Cʌntesʌntel 6
Juntiquil uts bʌ i yalobil, yicʼot juntiquil jontol bʌ
QʼUELE wʌle jini Caín yicʼot Abel. Tsaʼix i tajayob i colel. Caín jiñʌch xʼeʼtel ti lum. Miʼ pʌcʼ ti chajp ti chajp chuqui tac cʼuxbil.
Abel miʼ cosan tiñʌmeʼ tac. Miʼ mulan i cʌntan alʌ tiñʌmeʼ tac. Ili wen ñuc tac miʼ colel, mach jalic jini Abel miʼ yonʼan i tiñʌmeʼ tac chaʼan miʼ cʌntan.
Jumpʼejl bʌ qʼuin Caín yicʼot Abel tsiʼ chʼʌmbeyob majlel i majtan Dios. Caín tsiʼ chʼʌmbe majlel bʌlñʌcʼʌl muʼ bʌ i pʌcʼ. Jini Abel tsiʼ chʼʌmbe majlel jini ñumen wem bʌ tiñʌmeʼ tac an i chaʼan. Jioba tsiʼ qʼuele ti wen jini Abel yicʼot i majtan. Pero mach wenic tsiʼ qʼuele Caín yicʼot i majtan. ¿Awujil ba chucoch?
Mach chaʼanic ñumen wen i majtan jini Abel cheʼ bajcheʼ i chaʼan Caín. Chaʼañʌch uts i pusicʼal jini Abel. Miʼ cʼuxbin Jioba yicʼot miʼ cʼuxbin i yʌscun. Pero Caín jontol i pusicʼal; maʼanic miʼ cʼuxbin i yijtsʼin.
Jini chaʼan Dios miʼ suben Caín chaʼan yom miʼ qʼuextan i melbal. Pero Caín maʼanic miʼ jacʼben. Wen michʼ i pusicʼal come Dios ñumen utsʼat tsiʼ qʼuele Abel. Caín tsiʼ sube Abel: ‹Conla ti jamil›. Yaʼi, cheʼ i bajñelob jach, Caín tsiʼ jatsʼʌ i yijtsʼin. Wen tsʌts tsiʼ jatsʼʌ i tsaʼ chʌmi. ¿Mach ba bʌbʌqʼuenic maʼ qʼuel jini tsaʼ bʌ i mele Caín?
Anquese tsaʼ chʌmi Abel, Dios cʼajalto i chaʼan. Abel uts i pusicʼal, Jioba maʼanic baʼ ora miʼ ñajʌyel i chaʼan cheʼoʼ bʌ bajcheʼ jini. Jini chaʼan jumpʼejl bʌ qʼuin Jioba Dios mi caj i chaʼ aqʼuen i cuxtʌlel Abel. Ti jim bʌ ora Abel maʼanic ba ora mi caj i chʌn chʌmel. Mi caj i mejlel ti chumtʌl ti pejtelel ora ila ti Pañimil. ¿Mach ba utsʼatic cheʼ mi caj laj cʌn cheʼoʼ bʌ bajcheʼ jini?
Pero Dios mach utsʼatic mi qʼuel cheʼoʼ bʌ bajcheʼ Caín. Jini chaʼan, cheʼ bʌ Caín tsaʼix i tsʌnsa i yijtsʼin, Dios tsiʼ choco majlel ti ñajt bʌ lum yaʼ baqui añob i familia chaʼan tiʼ caj i mul. Cheʼ bʌ Caín tsaʼ majli ti chumtʌl ti yambʌ parte, tsiʼ pʌyʌ majlel juntiquil i yijtiʼan, i tsiʼ pʌyʌ ti yijñam.
Ti jim bʌ ora, Caín yicʼot i yijñam tsaʼ cajiyob ti pʼojlel. Yambʌ chʼitoñob yicʼot xchʼocoʼ bʌ i yalobilob jini Adán yicʼot Eva tsaʼ ñujpuñiyob jaʼel yicʼot tsaʼ pʼojliyob. Mach jalic tsaʼ wen pʼojliyob winicob xʼixicob ila ti Pañimil. Laʼ laj cʌn lamitalob.
Génesis 4:2-26; 1 Juan 3:11, 12; Juan 11:25.