Laʼ laj qʼuel ti ñuc cheʼ miʼ weñʼesañonla Jehová

1. ¿Chucoch jiñʌch ñumen wem bʌ xmel pʼejt Jehová?

CHEʼ ti noviembre ti jabil 2010, yaʼ ti Inglaterra tsaʼ chojñi jumpʼejl alʌ ucʼum melbil bʌ ti China i tsaʼ mʌjñi ti 70 millón ti dólar. Wen utsʼatax cheʼ mi laj qʼuel bajcheʼ juntiquil xmel ucʼum o xmel pʼejt mi cʼʌn ocʼol chaʼan miʼ sujtesan ti wen cʼoʼtajax bʌ yicʼot letsem bʌ i tojol. Jehová lajalʌch bajcheʼ juntiquil xmel pʼejt. Pero jiñʌch jiñi ñumen wem bʌ, jiñi ñumen yujil bʌ bajcheʼ yambʌ quixtañu wʌʼ ti pañimil (mulawil). Jiñi Biblia miʼ yʌl chaʼan Jehová tsiʼ mele Adán «ti tsʼubejn», yom i yʌl, ti ocʼol tsiʼ mele (Génesis 2:7). Jiñi wiñic jiñʌch «i yalobil Dios» yicʼot miʼ mejlel i lajiben i melbal Jehová (Lucas 3:38).

2, 3. ¿Bajcheʼ miʼ mejlel lac lajin jiñi israelob tsaʼ bʌ i chaʼ cʌyʌyob i mul?

² Adán mach chʌn i yalobilix Dios cheʼ tsiʼ cʌyʌ i jacʼben i tʼan jiñi tsaʼ bʌ i Mele. Pero cabʌl i pʼolbalob tsaʼ bʌ i chʌn qʼueleyob Jehová ti i Yum (Hebreos 12:1). Tsiʼ jacʼbeyob i tʼan jiñi tsaʼ bʌ i Meleyob. Tsiʼ yʌcʼʌyob i bʌ tiʼ contra Satanás yicʼot tsiʼ pʌsʌyob chaʼan yomobʌch Jehová bajcheʼ i Tat yicʼot bajcheʼ tsaʼ bʌ i Meleyob (Juan 8:44). Jiñi i xucʼtʌlelob miʼ cʼajtesʌbeñonla tsaʼ bʌ i yʌlʌyob jiñi israelob tsaʼ bʌ i chaʼ cʌyʌyob i mul: «C Yumet lojon, c Tatet lojon. Añon lojon ti a cʼʌb cheʼ bajcheʼ ocʼol tiʼ cʼʌb xmel pʼejt. Tic pejtelel lojon a melbalon lojon» (Isaías 64:8) (qʼuele jiñi recuadro «¿Chuqui yom i yʌl?»).

³ Ili ora, mi lac chaʼlen wersa lac lajin jiñi wem bʌ i melbalob ti wajali yicʼot mi lac jacʼben i tʼan jiñi tsaʼ bʌ i Meleyonla come isujm bʌ i wiñiconla. Jiñʌch ñuc bʌ lac majtan cheʼ mi la cʌl chaʼan Jehová lac Tat. La com bajcheʼ jiñʌch tsaʼ bʌ i Meleyonla. Laʼ laj cʼajtiben lac bʌ: «¿Cheʼ ba lajalonla bajcheʼ cʼun bʌ ocʼol muʼ bʌ i mejlel i cʼʌn Dios chaʼan miʼ mel utsʼatax bʌ pʼejt? ¿Lajal ba mij qʼuel jiñi hermanojob bajcheʼ ocʼol wolito bʌ i weñʼesan Jehová?». Ti ili temaj mi caj laj qʼuel uxchajp muʼ bʌ i coltañonla lac ñaʼtan bajcheʼ yom. Ñaxan, ¿bajcheʼ miʼ yajcan Jehová majqui mi caj i weñʼesan? I chaʼpʼejlel, ¿chucoch miʼ weñʼesañob? I yuxpʼejlel, ¿bajcheʼ miʼ weñʼesañob?

¿BAJCHEʼ MIʼ YAJCAN JEHOVÁ MAJQUI MI CAJ I WEÑʼESAN?

4. ¿Bajcheʼ miʼ yajcan Jehová jiñi quixtañujob? Alʌ jumpʼejl ejemplo.

