Wocolix i yʌlʌ Jehová yicʼot Jesús libre mi caj la cajñel

¿Chuqui tac ti wocol maʼ ñusan ti jujumpʼejl qʼuin? ¿Jatet ba jiñi i jol familia i yom maʼ chaʼlen wersa a tsʼʌctesan pejtelel jiñi a weʼtel? ¿A bajñel ba maʼ cosan a walobil i wocol maʼ wubin chaʼan maʼ mʌcʼlan a familia? ¿Woli ba a ñusan wocol yaʼ ti escuela? ¿Am ba a cʼamʌjel o wocol maʼ wubin tiʼ caj ñoxetix? Ti lac pejtelel an lac wocol, pero an hermanojob muʼto bʌ i ñumen ñusañob cabʌl wocol. La cujil chaʼan tsʼitaʼ jax yom chaʼan mi luʼ jilel jiñi wocol tac (2 Co. 4:16-18).

Pero Jehová mucʼʌch i chʼʌmben i sujm woli bʌ lac ñusan i miʼ qʼuel ti ñuc cheʼ bʌ mi lac pʌs lac xucʼtʌlel yicʼot cheʼ bʌ woli lac lʌtʼ majlel jiñi wocol, i miʼ subeñonla chaʼan mi caj i yʌqʼueñonla cabʌl bendición (Jer. 29:11, 12). Jesús mucʼʌch i qʼuelonla ti ñuc jaʼel. Mi mucʼʌch lac chaʼlen wersa lac tsʼʌctesan ti wen la queʼtel, Jesús miʼ subeñonla: «Añon quicʼotetla» (Mt. 28:20). Mi mucʼʌch la cʌqʼuen i yorajlel chaʼan mi lac wen ñaʼtan jiñi lac librejlel muʼ bʌ caj i yʌqʼueñonla jiñi i Yumʌntel Dios, jiñi lac pijtaya mi caj i ñumen pʼʌtʼan yicʼot mach wocolic mi caj lac ñusan baqui jach bʌ wocol (Ro. 8:19-21).

CHEʼ BɅ TSAʼIX LAʼ QʼUELE JIÑI VIDEO LAʼ LAC CHɅN ACʼ LAC PENSAR TI CRISTO CHEʼ BɅ MIʼ LɅCʼTIYEL JIÑI TSɅTS BɅ WOCOL, JACʼɅ ILI CʼAJTIYA TAC:

• ¿Bajcheʼ tsiʼ ñajtʼesayob i bʌ ti Dios jiñi wiñicob xʼixicob, i chuqui ti wocol tsiʼ chʼʌmʌ tilel?

• ¿Chuqui mi caj i yʌqʼuentelob ti talto bʌ qʼuin jiñi xucʼuloʼ bʌ tiʼ tojlel Jehová?

• ¿Chucoch mucʼʌch mejlel lac taj wen utsʼatax bʌ lac pijtaya?

• ¿Baqui bʌ jiñi bendición a womix bʌ a qʼuel chaʼan miʼ tsʼʌctiyel ti jiñi tsijiʼ bʌ pañimil?