Eʼtel tac chaʼan bʌ construcción tsaʼ bʌ mejli cheʼ bʌ maxto tejchi jiñi pandemia

Ti jujumpʼejl jab yonlel lac piʼʌlob miʼ chʼʌmob jaʼ. Jin chaʼan, yom miʼ ñumen mejlel otot tac baqui miʼ chʼujutesʌntel Jehová. Jiñi departamento local chaʼan Diseño y Construcción tiʼ petol pañimil tsiʼ ñaʼtayob i mel o i tsijibtesañob ñumen ti 2 mil 700 i yotlel chʼujutesaya ti jiñi jabil chaʼan subtʼan 2020.a

Pero jiñi pandemia chaʼan COVID-19 an i tsʼitaʼ mʌcta ili eʼtel tac. Jiñi Comité chaʼan Publicación chaʼan jiñi Junmojt muʼ bʌ i pʌsob bij tsiʼ waʼchoco lʌcʼʌ tiʼ pejtelel ili eʼtel tac chaʼan miʼ cʌntʌntel jiñi hermanojob yicʼot chaʼan miʼ jajqʼuel muʼ bʌ i yʌlob jiñi yumʌlob. Pero ti jiñi jabil chaʼan subtʼan 2020 tsaʼ mejli yicʼot tsaʼ tsijibtesʌnti ñumen ti mil 700 baqui miʼ chʼujutesʌntel Jehová. Cheʼ jaʼel, tsaʼ ujtesʌnti ñumen ti 100 ñuqui eʼtel tac chaʼan construcción ti jiñi sucursal tac. Laʼ laj qʼuel chaʼpʼejl yicʼot bajcheʼ an i colta jiñi hermanojob.

Jiñi sucursal ti Camerún. Jiñi sucursal am bʌ yaʼ ti tejclum Duala wen chʼoʼchʼoc i cabʌl chuqui yom miʼ tojʼesʌbentel. Jiñi Comité chaʼan Publicación tsiʼ ñaʼta i tojʼesan jiñi sucursal, pero wen lets colel i loqʼuel. Cheʼ jaʼel, tsiʼ ñaʼtayob i mel yambʌ otot tac chaʼan chʼujutesaya ti yambʌ parte o i mʌñob yicʼot i tojʼesañob yambʌ otot. Pero maʼañic tsaʼ mejli ti mejlel pejtelel iliyi.

Pero jiñi hermanojob tsiʼ yubiyob chaʼan jiñi añoʼ bʌ i yeʼtel woliʼ ñaʼtañob i mel jumpʼejl tsijiʼ bʌ carretera yaʼ tiʼ nortejlel Duala, tiʼ tʼejl jumpʼejl i yotlel laj colem tempa bʌ. Jiñi tsijib carretera mi caj i yʌcʼ chaʼan miʼ mejlelob ti cʼotel ti jiñi sucursal yicʼot chaʼan miʼ tajtʌl jiñi luz yicʼot jiñi jaʼ, jiñʌch i cʼʌjñibal bʌ i chaʼan jiñi sucursal. Jin chaʼan, jiñi Junmojt muʼ bʌ i pʌsob bij tsiʼ yʌlʌ chaʼan miʼ mejlel yambʌ sucursal yaʼ tiʼ tʼejl jiñi i Yotlel colem tempa bʌ.

Jiñi hermanojob tsiʼ chaʼleyob ti contratar jumpʼejl empresa chaʼan construcción chaʼan miʼ mejlel majlel jiñi eʼtel, i jin chaʼan maʼañic tsaʼ wen cʼʌjñi tiempo yicʼot taqʼuin. Cheʼ jaʼel, maʼañic tsaʼ wen jisʌnti taqʼuin ti jiñi eʼtel: Maʼañic tsaʼ cʼʌjñi ñumen ti 2 millón dólar. Jiñi familia Betel tsaʼ mejli ti cʼaxel ti jiñi tsijib sucursal cheʼ bʌ tsʼitaʼ jachix yom chaʼan miʼ tejchel jiñi pandemia chaʼan COVID-19.

Ili ora, jiñi betelitajob ti Camerún ñumen weñix baqui chumulob yicʼot baqui miʼ chaʼleñob eʼtel, i miʼ qʼuelob jiñi tsijib sucursal bajcheʼ majtañʌl tilem bʌ ti Jehová. Jumpʼejl xñujpuñel miʼ yʌl: «Wʌleʼli ñumen comix lon eʼtel i mi lon j qʼuel ti ñuc ili majtañʌl».