⁴ Jehová mach lajalic miʼ qʼuel wiñicob xʼixicob (quixtañujob) bajcheʼ mi laj qʼuelob. Muʼ bʌ i qʼuelbeñob jiñʌch i pusicʼal yicʼot bajcheʼ yilalob tiʼ sujmlel (pejcan 1 Samuel 16:7b). Cheʼʌch tsiʼ pʌsʌ cheʼ bʌ tsiʼ waʼchoco jiñi congregación chaʼan bʌ xñoptʼañob. An cabʌlob mach bʌ añobic i cʼʌjñibal yilal tsaʼ bʌ i pʌyʌyob tiʼ tojlel yicʼot tiʼ tojlel i yalobil (Juan 6:44). Juntiquil jiñʌch Saulo, ñuc bʌ i yeʼtel (troñel) tiʼ tojlel judíojob. Chan tsiʼ qʼuele i bʌ yicʼot tsiʼ ticʼla jiñi xñoptʼañob i tsiʼ jopʼbeyob i mul (1 Timoteo 1:13). Pero Jehová tsiʼ qʼuelbe i pusicʼal i maʼañic tsiʼ yʌlʌ chaʼan maʼañic i cʼʌjñibal (Proverbios 17:3). Tsiʼ qʼuele chaʼan lajal bajcheʼ ocʼol yajcʌbil bʌ chaʼan miʼ sub jiñi wen tʼan «tiʼ tojlel gentilob yicʼot reyob yicʼot israelob» (Hechos 9:15). Jehová tsiʼ yajca yicʼot tsiʼ weñʼesa yambʌ quixtañujob bajcheʼ «ucʼum muʼ bʌ i cʼʌjñel chaʼan chuqui utsʼat» (Romanos 9:21). Ti ñaxan, an xujchʼoʼ bʌ, xyʌcʼajelob (xqʼuixñijelob) yicʼot yujiloʼ bʌ tsʼiʼlel (1 Corintios 6:9-11). Pero cheʼ bʌ tsiʼ cʌñʌyob Dios, tsaʼ pʼʌtʼayob majlel i ñopoñel (chʼujbiya) tiʼ tojlel yicʼot tsiʼ yʌcʼʌyob i bʌ ti weñʼesʌntel.

5, 6. a) Mi mucʼʌch la cʌcʼ ti ñuc chaʼan jiñʌch Jehová majqui miʼ weñʼesañonla, ¿bajcheʼ yilal miʼ cajel laj qʼuel muʼ bʌ lac subeñob jiñi wen tʼan? b) Mi mucʼʌch la cʌcʼ ti ñuc chaʼan jiñʌch Jehová majqui miʼ weñʼesañonla, ¿bajcheʼ yilal miʼ cajel laj qʼuel jiñi hermanojob ti congregación?

⁵ Mi lac ñop chaʼan Jehová miʼ mejlel i yajcan yicʼot i pʌy jiñi weñoʼ bʌ quixtañu. Jin chaʼan, mach yomic mi laj cʌl mach bʌ utsʼatic tiʼ tojlel la quermañojob yicʼot jiñi quixtañujob muʼ bʌ lac subeñob jiñi wen tʼan. Mach yomic mi lac ñaʼtan jaʼel chaʼan juntiquil quixtañu mach sujtic ti Testigo. Laʼ laj qʼuel tsaʼ bʌ ujti tiʼ tojlel Michael. Miʼ yʌl: «Cheʼ bʌ jiñi i testigojob Jehová miʼ julaʼtañoñob, mic ñupʼbeñob i tiʼ cotot yicʼot maʼañic mij cʌcʼob ti ñuc. Wen jontolon tiʼ tojlelob. Ti wiʼil, tsaʼ j cʌñʌ jumpʼejl familia yaʼ baqui tsajñiyon, i tsaʼ c wen mulaj i melbalob. Tsaʼ cʼoti c ñaʼtan chaʼan i testigojob Jehová, i toj sajtel c pusicʼal tsaʼ cubi. Tsaʼ j cʼajtibe c bʌ chucoch mach weñic bajcheʼ mij qʼuelob cheʼ wen tsaʼ i melbal jiñi familia. Ti orajach tsaʼ c ñaʼta chaʼan tiʼ caj mach wen j cʌñʌyobic yicʼot cojach tsaʼ c ñopo muʼ bʌ i yʌjlel tiʼ tojlelob». Michael tsiʼ mulaj i ñumen cʌn jiñi Testigojob, i tsiʼ jacʼʌ jumpʼejl estudio. Ti wiʼil, tsiʼ chʼʌmʌ jaʼ yicʼot tsaʼ caji ti eʼtel ti subtʼan tiʼ pejtelel ora.

