Cʌntesʌntel 112
Tsiʼ coltayob i bʌ ti lum joyol bʌ ti jaʼ
¡QʼUELE cu, jini barco woliʼ sujpʼejl yaʼ ti ñajb! ¡Woliʼ jejmel! ¿Muʼ baʼ taj a qʼuel jini winicob xʼixicob tsaʼ bʌ i chocoyob i bʌ ti jaʼ? Cabʌlob woliyix i cʼotelob tiʼ tiʼ jaʼ. ¿Yaʼ ba an Pablo yaʼi? Laʼ laj qʼuel chuqui woli ti ujtel tiʼ tojlel.
Yom cʼajal a chaʼan, anix chaʼpʼejl jab i yochel ti mʌjquibʌl jini Pablo yaʼ ti Cesarea. Cheʼ jini, tsaʼ pʌjyi majlel Pablo yicʼot yambʌ xcʌjchelob ti barco cʼʌlʌl ti Roma. Tiʼ tʼejl jini lum joyol bʌ ti jaʼ i cʼabaʼ Creta, tsaʼ tili tsʌts bʌ icʼ yaʼ baqui añob i tsiʼ jatsʼʌ jini barco. Jini winicob maʼanic tsaʼ mejli i tojʼesañob majlel jini barco. Cabʌl qʼuin maʼanic tsaʼ mejli i qʼuelob Qʼuin yicʼot ecʼ. Jin chaʼan jini winicob tsiʼ ñaʼtayob chaʼan yaʼix mi caj i chʌmelob.
Cheʼ jini Pablo tsaʼ tejchi i tsiʼ subeyob: ‹Maʼanic majqui mi caj i chʌmel, cojach jini barco mi caj i jilel. Come sajmʌl ti acʼʌlel tsaʼ tili juntiquil ángel i chaʼan Dios i tsiʼ subeyon: «¡Mach maʼ chaʼlen bʌqʼuen Pablo! Wersa mi caj a waʼtʌl tiʼ tojlel César yumʌl bʌ ti Roma. Dios miʼ caj i coltan jini yaʼ bʌ an a wicʼotob»›.
¡Cheʼ bʌ anix chʌnlujumpʼejl (14) qʼuin i cajel jini jaʼal, jini xʼeʼtelob ti barco tsiʼ tajayob i qʼuel ti acʼʌlel chaʼan mach ñoj tamic jini jaʼ! Come acʼʌlel, tsiʼ bʌcʼñayob chaʼan jini barco miʼ jatsʼ i bʌ ti xajlel yaʼ baqui woliʼ majlelob, jin chaʼan tsiʼ chocoyob ochel i cʌylib barco. Ti yijcʼʌlal tsiʼ taja i qʼuelob i jijlib barco. Tsiʼ ñopo i tojʼesañob majlel jini barco yaʼ tiʼ tiʼ jaʼ.
Cheʼ bʌ woliyix i cʼotelob tiʼ tiʼ jaʼ, jini barco tsaʼ cʌyle yaʼ baqui an cabʌl jiʼ. Cheʼ bʌ tsaʼ caji i weʼcʼulan i bʌ jaʼ tsiʼ jatsʼʌ jini barco, i tsaʼ caji ti jejmel. Am bʌ tiʼ wenta jini barco juntiquilʌch soldado, tsiʼ yʌlʌ: ‹Chaʼlenla ñuxijel cʼʌlʌl mi laʼ cʼotel tiʼ tiʼ jaʼ, jini mach bʌ laʼ wujilic ñuxijel yom wiʼil mi laʼ choc laʼ bʌ ti jaʼ yicʼot cʼʌñʌla i xujtʼil tac jini barco chaʼan maʼanic mi laʼ chʌmel yaʼ ti jaʼ›. Cheʼʌch tsiʼ meleyob jini 276 winicob xʼixicob yaʼ bʌ añob ti barco maʼanic chuqui tsiʼ chaʼleyob cʼʌlʌl tsaʼ cʼotiyob tiʼ tiʼ jaʼ, cheʼ bajcheʼ tsiʼ yʌlʌ jini ángel.
Jini lum joyol bʌ ti jaʼ i cʼabaʼ jiñʌch Malta. Jini winicob xʼixicob añʌch cabʌlob i yutslel i pusicʼal, i tsiʼ coltayob jini yaʼ bʌ tsaʼ cʼotiyob yaʼ ti barco. Cheʼ bʌ tsaʼix ujti ti ñumel icʼ jaʼal, tsiʼ chocoyob majlel Pablo ti yambʌ barco cʼʌlʌl ti Roma.