¿Jiñoʼ ba jiñi secta jiñi i testigojob Jehová?
Mach jiñiqui, joñon lojon bajcheʼ i testigojob Jehová mach jiñon lojon jiñi secta. xÑoptʼañon lojon muʼ bʌ c chaʼlen lojon wersa chaʼan mi lon c mel jiñi tsaʼ bʌ i pʌsʌ Jesús yicʼot mic chumtan lojon i cʌntesa tac.
¿Chuquiyes jiñi secta?
An cabʌl tʼan tac chaʼan chuqui yes jumpʼejl secta. Laʼ laj qʼuel chaʼchajp tʼan muʼ bʌ i yʌl chaʼan jiñi yicʼot chucoch cheʼ maʼañic miʼ mejlelob ti cʌjñel bajcheʼ secta jiñi i testigojob Jehová.
An muʼ bʌ i yʌlob chaʼan jiñi secta jiñʌch jumpʼejl tsijiʼ bʌ ñopbalʌl yicʼot muʼ bʌ i cʌy i melob jiñi costumbre tac. Joñon lojon bajcheʼ i testigojob Jehová maʼañic tsaʼ c teche lojon jumpʼejl tsijiʼ bʌ ñopbalʌl. Mucʼ jach c tsajcan lojon majlel cheʼ bajcheʼ tsaʼ bʌ i mele jiñi ñaxam bʌ xñoptʼañob ti wajali yicʼot mic jacʼben lojon i cʌntesajob, i jiñi yaʼʌch jamʌl tsiquil mi yʌl ti Biblia (2 Timoteo 3:16, 17). Mi lon c wen ñop chaʼan jiñʌch jiñi Chʼujul bʌ Tsʼijbujel muʼ bʌ i subeñonla bajcheʼ yom mi lac chʼujutesan Dios.
An muʼ bʌ i yʌlob chaʼan jiñi secta jiñʌch jumpʼejl ñopbalʌl bʌcʼñʌbil bʌ yicʼot mucʼ jach bʌ i tsajcañob juntiquil xcʌntesa. Ti ñaxan, joñon lojon bajcheʼ i testigojob Jehová maʼañic mic tsajcan lojon mi juntiquilic to wiñic o xʼixic, come mic jacʼ lojon jiñi tʼan tsaʼ bʌ i sube Jesús jiñi xcʌntʼañob i chaʼan ti wajali: «Mach yomic mi laʼ pejcʌntel ti yumʌl come juntiquil jach laʼ yum, jiñʌch Cristo» (Mateo 23:10).
I maʼañic mic bʌcʼñʌntel lojon, come jiñi lon c ñopbal miʼ yʌqʼueñon lojon c wenlel yicʼot jaʼel miʼ coltan jiñi yambʌ wiñicob xʼixicob. Jumpʼejl ejemplo, jiñi wen tʼan loqʼuem bʌ ti Biblia muʼ bʌ lon c sub an i colta cabʌl quixtañujob chaʼan miʼ cʌy i japob jiñi lembal yicʼot chaʼan miʼ cʌyob jiñi droga tac. Yaʼ ochem ti lon queʼtel jaʼel cheʼ bʌ mij cʌntesan lojon jiñi quixtañujob chaʼan miʼ cʌn i pejcañob jun, i mic mel lojon ili eʼtel tiʼ petol pañimil, jin chaʼan an cabʌl millón quixtañujob tsaʼix bʌ i cʌñʌyob tsʼijb yicʼot i pejcañob jun. Cheʼ jaʼel, mic chaʼlen lojon coltaya cheʼ bʌ miʼ yujtel jumpʼejl tsʌts bʌ wocol ti baqui jach bʌ parte. Mic chaʼlen lojon wersa chaʼan mi lon c mel jiñi wem bʌ tiʼ tojlel lon c piʼʌl, cheʼʌch bajcheʼ tsiʼ cʌntesa jiñi xcʌntʼañob i chaʼan Jesús ti wajali (Mateo 5:13-16).