Cʌntesʌntel 48
Jini wen yujiloʼ bʌ gabaoñob
JINI lamital tejclum tac ti Canaán tsaʼ caji i chajpañob i bʌ chaʼan miʼ contrajiñob Israel. Mi ñaʼtañob chaʼan mi caj i mʌjlelob i chaʼan. Pero jini chumuloʼ bʌ yaʼ ti Gabaón mach cheʼic tsiʼ ñaʼtayob. Tsiʼ ñopoyob chaʼan Dios woli i coltan jini israelob, yicʼot mach yomobic i contrajiñob Dios. Jini chaʼan, ¿awujil ba chuqui tsiʼ meleyob jini gabaoñob?
Tsiʼ poj meleyob i bʌ chaʼan chʼoyolob ti ñajt bʌ lum. Jini chaʼan lamital tsiʼ xojoyob ñoxix bʌ i pislelob yicʼot tsiʼ lʌpʌyob ñoxix bʌ i warach. Tsiʼ chʼʌmʌyob majlel tiʼ burro tsucul bʌ coxtal yicʼot caxlan waj wen tiquinix bʌ yicʼot anix i cuxemal. Cheʼ jini, tsaʼ majliyob baʼan Josué, i tsiʼ subeyob: ‹Tilemon lojon ti ñajt bʌ lum, come tsaʼ cubi lojon wen ñuc laʼ Yum Dios, Jioba. Tsaʼ cubi lojon pejtel chuqui tsiʼ mele ti Egipto ti laʼ tojlel. Jini añoʼ bʌ i yeʼtel tsiʼ subeyon lojon chaʼan mic chʼʌm lojon majlel i bʌl lojon c ñʌcʼ ti ili ñajt bʌ xʌmbal yicʼot chaʼan miʼ tilel c subeñetla: «Joñon lojon a winicon lojon. Aqʼueñon lojon laʼ tʼan chaʼan maʼanic mi laʼ contrajiñon lojon». Qʼuelela ñoxix jini c pislel lojon chaʼan ñajt tsaʼ tiliyon lojon, tiquinix jini j caxlan waj lojon yicʼot cuxix›.
Josué yicʼot jini yañoʼ bʌ añoʼ bʌ i yeʼtel tsiʼ ñopbeyob jini gabaoñob. Jini chaʼan tsiʼ yʌcʼʌyob i tʼan chaʼan maʼanic mi caj i contrajiñob. Cheʼ ñumenix uxpʼejl qʼuin tsiʼ yubiyob chaʼan jini gabaoñob yaʼ jach chʼoyolob ti lʌcʼʌl.
‹¿Chucoch tsaʼ laʼ subeyon lojon chaʼan ñajt baʼ chʼoyoletla?›, cheʼ tsiʼ yʌlʌ Josué.
Jini gabaoñob tsiʼ jacʼʌyob: ‹Come tsaʼ cubi lojon chaʼan laʼ Yum Dios Jioba tsiʼ wʌn alʌ chaʼan mi caj i yʌqʼueñetla pejtelel i lumal Canaán. Jini chaʼan, tsac bʌcʼñayet lojon chaʼan mi laʼ tsʌnsañon lojon›. Pero jini israelob tsiʼ tsʼʌctesayob jini i tʼan tsaʼ bʌ i waʼchocoyob, maʼanic tsiʼ tsʌnsayob jini gabaoñob. Tsiʼ yotsayob tiʼ yaj eʼtelob.
Jini rey ti Jerusalén tsaʼ wen michʼa come jini gabaoñob tsiʼ lajayob i tʼan yicʼot jini Israel. Jini chaʼan tsiʼ sube jini yambʌ chʌntiquil reyob: ‹Yom mi laʼ tilel laʼ coltañon chaʼan mi laj contrajiñob jini añoʼ bʌ ti Gabaón›. Jiñʌch tsaʼ bʌ i meleyob ti joʼticlelob. ¿Tsaʼ ba i pʌsʌyob i ñaʼtʌbal jini gabaoñob cheʼ tsiʼ lajayob i tʼan yicʼot Israel, cheʼ bʌ tsaʼ tili ili reyob chaʼan miʼ contrajiñob? Laʼ laj cʌn.
Josué 9:1-27; 10:1-5.