⁶ Cheʼ mi lac ñop chaʼan jiñʌch Jehová majqui miʼ weñʼesañonla, ñumen utsʼat bajcheʼ mi caj laj qʼuel jiñi hermanojob ti congregación. Mi caj laj qʼuelob bajcheʼ ocʼol wolito bʌ i weñʼesʌntel ti Jehová. Cheʼʌch miʼ qʼuejlelob ti Jehová. Miʼ qʼuelbeñob bajcheʼ yilalob i pusicʼal yicʼot chaʼan mach tiʼ pejtelelic ora xmulilob mi caj i yajñel. Yicʼot yujil bajcheʼ yilal miʼ mejlelob ti sujtel (Salmo 130:3). ¿Bajcheʼ miʼ mejlel lac lajin Jehová? Laʼ laj qʼuelob ti utsʼat la quermañojob. Muʼto i mejlel laj coltañob jaʼel chaʼan miʼ bej weñʼañob majlel (1 Tesalonicenses 5:14, 15). Jiñi ancianojob ti congregación cheʼʌch yom miʼ pʌsob jaʼel (Efesios 4:8, 11-13).

¿CHUCOCH MIʼ WEÑʼESAÑONLA JEHOVÁ?

7. ¿Chucoch yom mi la cʌqʼuen wocolix i yʌlʌ Jehová chaʼan miʼ ticʼonla?

⁷ An muʼ bʌ i yʌlob chaʼan cojach mi laj qʼuel ti ñuc i ticʼojel lac tat lac ñaʼ cheʼ añix la calobilob jaʼel. Cheʼ tsaʼix lac taja laj colel, mi lac ñumen qʼuel ti ñuc jiñi ticʼojel aqʼuebil bʌ i chaʼañonla lac tat lac ñaʼ come tsiʼ pʌsʌyob chaʼan mucʼʌch i cʼuxbiñoñobla (pejcan Hebreos 12:5, 6, 11). Jehová miʼ cʼuxbiñonla come i yalobilonla. Jin chaʼan miʼ ticʼonla yicʼot miʼ tojʼesañonla. Yom chaʼan wen chuqui mi lac yajcan lac mel, chaʼan tijicñayonla yicʼot mi laj cʼuxbin bajcheʼ lac Tat (Proverbios 23:15). Mach yomic cheʼ mi lac ñusan wocol yicʼot mi lac chʌmel tiʼ caj maʼañic mi laj cʌy lac mul (Efesios 2:2, 3).

8, 9. a) ¿Bajcheʼ miʼ cʌntesañonla Jehová ili ora? b) ¿Bajcheʼ mi caj i chʌn weñʼesañonla Jehová ti talto bʌ qʼuin?

⁸ Cheʼ maxto laj cʌñʌyic Jehová, tajol an lac melbal maʼañic bʌ miʼ mulan. Pero wʌle ñumen weñix lac melbal come tsiʼ weñʼesayonla yicʼot tsiʼ coltayonla ti qʼuextʌyel (Isaías 11:6-8; Colosenses 3:9, 10). Añonla ti jumpʼejl paraíso. Ili paraíso jiñʌch woli (choncol) bʌ i mel Jehová ili ora chaʼan miʼ coltañonla ti weñʼan majlel. Ilayi tijicña mi la cubin yicʼot an ñʌchʼtʌlel, anquese chumulonla ti jontol bʌ pañimil. Jiñi hermanojob maʼañic bʌ tsiʼ qʼueleyob cʼuxbiya tiʼ familia cheʼ tsaʼ coliyob, muqʼuix i yubiñob jiñi isujm bʌ cʼuxbiya ti hermanojob (Juan 13:35). Ti lac pejtelel la cujilix i pʌsol cʼuxbiya ti yambʌlob. Pero wʌle laj cʌñʌyix jiñi lac Tat am bʌ ti panchan yicʼot mi la cubin i cʼuxbiya (Santiago 4:8).

