Cʌntesʌntel 42
Juncojt burro miʼ chaʼlen tʼan
¿AM BA ubibil a chaʼan junyajl cheʼ miʼ chaʼlen tʼan juncojt burro? ‹Maʼanic›, cheʼet. ‹Jini añimal tac mach yujilobic tʼan.› Pero jini Biblia mi yʌl chaʼan juncojt burro tsiʼ chaʼle tʼan. Laʼ laj qʼuel bajcheʼ tsaʼ ujti.
Jini israelob lʌcʼʌlix chaʼan mi caj i yochelob yaʼ tiʼ lumal Canaán. Balac, jini rey bʌ ti Moab, miʼ bʌcʼñan jini israelob. Jini chaʼan, tsiʼ choco ti pʌyol juntiquil winic wen chʼejl bʌ i cʼabaʼ Balaam chaʼan miʼ tilel i pʼaj jini israelob. Tsiʼ sube chaʼan mi yʌqʼuen cabʌl taqʼuin, jini chaʼan Balaam tsaʼ cʼʌchle tiʼ burro i tsaʼ majli baʼan Balac.
Jioba mach yomic chaʼan jini Balaam miʼ pʼajben I tejclum. Jini chaʼan, tsiʼ choco majlel juntiquil ángel chucbil bʌ i chaʼan juntsʼijt espada chaʼan miʼ waʼtʌl yaʼ ti bij i miʼ waʼchocon Balaam. Balaam maʼanic miʼ taj i qʼuel jini ángel, pero jini burro mucʼʌch i qʼuel. Jini burro miʼ ñop i ñajtʼesan i bʌ yaʼ baqui an jini ángel, cheʼ jini tsiʼ pʌcchoco i bʌ yaʼ ti bij. Balaam tsaʼ wen michʼa, i tsaʼ caji i jatsʼ jini burro yicʼot juntsʼijt teʼ.
Cheʼ jini, Jioba tsiʼ yʌqʼue i yubin Balaam i tʼan jini burro. ‹¿Chuqui tsac tumbeyet chaʼan maʼ jatsʼon?›, cheʼ tsiʼ cʼajtibe jini burro.
‹Tsaʼ meleyon cheʼ bajcheʼ juntiquil tonto›, cheʼen Balaam. ‹¡Anic quicʼot juntsʼijt espada, mic tsʌnsañet!›
‹¿Anix ba c melbeyet ti ñaxan bajcheʼ iliyi?›, cheʼ tsiʼ cʼajti jini burro.
‹Maʼanic›, cheʼ tsiʼ jacʼʌ Balaam.
Cheʼ jini, Jioba tsiʼ yʌqʼue i qʼuel Balaam jini ángel yaʼ bʌ waʼal ti bij yicʼot juntsʼijt espada. Jini ángel tsiʼ yʌlʌ: ‹¿Chucoch tsaʼ jatsʼʌ a burro? Tsaʼ tili c mʌctañet ti a bijlel, come mach yomic miʼ majlel a pʼaj jini Israel. Machic tsiʼ tʌtsʼʌyet jini a burro baʼ añon, joñon tsac tsʌnsayet, pero maʼanic chuqui mic tumben a burro›.
Balaam tsiʼ yʌlʌ: ‹Tsaʼix c taja c mul. Maʼanic tsac ñaʼta mi wʌʼ añet ti bij›. Jini ángel tsiʼ yʌcʼʌ ti majlel jini Balaam, Balaam tsaʼ majli baʼan Balac. Tsaʼ to i ñopo i pʼaj jini Israel, pero Jioba tsiʼ mele chaʼan Balaam mi yʌqʼuen i yutslel i tʼan jini Israel ti uxyajl.
Números 21:21-35; 22:1-40; 23:1-30; 24:1-25.