Oficina Remota ti jiñi tʼan tojolabal (México). Cabʌl jab, jiñi equipo chaʼan traducción ti tojolabal tsiʼ chaʼle eʼtel ti jiñi sucursal chaʼan Centroamérica, lʌcʼʌl bʌ an ti Ciudad de México. Pero jiñi tʼan tojolabal miʼ wen cʼʌjñel ti jiñi municipio chaʼan Altamirano yicʼot Las Margaritas, cʌylem bʌ mil kilómetro bʌ i ñajtlel ti jiñi sucursal. Jin chaʼan, jiñi traductorob wocol tsiʼ yubiyob chaʼan miʼ ñaʼtañob bajcheʼix miʼ chaʼleñob tʼan jiñi lac piʼʌlob ti tojolabal. I jiñi sucursal wocol tsiʼ yubi chaʼan miʼ taj hermanojob lʌcʼʌl bʌ chumulob yaʼi muʼ bʌ i mejlelob ti coltaya ti traducción yicʼot ti grabación.

Jin chaʼan, jiñi Comité chaʼan Redacción chaʼan jiñi Junmojt muʼ bʌ i pʌsob bij tsiʼ yʌlʌ chaʼan jiñi equipo miʼ majlel yaʼ baqui miʼ cʼʌjñel jiñi tʼan tojolabal. Jin chaʼan, jiñi sucursal tsiʼ mʌñʌ i tsiʼ tojʼesa jumpʼejl otot. Ili mach wen letsic i tojol tsaʼ loqʼui come maʼañic tsaʼ junyaj tejchi ti mejlel jumpʼejl otot yicʼot maʼañic tsaʼ chaʼlenti ti rentar oficina tac.

Juntiquil traductor miʼ yʌl bajcheʼ yubil miʼ yubin i bʌ: «10 jab tsaʼ ajñiyon yaʼ ti sucursal, pero maʼañic tsaʼ c taja mi jumpʼejlic familia yujil bʌ c tʼan. Ti ili ora, jiñi oficina wʌʼix an baqui miʼ cʼʌjñel tojolabal. Ti jujumpʼejl qʼuin miʼ mejlel c pejcan lac piʼʌlob yujiloʼ bʌ ili tʼan. Ili an i ñumen weñʼesa c tʼan i an i coltayon ti queʼtel».

Eʼtel tac chaʼan jiñi jabil chaʼan subtʼan 2021

Mi mucʼʌch i mejlel, ti jiñi jabil chaʼan subtʼan 2021 yom miʼ mejlel 75 oficina chaʼan traducción yicʼot otot tac baqui miʼ yʌjqʼuel cʌntesa. Mi caj i bej mejlel jaʼel 8 eʼtel tac ti cabʌl sucursal, yaʼ baqui ochem jiñi eʼtel ti Rámapo (Nueva York) yicʼot i ñijcʌntel jiñi sucursal tac am bʌ ti Argentina yicʼot Italia. Cheʼ jaʼel, yom miʼ mejlel ñumen ti mil i Yotlel tempa bʌ tac. Cheʼ jaʼel, an ñumen ti 6 mil i yotlel chʼujutesaya yom bʌ miʼ qʼuextʌntel i an yambʌ 4 mil i Yotlel tempa bʌ yom bʌ miʼ tojʼesʌntel.

¿Baqui miʼ tajtʌl jiñi taqʼuin chaʼan miʼ mejlel pejtelel ili eʼtel? Jiñi hermano Lázaro González, ochem bʌ ti jiñi Comité chaʼan sucursal chaʼan Centroamérica, miʼ jacʼ ili cʼajtiya. Tsiʼ taja ti tan jiñi Oficina chaʼan traducción chaʼan tojolabal i tsiʼ yʌlʌ: «Jiñi hermanojob añoʼ bʌ tiʼ territorio jiñi sucursal mach wen cabʌlobic i taqʼuin. Tiʼ coltaya jiñi hermanojob añoʼ bʌ tiʼ petol pañimil, tsaʼ mejli ti mejlel oficina tac chaʼan traducción chaʼan jiñi hermanojob yujiloʼ bʌ lenguas indígenas. Wocolix i yʌlʌ jiñi laʼ donación tac, miʼ mejlel lon c choc majlel jiñi traductorob yaʼ ti tejclum tac baqui yujilob jiñi tʼan. Mi cʌqʼuen lon wocolix i yʌlʌ pejtelel jiñi hermanojob cheʼ miʼ tʼoxob chuqui añob i chaʼan». ¿Tsaʼ baʼ qʼuele? Wocolix i yʌlʌ jiñi laʼ donación tac miʼ mejlel pejtelel ili eʼtel. Cabʌl donación tac yaʼ miʼ mejlel ti donate.jw.org.