⁹ Yaʼ ti tsijiʼ bʌ pañimil mi caj laj qʼuel tiʼ pejtelel jiñi wenlel am bʌ ti jiñi paraíso. Yicʼot tijicña mi caj lac chumtʌl cheʼ mi caj laj qʼuel wen utsʼatax miʼ sujtel ili Lum ti i Yumʌntel Dios. Jehová mi caj i chʌn weñʼesañonla ti jiñi bʌ ora yicʼot cabʌl chuqui ñuc tac bʌ mi caj i cʌntesañonla (Isaías 11:9). Dios mi caj i sujtesan ti toj jiñi lac pensar yicʼot lac bʌcʼtal. Mach chʌn wocolix mi caj la cubin chaʼan mi lac ñumen cʌn yicʼot lac jacʼben i tʼan ti tsʼʌcʌl. Jin chaʼan, laʼ laj cʌy chaʼan miʼ chʌn weñʼesañonla Jehová. Laʼ lac pʌsben chaʼan mi laj qʼuel ti ñuc cheʼ miʼ cʼuxbiñonla bajcheʼ iliyi (Proverbios 3:11, 12).

¿BAJCHEʼ MIʼ WEÑʼESAÑONLA?

10. ¿Bajcheʼ tsiʼ pʌsʌ Jesús chaʼan Jehová añʌch i yutslel yicʼot wen yujilʌch bajcheʼ miʼ weñʼesañonla?

¹⁰ Jehová wen i cʌñʌyonla, lajal bajcheʼ juntiquil xmel pʼejt wen i cʌñʌ bʌ jiñi ocʼol muʼ bʌ i cʼʌn. Yujil bajcheʼ yilalonla, baqui jaxʌl miʼ mejlel laj cuch yicʼot bajcheʼ an weñʼayonla. Tiʼ pejtelel iliyi miʼ chʼʌm ti ñuc cheʼ bʌ woli (yʌquel) i weñʼesañonla (pejcan Salmo 103:10-14). Laʼ lac ñaʼtan chuqui tsiʼ mele Jesús cheʼ bʌ jiñi xcʌntʼañob i chaʼan tsiʼ tajayob i sajtemal, chaʼan mi lac ñumen cʌn bajcheʼ miʼ qʼuelonla Jehová. An i tajol tsiʼ cajatayob majqui jiñi ñumen ñuc bʌ. ¿Bajcheʼ yilal tsaʼ laj qʼueleyob cheʼ yaʼic añonla ti jiñi bʌ ora? Tajol tsaʼ lac ñaʼta chaʼan lajalob bajcheʼ jiñi ocʼol tsʌts bʌ ti cʼʌñol. Pero Jesús tsiʼ qʼuele chaʼan mucʼʌch i mejlel i coltañob. ¿Bajcheʼ? Ti uts bʌ yicʼot wem bʌ tʼan tsiʼ yʌqʼueyob ticʼojel, yicʼot tsiʼ pʌsbeyob tiʼ melbal bajcheʼ yom miʼ pʌsob i pecʼlel (Marcos 9:33-37; 10:37, 41-45; Lucas 22:24-27). Jiñi apóstolob tsaʼ aqʼuentiyob chʼujul bʌ espíritu cheʼ bʌ Jesús chaʼ tejchemix, i maʼañix tsaʼ chʌn caji i ñaʼtañob majqui jiñi ñumen ñuc bʌ. Tsiʼ yʌcʼʌyob i pusicʼal tiʼ melol jiñi eʼtel tsaʼ bʌ subentiyob ti Jesús (Hechos 5:42).

11. a) ¿Bajcheʼ tsiʼ pʌsʌ chaʼan lajalʌch bajcheʼ cʼun bʌ ocʼol jiñi David? b) ¿Bajcheʼ miʼ mejlel lac lajin?

¹¹ Chaʼan miʼ weñʼesañonla Jehová ili ora, miʼ cʼʌn jiñi Biblia, chʼujul bʌ i yespíritu yicʼot jiñi congregación. Mi la com chaʼan miʼ weñʼesañonla jiñi Biblia, yom mi lac pejcan, mi lac wen ñaʼtan muʼ bʌ i yʌl yicʼot mi laj cʼajtiben Dios chaʼan miʼ coltañonla lac jacʼben i tʼan. Jiñi rey David tsiʼ sube Jehová: «Mic ñaʼtañet [...] cheʼ cañal c wut ti acʼʌlel» (Salmo 63:6). Tiʼ tsʼijbu jaʼel: «Mi caj c chʼujutesan c Yum muʼ bʌ i cʌntesañon. Miʼ cʌntesañon tic pusicʼal cheʼ ti acʼʌlel» (Salmo 16:7). David lajalʌch bajcheʼ jiñi ocʼol cʼun bʌ tiʼ cʼʌñol. Tsiʼ wen ñaʼta i ticʼojel Jehová yicʼot tsiʼ yʌcʼʌ chaʼan miʼ tojʼesʌben i pensar yicʼot chuqui an tiʼ pusicʼal. Tsiʼ yʌcʼʌ i bʌ ti tojʼesʌntel anquese an i tajol wen wocolʌch tsiʼ yubi ti jacʼol (2 Samuel 12:1-13). ¿Bajcheʼ miʼ mejlel lac lajiben i pecʼlel yicʼot cheʼ tsiʼ jacʼʌ i ticʼol? Laʼ lac ñaʼtan: «Cheʼ mic pejcan jiñi Biblia, ¿muʼ ba c wen ñaʼtan yicʼot mij cʌy chaʼan miʼ weñʼesan c pensar yicʼot am bʌ tic pusicʼal jiñi i ticʼojel tac Jehová? ¿Muʼto ba i mejlel c mel ti ñumen utsʼat?» (Salmo 1:2, 3).

