Cʌntesʌntel 103
Ti jini cuarto ñupʼul bʌ
CHEʼ bʌ Pedro yicʼot Juan tsaʼ loqʼuiyob majlel baqui tsaʼ mujqui Jesús, María tsaʼ to bajñel cʌyle yaʼi. Tsaʼ caji ti uqʼuel. ¡Cheʼ jini tsiʼ qʼuele i malil jini mucoñibʌl, tsiʼ taja i qʼuel chaʼtiquil ángelob! Tsiʼ cʼajtibeyob María: ‹¿Chucoch woliyet ti uqʼuel?›.
María tsiʼ jacʼʌ: ‹Tsaʼix i chʼʌmbeyob majlel i bʌcʼtal c Yum, mach cujilic baqui tsaʼ yʌcʼʌyob›. Cheʼ jini, tsiʼ qʼuele i pat i tsaʼ i qʼuele juntiquil winic. Jini winic tsiʼ cʼajti: ‹¿Majqui woli a sajcan?›.
María tsiʼ ñaʼta chaʼan jini winic, jiñʌch jini muʼ bʌ i cʌntan pʌcʼʌbʌl, tajol jin tsaʼ i chʼʌmbe majlel i bʌcʼtal Jesús. Jin chaʼan María tsiʼ yʌlʌ: ‹Mi jatet tsaʼ chʼʌmbe majlel i bʌcʼtal c Yum, subeñon baqui tsaʼ wʌcʼʌ›. Pero jini winic jiñʌch Jesús. María maʼanic tsiʼ cʌñʌ, come Jesús mach lajalix bajcheʼ ti ñaxan. Pero cheʼ bʌ jini María tsaʼ pejcʌnti tiʼ cʼabaʼ, tsiʼ ñaʼta chaʼan jiñʌch Jesús. Tsaʼ majli ti ajñel i suben xcʌntʼañob: ‹¡Tsaʼ j qʼuele lac Yum!›.
Cheʼ bʌ maxto bʌjlem jini qʼuin, woliyob ti majlel chaʼtiquil xcʌntʼañob yaʼ ti tejclum Emaus, yaʼ ti bij tsiʼ tajayob juntiquil winic i tsaʼ majli jaʼel yicʼotob. Jini xcʌntʼañob wen chʼijiyemob chaʼan tsaʼ chʌmi Jesús. Pero cheʼ woliʼ majlelob yaʼ ti bij, jini winic tsaʼ caji i wen tsictesan chuqui am bʌ ti Biblia i tsaʼ caji i yubiñob i tijicñʌyel. Cheʼ bʌ tsaʼ jijliyob chaʼan miʼ cʼuxob i waj, jini chaʼtiquil xcʌntʼañob tsaʼ caji i cʌñob chaʼan jini winic jiñʌch Jesús. Pero tsaʼ sʌc majli, jini xcʌntʼañob tsaʼ chaʼ sujtiyob majlel ti Jerusalén chaʼan miʼ majlel i subeñob jini apóstolob.
Cheʼ woli to ti ujtel jini, Jesús tsiʼ pʌsʌ i bʌ baqui an Pedro jaʼel. Jini yañoʼ bʌ tijicña tsaʼ caji i yubiñob cheʼ bʌ tsaʼ subentiyob iliyi. Cheʼ jini, jini chaʼtiquil xcʌntʼañob tsaʼ majliyob ti Jerusalén i yaʼ tsiʼ tajayob jini apóstolob. Tsaʼ yʌlʌyob chaʼan tsiʼ tajayob i qʼuel Jesús yaʼ ti bij. Cheʼ woli to i yʌlob iliyi, ¿awujil ba chuqui tsaʼ ujti?
Qʼuele yaʼ ti dibujo. Jesús tsaʼ sʌc cʼoti yaʼ ti cuarto, anquese ñupʼul jini puerta. ¡Cabʌl i tijicñʌyel tsiʼ tajayob jini xcʌntʼañob! ¡Jiñʌch jumpʼejl qʼuin wen tijicña bʌ! ¿Muʼ baʼ mejlel a wʌl jay sujtel tsiʼ pʌsʌ i bʌ Jesús? ¿Joʼsujtel ba?
Cheʼ bʌ Jesús tsiʼ sʌc pʌsʌ i bʌ, jini apóstol Tomás mach yaʼic an. Jin chaʼan, jini xcʌntʼañob tsiʼ subeyob: ‹¡Tsaʼ j qʼuele lojon lac Yum!›. Pero jini Tomás tsiʼ yʌlʌ chaʼan mi caj i ñop jin to cheʼ miʼ taj i qʼuel Jesús. Weno, tsaʼ ñumi waxʌcpʼejl qʼuin cheʼ bʌ tsiʼ chaʼ tempayob i bʌ ti jini cuarto ñupʼul bʌ, pero cheʼ bʌ ora jini yaʼix an Tomás. Cheʼ jini, ti ora jach tiʼ sʌc pʌsʌ i bʌ Jesús. Ti jimbʌ ora, Tomás tsiʼ ñopo chaʼan isujmʌch.
Juan 20:11-29; Lucas 24:13-43.