Cʌntesʌntel 5
Jini yamigojob Dios mi caj i chumtʌlob ti Paraíso
Jini Paraíso mach cheʼic miʼ cajel bajcheʼ ili pañimil ti wʌle. Dios maʼanic baʼ ora tsiʼ mulaj cheʼ butʼul ti cabʌl wocol ili pañimil, yicʼot ti yubintel i cʼuxel wocol. Ti talto bʌ qʼuin, Dios mi caj i sujtesan ili Lum ti jumpʼejl i tʼojol jax bʌ ajñibʌl. ¿Bajcheʼ yilal miʼ cajel? Laʼ laj qʼuel chuqui mi yʌl jini Biblia.
Winicob xʼixicob weñoʼ bʌ. Jini Paraíso yaʼʌch baqui mi caj i chumtʌlob jini i yamigojoʼ bʌ Dios. Iliyobi mi caj i melob chuqui tac wen tiʼ tojlel yañoʼ bʌ, i mi caj i chumtʌlob cheʼ bajcheʼ yom Jehová (Proverbios 2:21).
Wen yonlel bʌlñʌcʼʌl. Ti jini Paraíso, maʼanix majqui mi cajel i yubin wiʼñal. Jini Biblia mi yʌl: «Mi caj i yʌcʼ cabʌl i cuch jini cholel [o bʌlñʌcʼʌl] ila ti lum» (Salmo 72:16).
Wen tac bʌ otot yicʼot eʼtel muʼ bʌ i tijicñesan lac pusicʼal. Yaʼ ti i tʼojol jax bʌ ajñibʌl, ti pejtelel jini xchumtʌlob mi caj i tajoʼ jujumpʼejl i yotot, yicʼot mi caj i tajoʼ i yeʼtel muʼ bʌ i yʌqʼueñob i tijicñʌyel (Isaías 65:21-23).
I ñʌchʼtʌlel pañimil. Maʼanix majqui mi caj i majlel ti guerra i maʼanic majqui miʼ caj ti chʌmel mi juntiquilic chaʼan guerra. Jini i Tʼan Dios miʼ yʌl: «[Dios] miʼ yujtesan guerra» (Salmo 46:8, 9).
Wem bʌ laj cʼocʼlel. Jini Biblia miʼ wʌn al chaʼan: «Mi juntiquilic [yaʼ ti Paraíso] mi caj i yʌl: Cʼamon cheʼen» (Isaías 33:24). Yicʼot jaʼel maʼanix majqui chʌn qʼuichqʼuichña i yoc, xpotsʼ, xcojcob mi jinicto jini xʼumaʼ (Isaías 35:5, 6).
Maʼanix miʼ chʌn cajel chʼijiyemlel mi cʼuxyaj tac bʌ mi chʌmel. Jini Tʼan Dios miʼ yʌl: «Maʼanix majch miʼ caj ti chʌmel. Maʼanix ucʼtaya mi uqʼuel mi wocol ti pejtelel ora. Come tsaʼix ñumi jini ñaxan tac bʌ, cheʼen» (Apocalipsis 21:4).
Maʼanix mi chʌn cajel jontoloʼ bʌ. Jehová miʼ wʌn al: «Mach cheʼic jini xmulilob. Mi caj i chojquelob loqʼuel tiʼ lumal. Mi caj i jilelob xñusa tʼañob» (Proverbios 2:22).
Jini winicob xʼixicob mi caj i cʼuxbiñob i bʌ i mi caj i chʼʌmob i bʌ ti ñuc. Maʼanix mi chʌn cajel leco bʌ meloñel mi ticʼlʌntel mi jinic i mulʌntel chubʌʼañʌl mi tsʼaʼleya. Winicob xʼixicob muchʼul mi caj i yajñelob i mi caj i chumtʌlob cheʼ bajcheʼ yom Dios (Isaías 26:9).