Cʌntesʌntel 114
Mi caj i jisʌntel pejtelel jontolil
¿CHUQUI maʼ taj a qʼuel ti jini dibujo? Jiñʌch junmojt soldadojob cʼʌchʌloʼ bʌ ti sʌsʌc caballo tac. Pero qʼuele baqui woliʼ loqʼuelob tilel. ¡Jini caballo tac woliʼ jubel tilel tiʼ panchan tiʼ pam jini tocal! ¿Am ba caballo tac yaʼ ti panchan?
Maʼanic, mach caballo tac ti melel. La cujil chaʼan cheʼʌch, come jini caballo tac mach mejlic i chaʼlen ajñel ti tocal, ¿ñomach? Pero jini Biblia miʼ taj ti tʼan chaʼan caballo tac ti panchan. ¿Awujil ba chucoch?
Come wajali miʼ wen cʼʌjñel caballo tac ti guerra. Jin chaʼan, jini Biblia mi yʌl chaʼan mi caj i jubelob tilel winicob cʼʌchʌloʼ bʌ ti caballo, chaʼan miʼ pʌsob mi caj i chaʼlen guerra Dios tiʼ contra jontoloʼ bʌ winicob xʼixicob wʌʼ ti Pañimil. ¿Awujil ba chuqui i cʼabaʼ jini guerra? Jiñʌch Armagedón, jiñʌch baqui mi caj i jisʌntel jini jontolil wʌʼ ti Pañimil.
Jesús jiñʌch am bʌ tiʼ wenta muʼ bʌ caj i yujtel yaʼ ti guerra ti Armagedón. Yom cʼajal a chaʼan, Jioba tsiʼ yajca Jesús chaʼan mi yochel ti rey Tiʼ yumʌntel. Jin chaʼan Jesús xojol i chaʼan i corona. Cheʼ chʼʌmʌ majlel i chaʼan jini espada, yom yʌcʼ ti ñaʼtʌntel chaʼan mi caj i jisan jini i contrajob Dios. ¿Yom ba toj sajtel lac pusicʼal cheʼ bʌ Dios mi caj i jisan tiʼ pejtelel jini jontoloʼ bʌ winicob xʼixicob?
Sʌclan jini Cʌntesʌntel 10. ¿Chuqui maʼ qʼuel yaʼ ti dibujo? Jiñʌch jini colem bʌ Butʼjaʼ tsaʼ bʌ i jisa jini jontoloʼ bʌ winicob xʼixicob. ¿Majqui tsiʼ choco tilel jini Butʼjaʼ? Jiñʌch Jioba Dios. Wʌle qʼuele jini Cʌntesʌntel 15. ¿Chuqui woliʼ yujtel maʼ qʼuel yaʼ ti dibujo? Jioba tsiʼ cʼʌñʌ cʼajc chaʼan miʼ jisan Sodoma yicʼot Gomorra.
Ñumen yaʼ ti Cʌntesʌntel 33. Qʼuele chuqui woliʼ chaʼlen jini caballo tac yicʼot jini carro tac chaʼan guerra i chaʼan jini egiptojob. ¿Majqui tsiʼ mele chaʼan miʼ chaʼ ñupʼ i bʌ jini ñajb? Jiñʌch Jioba. Tsiʼ mele bajcheʼ iliyi, chaʼan miʼ cʌntan i tejclum. Sʌclan jini Cʌntesʌntel 36 yicʼot 76. Yaʼi mi laj qʼuel chaʼan Jioba tsiʼ cʌyʌ i tejclum chaʼan miʼ jisʌntelob tiʼ caj i jontolilob.
Jin chaʼan, mach yomic toj sajtel lac pusicʼal cheʼ bʌ Jioba miʼ choc tilel i soldadojob, chaʼan miʼ jisañob tiʼ pejtelel jini jontolil wʌʼ ti Pañimil. ¿Chuqui miʼ caj ti ujtel ti wiʼil? Cʼaxen ti jini yambʌ iyopol, i laʼ laj qʼuel chuqui miʼ cajel tiʼ ujtel.