12, 13. ¿Bajcheʼ miʼ cʼʌn chʼujul bʌ i yespíritu Jehová yicʼot jiñi congregación chaʼan miʼ weñʼesañonla?

¹² Jiñi chʼujul bʌ espíritu cabʌl bajcheʼ miʼ mejlel i weñʼesañonla jaʼel. Miʼ mejlel i coltañonla lac lajin bajcheʼ yilal Jesús yicʼot mi lac pʌs i yʌcʼbal jiñi espíritu (Gálatas 5:22, 23). Jumpʼejl i yʌcʼbal jiñʌch jiñi cʼuxbiya. La com lac jacʼben i tʼan Dios come mi laj cʼuxbin i la com chaʼan miʼ weñʼesañonla come la cujil chaʼañʌch lac wenlel muʼ bʌ i subeñonla. I jiñi chʼujul bʌ espíritu miʼ yʌqʼueñonla lac pʼʌtʌlel chaʼan mach jiñic miʼ cʼʌñonla ili jontol bʌ pañimil (Efesios 2:2). Laʼ lac ñaʼtan tiʼ tojlel Pablo. Cheʼ bʌ chʼiton to, tsaʼ wen subenti ti judíojob ñucoʼ bʌ i yeʼtel chan bʌ tsiʼ qʼueleyob i bʌ chaʼan chuqui yom bʌ miʼ mel. Pero jiñi chʼujul bʌ espíritu tsiʼ colta ti qʼuextʌyel. Jin chaʼan tiʼ tsʼijbu ti wiʼil: «Miʼ mejlel j cuch tiʼ pejtelel chuqui jach wocolix i yʌlʌ jiñi muʼ bʌ i yʌqʼueñon c pʼʌtʌlel» (Filipenses 4:13, TNM). Yom mi laj cʼajtiben chʼujul bʌ i yespíritu Jehová jaʼel, i mucʼʌch caj i jacʼ la coración (Salmo 10:17).

¹³ Jehová miʼ cʼʌn jaʼel jiñi congregación yicʼot ancianojob. Jumpʼejl ejemplo, jiñi ancianojob miʼ ñopob i coltañonla cheʼ bʌ an chuqui woli lac chaʼlen miʼ qʼuelob. Pero maʼañic miʼ yʌlob bajcheʼ miʼ bajñel ñaʼtañob (Gálatas 6:1). Añob i pecʼlel yicʼot miʼ cʼajtiñob i ñaʼtʌbal ti Jehová. Miʼ qʼuelob chuqui miʼ yʌl jiñi Biblia yicʼot lac jun tac loqʼuem bʌ yaʼi chaʼan miʼ ticʼoñobla. Jin chaʼan, laʼ laj cʼajtesan chaʼan jiñʌch bajcheʼ miʼ pʌsbeñonla i cʼuxbiya Dios cheʼ bʌ jiñi ancianojob miʼ ticʼoñobla chaʼan bajcheʼ yilal yom lac pislel o yan tac bʌ. Mi mucʼʌch lac jacʼ, lajalonla bajcheʼ cʼun bʌ ocʼol. I mucʼʌch lac taj lac wenlel.

