon c ñopbal (1 Corintios 7:39). Ili i mandar Dios mucʼʌch i coltan jiñi Testigojob. Jumpʼejl ejemplo, jiñi revista Journal of Marriage and Family tsaʼ bʌ loqʼui ti 2010 tsiʼ yʌlʌ chaʼan «jiñi xñujpuñelob lajaloʼ bʌ i ñopbal yicʼot lajal bʌ chuqui miʼ melob» lʌcʼʌ tiʼ pejtelel ora wen añob.c

Jiñi i testigojob Jehová maʼañic miʼ subeñob juntiquil chaʼan yom miʼ cʌy i yijñam o i ñoxiʼal mi mach Testigojic. Jiñi Biblia miʼ yʌl: «Mi juntiquil hermano mach xñoptʼañic i yijñam i mi jiñi i yijñam bej yomʌch ajñel yicʼot, mach yomic miʼ cʌy. Mi juntiquil xʼixic mach xñoptʼañic i ñoxiʼal i mi jiñi i ñoxiʼal bej yomʌch ajñel yicʼot, mach yomic miʼ cʌy» (1 Corintios 7:12, 13). Jiñi i testigojob Jehová miʼ jacʼob ili mandar.