Cʌntesʌntel 104
Jesús tsaʼ chaʼ majli ti panchan
CABɅL qʼuin tsaʼ ñumi, i mach junsujtel jach tsiʼ qʼueleyob Jesús jini woli bʌ i tsajcañob majlel. Jumpʼejl bʌ qʼuin, tsiʼ taja i qʼuelob joʼcʼal i chaʼbajcʼ (500) xcʌntʼañob. Cheʼ bʌ tsiʼ taja i qʼuelob Jesús, ¿awujil ba chuqui tsaʼ subentiyob? Jiñʌch chaʼan i yumʌntel Dios. Jioba tsiʼ choco tilel Jesús wʌʼ ti Pañimil chaʼan miʼ chaʼlen cʌntesa chaʼan jini Yumʌntel. Cheʼ tsiʼ chʌn mele cheʼ bʌ tsaʼ tejchisʌnti chʼojyel.
¿Cʼajal baʼ chaʼan chuqui jini i yumʌntel Dios? Jiñʌch isujm bʌ yumʌntel i chaʼan Dios yaʼ ti panchan, i Jesús jiñʌch Yajcʌbil bʌ i chaʼan Dios, chaʼan mi yochel bajcheʼ rey. ¡Cheʼ bajcheʼ tsaʼix laj qʼuele, Jesús tsiʼ pʌsʌ chaʼan wen mi caj i mel i yeʼtel bajcheʼ rey, cheʼ bʌ tsiʼ yʌqʼue i bʌl i ñʌcʼ jini wiʼñayoʼ bʌ, cheʼ bʌ tsiʼ cʼoqʼuesa xcʼamʌjelob yicʼot cheʼ bʌ tsiʼ teche chʼojyel chʌmeñoʼ bʌ!
Jin chaʼan, cheʼ bʌ Jesús miʼ chaʼlen yumʌntel mil jab yaʼ ti panchan, ¿chuqui mi caj ti ujtel wʌʼ ti Pañimil? Cheʼʌchi, pejtelel pañimil miʼ caj ti sujtel tiʼ tʼojol jax bʌ paraíso. Maʼanix miʼ chʌn cajel guerra tac, mi tsʌnsa, mi cʼamʼan, mi jinic to chʌmel. La cujil chaʼan cheʼʌch mi caj ti ujtel bajcheʼ jini, come Dios tsiʼ mele Pañimil chaʼan miʼ sujtel ti jumpʼejl paraíso, baqui mi caj i chumtʌl winicob xʼixicob. Jin chaʼan tsiʼ mele i tʼojol jax bʌ pʌcʼʌbʌl i cʼabaʼ Edén. Jesús mi caj i tsʼʌctesan yom bʌ Dios.
Tsaʼix cʼoti i yorajlel chaʼan Jesús mi caj i chaʼ majlel ti panchan. Chaʼcʼal (40) qʼuin tsiʼ pʌsʌ i bʌ Jesús tiʼ tojlel xcʌntʼañob yicʼot yujilobix chaʼan Jesús cuxulʌch. Pero cheʼ an to yom chaʼan Jesús miʼ cʼʌjquel majlel ti panchan, tsiʼ sube xcʌntʼañob: ‹Cʌylenla ti Jerusalén jinto mi laʼ wʌqʼuentel chʼujul bʌ espíritu›. Iliyi jiñʌch i pʼʌtʌlel Dios, cheʼ bʌ bajcheʼ icʼ muʼ bʌ i wejlañonla, jiñʌch muʼ bʌ caj i coltan woli bʌ i tsajcañob majlel Jesús, chaʼan miʼ melob chuqui yom Dios. Cheʼ jini, Jesús tsiʼ yʌlʌ cojix tac bʌ tʼan: ‹Mi caj laʼ chaʼlen subtʼan chaʼan joñon tiʼ pejtelel Pañimil›.
Cheʼ bʌ tsaʼ ujti i yʌl iliyi, an chuqui tsaʼ ujti tsaʼ bʌ i yʌqʼueyob ti toj sajtel i pusicʼal jini xcʌntʼañob i chaʼan. Jesús tsaʼ caji ti cʌjqʼuel majlel ti panchan, cheʼ bajcheʼ maʼ qʼuel ti dibujo. Ti wiʼil, jumpʼejl tocal tsiʼ mʌcta, cheʼ jini, jini xcʌntʼañob maʼanix tsiʼ chʌn taja i qʼuelob. Jesús tsaʼ majli ti panchan, ti wiʼil, tsaʼ caji i yuman woli bʌ i tsajcañob majlel, wʌʼ bʌ añob ti Pañimil.
1 Corintios 15:3-8; Apocalipsis 21:3, 4; Hechos 1:1-11.