Cʌntesʌntel 115

Jumpʼejl tsijiʼ bʌ paraíso wʌʼ ti Pañimil

QʼUELE cu jini chan tac bʌ teʼ, jini i tʼojol jax tac bʌ ñich teʼ yicʼot jini chaʼan tac bʌ wits. Wen i tʼojol jax jini, ¿ñomach? Qʼuele, jini alʌ chʼiton woli yʌqʼuen chuqui miʼ cʼux jini meʼ o chijmay. Qʼuele jini bajlum tac yicʼot jini caballo tac yaʼ bʌ an ti jam. ¿Muʼ baʼ mulan chumtʌl ti jumpʼejl Pañimil cheʼ bajcheʼ maʼ qʼuel yaʼ ti dibujo?

Dios yom chaʼan maʼ chumtʌl tiʼ pejtelel ora wʌʼ ti Pañimil ti jumpʼejl paraíso, baqui maʼanix maʼ wubin cʼuxyajiyel cheʼ bajcheʼ waʼli. Jiñʌch muʼ bʌ yʌl jini Biblia chaʼan jini muʼ bʌ caj i chumtʌlob ti jini tsijiʼ bʌ paraíso. ‹Dios mi caj i yajñel yicʼotob. Maʼanix majch miʼ caj ti chʌmel mi ucʼtaya mi jinic to cʼuxyajiyel. Come tsaʼix ñumi jini ñaxan tac bʌ.›

Jesús an ti wenta chaʼan miʼ tsʼʌctiyel iliyi. ¿Awujil ba jala? Jiñʌch cheʼ baqui ora Jesús mi caj i jisan jini jontolil wʌʼ ti Pañimil yicʼot jini jontoloʼ bʌ. Yom cʼajal a chaʼan, cheʼ bʌ Jesús tsajni wʌʼ ti Pañimil, tsiʼ lajmesʌbe i cʼamʌjel jini cʼamoʼ bʌ yicʼot tsiʼ tejchesa chʼojyel chʌmeñoʼ bʌ. Cheʼ bʌ tsiʼ mele jini, tsiʼ pʌsʌ chaʼan chuqui mi caj i mel tiʼ pejtelel Pañimil cheʼ ochemix bajcheʼ Rey tiʼ yumʌntel Dios ti panchan.

¡Ñaʼtan cu bajcheʼ yilal miʼ cajel cheʼ yaʼix añonla ti paraíso! Jesús yicʼot lamital tsaʼ bʌ i yajca, mi caj i chaʼlen yumʌntel yicʼotob yaʼ ti panchan. Jiñʌch muʼ bʌ caj i cʌntañob wʌʼ bʌ chumulob ti pañimil yicʼot chaʼan tijicña miʼ chumtʌlob. Laʼ laj qʼuel chuqui yom mi lac mel chaʼan Dios mi yʌqʼueñonla laj cuxtʌlel mach bʌ anic miʼ jilel ti jini tsijiʼ bʌ i paraíso.

Apocalipsis 21:3, 4; 5:9, 10; 14:1-3.