14. Anquese añonla tiʼ cʼʌb Jehová, ¿bajcheʼ miʼ chʼʌm ti ñuc chaʼan librejonla?

¹⁴ Cheʼ mi lac chʼʌmben isujm bajcheʼ miʼ weñʼesañonla Jehová, ñumen utsʼat mi la cajñel la quicʼot la quermañojob. Jiñi muʼ bʌ lac subeñob jiñi wen tʼan yicʼot majqui mi laj cʌqʼueñob estudio ñumen wen mi caj lac ñaʼtan tiʼ tojlelob. Juntiquil xmel pʼejt xucʼu xucʼul miʼ locʼsʌben tiʼ pejtelel i tsuculel jiñi ocʼol chaʼan miʼ mejlel i cʼʌn ti eʼtel. Jehová miʼ coltan majqui jach yom i yʌcʼ i bʌ ti weñʼesʌntel. Pero maʼañic miʼ wersa xicʼ ti qʼuextʌyel, yujil chaʼan librejonla. Xucʼu xucʼul miʼ pʌsben baqui tac bʌ i mandar yicʼot miʼ yʌqʼuen tiʼ wenta mi yom qʼuextʌyel.

15, 16. ¿Bajcheʼ miʼ pʌs chaʼan yomʌch miʼ weñʼesʌntel ti Jehová jiñi woli bʌ laj cʌntesan chaʼan Biblia? Alʌ jumpʼejl ejemplo.

¹⁵ Laʼ laj qʼuel tsaʼ bʌ ujti tiʼ tojlel juntiquil hermana i cʼabaʼ Tessie, chʼoyol bʌ ti Australia. Mach wocolic tsiʼ yubi chaʼan miʼ cʌn chuqui miʼ cʌntesañonla jiñi Biblia. Pero maʼañic tsaʼ caji ti qʼuextʌyel mi tsaʼic caji ti majlel ti tempa bʌ. Jiñi hermana woli bʌ i yʌqʼuen estudio tsiʼ pejca Jehová i tsiʼ ñaʼta chaʼan miʼ cʌy i julaʼtan. Pero an chuqui tsaʼ ujti. Cheʼ bʌ woliyob ti estudio, Tessie tiʼ tsictesʌbe chucoch maʼañic woli ti qʼuextʌyel. Tsiʼ yʌlʌ chaʼan miʼ wen mulan alas tiʼ caj taqʼuin i chaʼan lolom jach woli ti estudio miʼ yubin. Pero tsiʼ yʌlʌ chaʼan muqʼuix caj i cʌy bajcheʼ jiñi.

¹⁶ Maʼañic tsaʼ wen jali, Tessie tsaʼ caji ti majlel ti tempa bʌ tac yicʼot tsaʼ caji i pʌs wem bʌ i melbal, anquese tsaʼ caji ti wajlentel ti poj i yamigojoʼ bʌ. Ti wiʼil tsiʼ chʼʌmʌ jaʼ i tsaʼ ochi bajcheʼ precursora regular anquese anto chʼoʼchʼoc (chut) bʌ i yalobilob. Tiʼ sujm, cheʼ bʌ miʼ tech i qʼuextan i bʌ juntiquil woli bʌ laj cʌntesan chaʼan Biblia, Jehová miʼ lʌcʼtesan i bʌ tiʼ tojlel yicʼot miʼ weñʼesan chaʼan lajal bajcheʼ cʼoʼtajax bʌ pʼejt miʼ sujtel.

17. a) ¿Chucoch maʼ mulan chaʼan jiñʌch Jehová majqui miʼ weñʼesañet? b) ¿Chuqui mi caj laj qʼuel ti yambʌ temaj?

¹⁷ Ili ora añob to xmel pʼejt tiʼ cʼʌb to bʌ miʼ wen melob jiñi cʼoʼtajax bʌ pʼejt tac. Cheʼ lajal Jehová, yujil pijt chaʼan miʼ yʌqʼueñonla ticʼojel tac, i ti wiʼil miʼ wen qʼuel bajcheʼ yilal mi lac jacʼ (pejcan Salmo 32:8). ¿Muʼ ba laj qʼuel bajcheʼ miʼ wen qʼuelonla ti ñuc Jehová ti jujuntiquilonla? ¿Muʼ ba laj qʼuel bajcheʼ wen xucʼul jach miʼ weñʼesañonla? ¿Chuqui mi caj i coltañonla chaʼan chʌn cʼuñonla ti weñʼesʌntel ti Jehová bajcheʼ cʼun bʌ ocʼol? ¿Chuqui mach yom mi lac mel mi mach lac comic lajalonla bajcheʼ tsʌts bʌ ocʼol? ¿Chuqui miʼ mejlel i mel jiñi tatʌlob chaʼan jiñi i yalobilob miʼ mejlelob ti weñʼesʌntel ti Jehová? Ili mi caj laj qʼuel ti yambʌ temaj.